Epesõs 3:1-21
3 Kõn men in, ña Paul, ij ri-kalbuuj an Christ Jesus bwe kom̦ armej in aelõñ ko kom̦win bõk tokjãn—
2 kom̦ar lukkuun roñ bwe iar bõk eddo eo ñan jipañ kom̦ bõk tokjãn jãn jouj eo el̦ap an Anij,
3 kõn wãween an kar Anij kwal̦o̦k men eo ettino im eokkwõjarjar ñan ña ãinwõt aõ kar jejewaj kake m̦oktal̦o̦k ilo tukadu.
4 Innem ñe kom̦ naaj riiti men in, kom̦ naaj kile aõ mel̦el̦e kõn men eo ettino im eokkwõjarjar kõn Christ.
5 Ilo epepen ko m̦oktal̦o̦k, Anij ear jab kwal̦o̦k men in ettino ñan ro nejin armej, ãinwõt an kwal̦o̦ke kiiõ ikijjeen jetõb kwõjarjar* ñan rijjilõk ro an rekkwõjarjar im ri-kanaan ro.
6 Men eo ettino ej bwe ilo an ri-aelõñ ko juon wõt ippãn Christ Jesus im ikijjeen ennaan eo em̦m̦an, ren maroñ ri-jolõt ippãn im m̦õttan juon wõt ãnbwin, im jolõte kallim̦ur eo ippãd.
7 Iar oktak im ri-kwal̦o̦k kake men in ekkar ñan menin letok eo an Anij ejjel̦o̦k on̦ããn, eo ej jouj eo an el̦ap, im ear kwal̦o̦k ñan ña ikijjeen kajoor eo an.
8 Meñe ittãl̦o̦k jãn eo ettãtata iaan aolep ro rekkwõjarjar, ak kar letok jouj eo el̦ap ñan ña bwe in kwal̦o̦k ennaan eo em̦m̦an ñan ri-aelõñ ko kõn aolep jeraam̦m̦an ko rel̦l̦ap jãn Christ, ko jejjab maroñ lukkuun mel̦el̦e kaki,
9 im kõm̦m̦an bwe aolep ren lo wãween an jerbal men eo ettino im eokkwõjarjar me Anij, eo ear kõm̦anm̦an men otemjej, ear kõm̦m̦an bwe en n̦ojak jãn etto.
10 Unin ej kõnke ikijjeen eklejia eo, kien ko im maroñ ko ijoko ilañ ren kiiõ lo an mãlõtlõt eo an Anij jerbal ilo elõñ wãween.
11 Men in ej ekkar ñan karõk eo ear kõm̦m̦ane jãn jinoin im ej ekkejell̦o̦k ippãn Christ Jesus ad Irooj.
12 Kõn wõt e, jej peran in kõnono im jemaroñ kepaake Anij jabdewõt iien ikijjeen tõmak eo ad ilo e.
13 Innem ij kajjitõk ippemi bwe kom̦win jab ebbeer kõn mãlejjoñ kein ij iiooni kõn kom̦, kõnke men kein rej bõktok nõbar ñan kom̦.
14 Eñin unin, ij bukwelõlõ im̦aan Jemãd,
15 eo aolep baam̦le ilo lañ im ilo lal̦ rej pãd kõn wõt e.*
16 Ij jar bwe kõn aiboojoj eo an el̦ap, en kõkajoor armej eo itulowa ilo kom̦ ikijjeen kajoor eo jãn jetõb kwõjarjar* eo an,
17 im bareinwõt bwe Christ en pãd ilo bũruomi ilo yokwe ikijjeen tõmak eo ami. En kanooj in pen im tõt wõt okrami ilo pedped eo,
18 bwe en lõt ami mel̦el̦e ãinwõt aolep ro rekkwõjarjar, kõn depakpakin, aetokan, utiejen, im m̦wilal̦in
19 yokwe eo an Christ im bwe kom̦win jel̦ã kake yokwe in an, eo el̦apl̦o̦k jãn jel̦ãl̦o̦kjen̦, kõnke en iio ami obrak kõn aolep men ko rem̦m̦an Anij ej litoki.
20 Kiiõ ñan eo emaroñ kõm̦m̦an el̦apl̦o̦k jãn men otemjej jej kajjitõk im l̦õmn̦aki, ekkar ñan kajoor eo an ej jerbal ilo kõj,
21 aiboojoj en ilo̦k ñane, ikijjeen eklejia eo im Christ Jesus, ilo aolep epepen ñan indeeo im indeeo. Amen.
Footnotes
^ Ak “kajoor eo an.” Lale “Jetõb kwõjarjar” ilo Kõmel̦el̦e Ko.
^ Kajin Grik, “rõm̦uri ñane kõn ãt ko etaer.”
^ Lale “Jetõb kwõjarjar” ilo Kõmel̦el̦e Ko.
