Revelesõn 1:1-20
1 Men ko kar kwal̦o̦ki ikijjeen Jesus Christ, im Anij ear lel̦o̦k bwe en kwal̦o̦ki ñan ri-karejar ro an im epaak aer naaj wal̦o̦k. Ear jilkintok enjel̦ eo an bwe en kwal̦o̦k men kein ikijjeen kõkal̦l̦e ñan Jon, ri-karejeran,
2 eo ear kwal̦o̦k naan ko Anij ear lil̦o̦ki, im men eo Jesus Christ ear kwal̦o̦k kake. Ear kwal̦o̦k men otemjej ear loi.
3 Em̦õn̦õn̦õ eo ej riit kõn juon ainikien el̦l̦aaj, im ro rej roñjake naan ko ilo kanaan in im ro rej l̦oore men ko ie im kar jei bwe epaaktok iien eo em̦õj kar karõke.
4 Jãn Jon ñan eklejia ko jimjuon rej pãd ilo jikin ko ilo Eijia:*
En pãd ippemi jouj eo el̦ap im aenõm̦m̦an jãn “Eo ej kiiõ, Eo ej m̦okta, im Eo ej itok,” im jãn jetõb ko jimjuon rej pãd im̦aan tũroon eo an,
5 im jãn Jesus Christ, “ri-Kõnnaan eo Etiljek,” “m̦aanje eo m̦oktata ear jerkak jãn mej,” im “ri-Tõl eo an kiiñ ro an lal̦.”
Ñan eo ej yokwe kõj im ear kanemkwõj kõj jãn jerawiwi ko ad ikijjeen bõtõktõkin make—
6 im ear kõm̦m̦an bwe jen erom juon aelõñ im bũrij ñan Anij eo an, eo ej Jemãn—aet, en ilo̦k aiboojoj im kajoor ñane ñan indeeo. Amen.
7 Lale m̦õk! Ej itok ilo kõdo̦ ko, im aolep mãj renaaj loe, ekoba ro rar wãkare; im bwij otemjej ilo lal̦ renaaj lukkuun bũrom̦õj* kõn e. Aet, enaaj ãindein. Amen.
8 Jeova* Anij ej ba, “Ña Alpha im Omega,* Eo ej kiiõ im eo ej m̦okta im eo ej itok. Ña Anij Ekajoor Bõtata.”
9 Ña Jon, jeimi im jatimi, kõn aõ juon wõt ippãn Jesus, ij bareinwõt juon wõt ippemi ilo eñtaan, ilo aelõñ eo, im ilo kijenmej. Iar pãd ilo ãneo etan Patmõs kõn wõt aõ kõnono kõn Anij im kwal̦o̦k kõn Jesus.
10 Ikijjeen jetõb kwõjarjar,* men in ear kõm̦m̦an bwe in pãd ilo raan eo an Irooj, im iar roñ juon ainikien el̦ap jãn tulikũ, ãinwõt ainikien jilel,
11 im ej ba: “Jabdewõt men kwõj loe, kwõn je ilo juon bok lemlem im jilkinl̦o̦k ñan eklejia kein jimjuon: Epesõs, Smõrna, Pergemõm, Thaietaira, Sardis, Philadelphia, im Leodisia.”
12 Iar oktak likl̦o̦k bwe in lale wõn eo ej kõnono ñan eõ, im ke ij oktakl̦o̦k, iar lo jimjuon jurõn l̦aam̦ gold,
13 im iol̦apen jurõn l̦aam̦ kein, juon eo ej ãinwõt nejin armej ej jutak, im ej kõn̦ak juon nuknuk etõpar neen im ej kõn̦ak juon kañũr gold ej kaapool̦e ubõn.
14 Bareinwõt, kool̦an bõran emouj ãinwõt kool̦an jiip im ãinwõt jin̦o, im iju in mejãn eurur ãinwõt kijeek,
15 im neen ejatõltõl ãinwõt kõba ko relukkuun erreo ñe rej tũli ilo kijeek, im ainikien ej ãinwõt ainikien an dãn ko ibeb.
16 Im jimjuon iju rej pãd ituanbwijmaroñin pein, im ear wal̦o̦ktok jãn lo̦ñiin juon jãje eaetok, ekkañ im ruo mejãn, im turin mejãn ãinwõt al̦ ñe ej kajoor an romaak.
17 Ke iar loe, iar buñ iturin neen im ãinwõt ñe imej.
Im ear likũt pein anmoon̦ n̦a ioõ im ba: “Kwõn jab mijak. Ña eo M̦oktata im eo Ãliktata,
18 im eo emour. Iar mej, ak lale m̦õk! Ij kiiõ mour ñan indeeo im indeeo, im epãd ippa ki in mej im ki in Lõb.*
19 Innem, kwõn jei men ko kwaar loi, im men ko rej wal̦o̦k kiiõ kab men ko renaaj wal̦o̦k ãlikin men kein.
20 Men eo ettino im eokkwõjarjar kõn iju ko jimjuon kwaar loi ituanbwijmaroñin peiũ im kõn jurõn l̦aam̦ gold ko jimjuon, ej eñin: Iju ko jimjuon rej kõkkar kõn enjel̦ ro an eklejia ko jimjuon, im jurõn l̦aam̦ ko jimjuon rej kõkkar kõn eklejia ko jimjuon.
Footnotes
^ Lale “Eijia” ilo Kõmel̦el̦e Ko.
^ Ak “deñdeñõte ãnbwinnier kõn aer lukkuun bũrom̦õj.”
^ Lale “Jeova” ilo Kõmel̦el̦e Ko.
^ Naan kein Alpha im Omega rej lõta ko m̦oktata im ãliktata ilo alphabet ko ilo kajin Grik.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “Hedis,” ej kõkkar kake lõb eo libõn aolep armej. Lale “Lõb” ilo Kõmel̦el̦e Ko.
