Revelesõn 8:1-13
8 Ke ear kõpel̦l̦o̦ke jiil̦ eo kein kajimjuon, ear ejjel̦o̦k ainikien ear wal̦o̦k ilañ ñan jidik ium̦win enañin jimattan awa.
2 Im iar reilo̦k im lo enjel̦ ro jimjuon rej jutak im̦aan Anij, im kar lel̦o̦k ñan er jimjuon jilel.
3 Bar juon enjel̦ ej jibwe juon jãpe gold kein kaijurjur* ear jãdetok im jutak iturin lokatok eo, im ekanooj lõñ kaijurjur kar lel̦o̦k ñane bwe en kobaiki ippãn jar ko an ro otemjej rekkwõjarjar im bwe en ajil̦o̦k ilo lokatok gold eo ej pãd im̦aan tũroon eo.
4 Im baat eo jãn kein kaijurjur eo ej pãd ilo pein enjel̦ eo ekoba jar ko an ro rekkwõjarjar, rar wanlõñl̦o̦k ñan im̦aan Anij.
5 Bõtab, enjel̦ eo ear m̦õkaj im bõke jãpe in kein kaijurjur eo, im ear kanne kõn mãlle ko rebwil* jãn lokatok eo im ear jolal̦l̦o̦k ñan lal̦. Innem ear wal̦o̦k jourur im ainikien ko im ear ejjaromrom im m̦akũtkũt lal̦.
6 Innem enjel̦ ro jimjuon me epãd ippãer jilel ko jimjuon, rar pojakin kõjañi.
7 Eo kein kajuon ear uuki jilel eo ippãn. Innem ear wõtlo̦k aij im kijeek ñan lal̦, ko em̦õj kãreiki ippãn bõtõktõk; im juon m̦õttan jilu in lal̦ in ear bwil, im juon m̦õttan jilu in wõjke ko rar bwil, im aolep ujooj ko rar bwil.
8 Enjel̦ eo kein karuo ear uuki jilel eo ippãn. Innem juon men ãinl̦o̦kwõt juon tol̦ ekilep im eurur kõn kijeek kar jol̦o̦ke ñan lom̦al̦o. Im juon m̦õttan jilu in lom̦al̦o ear oktak ñan bõtõktõk;
9 im juon m̦õttan jilu in menninmour ko ilo lo̦jet rar mej, im juon m̦õttan jilu in waan ejjerakrõk ko rar jorrããn.
10 Enjel̦ eo kein kajilu ear uuki jilel eo ippãn. Innem, juon iju ekilep im eurur ãinwõt juon l̦aam̦, ear wõtlo̦k jãn lañ im buñut ioon juon m̦õttan jilu in reba ko im unin dãn ko.
11 Etan iju in ej Menin Eddek Emeo̦. Im juon m̦õttan jilu in dãn ko rar oktak im meo̦, im elõñ iaan armej ro rar mej jãn dãn kein, kõnke remeo̦.
12 Enjel̦ eo kein kãmen ear uuki jilel eo ippãn. Im juon m̦õttan jilu in al̦ im juon m̦õttan jilu in allõñ im juon m̦õttan jilu in iju ko rar oktak im marok. Im ear ejjel̦o̦k meram ilo juon m̦õttan jilu in raan im bareinwõt ilo boñ.
13 Im iar lo im roñ an juon eagle ekkãke imejatoto ba naan kein ilo juon ainikien el̦ap: “Jerata, jerata, jerata ñan ro rej jokwe ioon lal̦ ñe enaaj wal̦o̦k ainikien jilel ko jet an enjel̦ ro jilu me rej pojakin uuki!”
