Revelesõn 20:1-15
20 Im iar lo an juon enjel̦ wanlal̦tak jãn lañ im ej jibwe ki in abyss* eo im juon jeen el̦ap.
2 Ear jibwe dragon eo, jedpãnit eo jãn etto, eo ej Tepil̦ im Setan, im ear liãpe ium̦win 1,000 iiõ.
3 Innem ear jol̦o̦ke ilo abyss* eo, im ear kilõke im jiil̦i bwe en jab bar m̦on̦e aelõñ ko m̦ae iien ejem̦l̦o̦k 1,000 iiõ. Ãlikin, naaj aikuj kõtl̦o̦ke ium̦win jidik wõt iien.
4 Im iar lo tũroon ko, im ro rej jijet ioer kar kõmaroñ er ñan ekajet. Aet, iar lo ro kar m̦an er* kõn wõt aer kar kwal̦o̦k kõn Jesus im kõnono kõn Anij. Iar bareinwõt lo ro rar jab kabuñ ñan menninmour eo eawiia ak ekjab eo ekjabin im rar jab bõk kõkal̦l̦e eo ioon dem̦aer im ilo peier. Rein rar bar mour im rar kiiñ ippãn Christ ium̦win 1,000 iiõ.
5 Eñin ej jerkakpeje eo kein kajuon. Ro jet remej rar jab mour m̦ae iien ear jem̦l̦o̦k 1,000 iiõ.
6 Em̦õn̦õn̦õ im eokkwõjarjar ro rej jerkak im bar mour ilo jerkakpeje eo kein kajuon; bwe mej eo kein karuo ejjel̦o̦k an maroñ ioer, im rein renaaj bũrij an Anij im an Christ, im renaaj kiiñ im tõl ippãn ium̦win 1,000 iiõ.
7 Ãlikin wõt an jem̦l̦o̦k 1,000 iiõ, naaj kõtl̦o̦k Setan jãn an kalbuuj,
8 im enaaj ilo̦k im m̦on̦e aelõñ ko ilo kona ko emãn ilo lal̦, aet Gog im Megog, bwe en ko̦kweilo̦kl̦o̦k er ippãn doon ñan tarin̦ae. Oraer ej ãinwõt oran bok ko iparijet.
9 Im rar jeededl̦o̦k ipel̦aakin lal̦ im kaapool̦e jikin kõppãd eo an ro rekkwõjarjar im jikin eo elukkuun aorõk. Bõtab, kijeek ear wanlal̦tak jãn lañ im tile er.
10 Im kar jol̦o̦k Tepil̦, eo ear m̦on̦e er, ñan lom̦al̦o in kijeek im sulfur,* ijo menninmour awiia eo im ri-kanaan eo eriab repãd ie kadede; im renaaj eñtaan* raan im boñ ñan indeeo im indeeo.
11 Im iar lo juon tũroon ekilep im mouj im bareinwõt Eo ej jijet ioon. Im lañ im lal̦ rar ko jãn im̦aan mejãn im kar jab bar loi.
12 Im iar lo ro remej, ro reutiej im ro rettã, rej jutak im̦aan tũroon eo, im ewõr bok lemlem ko repel̦l̦o̦k. Innem bar juon bok lemlem ear pel̦l̦o̦k; eñin ej bokin mour eo. Im kar ekajete ro remej jãn men ko kar jei ilo bok lemlem kein ekkar ñan kõm̦m̦an ko aer.
13 Im lo̦meto ear kõtl̦o̦k ri-mej ro ie, im mej im Lõb* rar kõtl̦o̦k ri-mej ro ie, im kar ekajete er kajjojo ekkar ñan kõm̦m̦an ko aer.
14 Im kar jol̦o̦k mej im Lõb* ilo lom̦al̦o in kijeek. Lom̦al̦o in kijeek in ej mel̦el̦ein mej eo kein karuo.
15 Bareinwõt, jabdewõt eo kar jab je etan ilo bokin mour eo, kar jol̦o̦ke ilo lom̦al̦o in kijeek.
Footnotes
^ Mel̦el̦ein, “juon ro̦ñ elukkuun m̦wilal̦.” Lale “Abyss” ilo Kõmel̦el̦e Ko.
^ Mel̦el̦ein, “juon ro̦ñ elukkuun m̦wilal̦.” Lale “Abyss” ilo Kõmel̦el̦e Ko.
^ Kajin Grik, “m̦an er kõn ũlũl.”
^ Juon kain bo̦uta elukkuun kajoor an bwil im ekajoor bwiin ñe ej bwil.
^ Ak “kalbuuj; naaj dãpij er.”
^ Ak “Hedis,” ej kõkkar kake lõb eo libõn aolep armej. Lale “Lõb” ilo Kõmel̦el̦e Ko.
^ Ak “Hedis,” ej kõkkar kake lõb eo libõn aolep armej. Lale “Lõb” ilo Kõmel̦el̦e Ko.
