Hibru 2:1-18
2 Eñin unin ej menin aikuj bwe jen lukkuun kal̦apl̦o̦k wõt ad liñõri men ko jaar roñ kaki, kõnke jen jab pel̦o̦k jãn tõmak.
2 Bwe el̦aññe em̦ool naan ko rar wal̦o̦k ikijjeen enjel̦ ro, im el̦aññe ro rar rupe kien im jab pokake rar bõk kaje ekkar ñan wãween ekajet jim̦we,
3 innem ewi wãween ad maroñ naaj el̦l̦ã im mour el̦aññe jej kõjekdo̦o̦n lo̦mo̦o̦r in el̦ap? Ad Irooj ear kwal̦o̦k kake lo̦mo̦o̦r in m̦oktata, im tokãlik, ro rar roñ jãne rar kam̦oole l̦o̦k wõt ñan kõj,
4 im Anij ear bareinwõt kam̦oole men in ikijjeen kõkal̦l̦e ko, menin bwilõñ ko, im elõñ kain jerbal ko rel̦l̦ap im bareinwõt ilo an kar ajeji menin letok ko ikijjeen jetõb kwõjarjar* ekkar ñan ankilaan.
5 Ear jab likũt enjel̦ ro bwe ren tõl ro renaaj pãd ilo lal̦ eo enaaj itok, eo jej kõnono kake.
6 Bõtab, ewõr juon jikin juon ri-kam̦ool ear je im ba: “Ta armej bwe kwõn l̦õmn̦ak kake, ak nejin armej bwe kwõn kõjparoke?
7 Kwaar kõm̦m̦an bwe en ettãl̦o̦k jidik jãn enjel̦ ro; kwaar kõpãlpele kõn aiboojoj im nõbar, im kwaar kõmaroñe ioon jerbal ko an peim̦.
8 Kwaar likũt men otemjej ium̦win neen.” Ilo an kar Anij likũt men otemjej bwe ren pãd ium̦win maroñ eo an nejin, mel̦el̦ein bwe ejjel̦o̦k jabdewõt men en̦ ejjab pãd ium̦win maroñ eo an nejin. Ijoke kiiõ jejjañin loe an men otemjej pãd ium̦win maroñ eo an.
9 Bõtab jej loe Jesus, eo kar kõm̦m̦an bwe en ettãl̦o̦k jidik jãn enjel̦ ro, ej pãlpel kõn aiboojoj im nõbar kõn wõt an kar eñtaan ñan mej, bwe ikijjeen jouj eo el̦ap an Anij, en maroñ edjoñ mej kõn aolep armej.
10 Bwe Anij, eo im men otemjej rar wal̦o̦k kõn e im rej pãd ikijjeen e, ej bõktok elõñ ro nejin ñan aer bõk aiboojoj. Eñin unin ekkar bwe en kõm̦m̦an bwe ri-Tõl eo El̦ap, eo ej tõl rein ñan bõk lo̦mo̦o̦r, en weeppãn ikijjeen menin kaeñtaan ko.
11 Eo ej kokkwõjarjar im ro kar kokkwõjarjar er rar wal̦o̦ktok jãn juon wõt, eñin unin ejjab jook in n̦aetaer ro jatin
12 ke ear ba: “Inaaj kwal̦o̦k etam̦ ñan ro jatũ; inaaj nõbar eok kõn al ibwiljin eklejia eo.”
13 Ear bareinwõt ba: “Inaaj lõke e.” Im ear bar ba: “Lo! Ña im ajri ro reddik, ro Jeova* ear litok ñan eõ.”
14 Kõn men in, kõnke “ajri ro reddik” rej kanniõk im bõtõktõk, ear bareinwõt erom kanniõk im bõtõktõk, kõnke ikijjeen mej eo an, en jol̦o̦k Tepil̦ eo, eo ewõr an maroñ ioon mej,
15 im bwe en maroñ kanemkwõj* aolep ro rej pãd ilo kõm̦akoko ilo aolepen aer mour kõn aer mijak mej.
16 Bwe ilo m̦ool, ro ej jipañ er ej ro nejin* Ebream, im jab enjel̦ ro.
17 Eñin unin ear aikuj ãinwõt “ro jatin” ilo aolep wãween bwe en maroñ juon bũrij l̦apl̦ap eo etũriam̦o im etiljek ilo jerbal ko an Anij, im bwe en maroñ lel̦o̦k an menin katok kõn jerawiwi ko an armej bwe ren maroñ aenõm̦m̦an ippãn Anij.
18 Innem kõnke e make ear eñtaan ke ear iioon mãlejjoñ, ewõr an maroñ ñan jipañ ro rej iioon mãlejjoñ.
Footnotes
^ Ak “kajoor eo an.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “karõl̦o̦k.”
^ Kajin Grik, “ineen.”
