Jon 13:1-38
13 Jesus ear jel̦ã m̦okta jãn Kwõjkwõjin Kijoone eo bwe ejejjet iien an etal jãn lal̦ in ñan ippãn Jemãn. Im ãinwõt an kar yokwe ri-kal̦oor ro an ilo lal̦ in jãn jinoin, ãindein ear yokwe wõt er ñan jem̦l̦o̦kin.
2 Ke Jesus im ri-kal̦oor ro an rar kõjota, em̦õj kadede an Tepil̦ eo likũt juon l̦õmn̦ak ilo bũruon Judas Iskariõt, nejin Saimõn bwe en ketake.
3 Jesus ear jel̦ã bwe Jemãn ear lel̦o̦k men otemjej bwe ren pãd ium̦win pein, im bwe ear itok jãn Anij im ej pojakin jepl̦aak ñan ippãn Anij.
4 Kõn men in, ear jutak jãn tebõl̦ eo im utũk kopã eo an, innem ear bõk juon kein kõm̦õrã im lukwõje n̦a ipin.*
5 Ãlikin men in, ear teiñi juon pejin kõn dãn im jino an kwal̦ neen ri-kal̦oor ro im kõm̦õrãiki neer kõn kein kõm̦õrã eo ilo ipin.*
6 Ak ke ear tõpar Saimõn Piter, ear kajjitõk ippãn im ba: “Irooj, kwõj itõn kwal̦ neõ ke?”
7 Jesus ear uwaake im ba: “Ilo tõre in kwõjjab mel̦el̦e kõn unin aõ kõm̦m̦ane men in, bõtab tokãlik kwõnaaj mel̦el̦e.”
8 Piter ear ba ñane: “Kwõlukkuun ban kwal̦ neõ.” Im Jesus ear ba ñane: “El̦aññe ijjab kwal̦ neem̦, ejjab kwe ri-kal̦oora.”
9 Innem Saimõn Piter ear ba ñane: “Irooj, eokwe kwõn jab kwal̦ wõt neõ ak kwõn bar kwal̦ peiũ im bõra.”
10 Jesus ear ba ñane: “Jabdewõt eo em̦õj an tutu ejjab aikuj bar karreoik ãnbwinnin, ak neen wõt, kõnke em̦õj an erreo kadede. Kom̦ erreo, bõtab ejjab kom̦ aolep im erreo.”
11 Ear jel̦ã kõn em̦m̦aan eo enaaj ketake, eñin unin an ba: “Ejjab kom̦ aolep im erreo.”
12 Ãlikin an kar kwal̦ neer im bar kõn̦ake kopã eo an, ear bar jijetl̦o̦k ilo tebõl̦ eo im ear ba ñan er: “Kom̦ij ke mel̦el̦e kõn men eo iar kõm̦m̦ane ñan kom̦?
13 Kom̦ij kũr ña im ba, ‘Ri-Kaki’ im ‘Irooj,’ im ejim̦we ami ba men kein.
14 Kõn men in, el̦aññe ña Irooj im ri-Kaki ak iar kwal̦ neemi, innem kom̦ij aikuj* bar kwal̦ neen doon.
15 Iar likũt juon joñak ñan kom̦, bwe men eo iar kõm̦m̦ane ñan kom̦, kom̦win bar kõm̦m̦ane.
16 Ij ba ñan kom̦ bwe juon ri-karejar* ejjab utiejl̦o̦k jãn irooj eo an, im juon ri-keeañ ejjab utiejl̦o̦k jãn eo ear jilkinl̦o̦ke.
17 Kom̦ jel̦ã kõn men kein, bõtab kom̦ naaj m̦õn̦õn̦õ el̦aññe kom̦ij kõm̦m̦ani.
18 Ijjab kõnnaan kõn kom̦ aolep. Ijel̦ã kõn ro iar kããlõt er. Bõtab, ej aikuj jejjet men eo Jeje ko rej ba: ‘Eo ear m̦õñã jãn pilawã eo kijõ ear oktak im jum̦aik eõ.’
19 Ij ba men in ñan kom̦ kiiõ m̦okta jãn an wal̦o̦k, bwe ñe ewal̦o̦k kom̦win tõmak bwe eoon in ej kõnnaan kõn ña.
20 Ij ba ñan kom̦ bwe eo ej karwaineneik jabdewõt eo ij jilkinl̦o̦ke ej bar karwaineneik eõ, im jabdewõt eo ej karwaineneik eõ ej bar karwaineneik Eo ear jilkintok eõ.”
21 Ãlikin an Jesus ba men kein, ear kanooj l̦ap an inepata, im ear ba: “Ij ba ñan kom̦ bwe juon iaami enaaj ketak eõ.”
22 Innem ri-kal̦oor ro rar jino kalimjek doon kõn aer jaje wõn eo ej kõnnaan kake.
23 Juon iaan ri-kal̦oor ro, eo Jesus ej yokwe, ear jijet iturin* Jesus.
24 Kõn men in, Saimõn Piter ear kõm̦akũt bõran* ñane im ba: “Kwõn kwal̦o̦k ñan kõm wõn n̦e ej kõnnaan kake.”
25 Innem ri-kal̦oor eo ear atartarl̦o̦k ippãn Jesus im ba: “Irooj, wõn n̦e kwõj kõnnaan kake?”
26 Jesus ear uwaak im ba: “Eo inaaj lel̦o̦k pilawã eo ij kattuuki, eñin ej armej eo.” Innem ãlikin an kar kattuuki pilawã eo, ear lel̦o̦ke ñan Judas, l̦eo nejin Saimõn Iskariõt.
27 Ãlikin an Judas bõk pilawã eo, Setan ear kareel bũruon. Kõn men in, Jesus ear ba ñane: “Men eo kwõj kõm̦m̦ane, en m̦õkajl̦o̦k wõt am̦ kõm̦m̦ane.”
28 Ejjel̦o̦k juon iaan ro rej pãd ilo tebõl̦ eo rar jel̦ã unin an kar ba men in ñane.
29 Ilo m̦ool, kõnke Judas eo ej lale nien jããn eo, jet rar l̦õmn̦ak bwe Jesus ear ba ñane bwe en wiaiki men ko rej aikuji ñan kwõjkwõj* eo, ak bwe en lel̦o̦k juon menin lel̦o̦k ñan ro rejeram̦õl.
30 Ãlikin an kar bõk pilawã eo, ear kajju diwõjl̦o̦k. Ilo tõre in, ear boñ.
31 Innem ãlikin an kar diwõjl̦o̦k, Jesus ear ba: “Kiiõ ewal̦o̦k aiboojoj eo an Nejin armej,* im ewal̦o̦k aiboojoj eo an Anij ilo e.
32 Anij make enaaj kaiboojoje Nejin armej, im enaaj kõm̦m̦ane men in ilo m̦õkaj.
33 Ajri ran̦, ejjãmin to aõ pãd ippemi. Kom̦ naaj kappukot eõ, ak kiiõ ij ba ñan kom̦ ejja men eo wõt iar ba ñan ri-Ju ro, ‘Kom̦ij jab maroñ itok ñan ijo ij etal ñane.’
34 Ij lewaj ñan kom̦ juon kien ekããl, kom̦win yokwe doon. Ãinwõt aõ kar yokwe kom̦, ãindein kom̦win bar yokwe doon.
35 El̦aññe kom̦ij yokwe doon, innem aolep renaaj jel̦ã bwe kom̦ij ri-kal̦oora.”
36 Saimõn Piter ear kajjitõk im ba: “Irooj, kwõj etal ñan ia?” Im Jesus ear uwaak im ba: “Ilo tõre in, kwõjjab maroñ l̦oor eõ ñan ijo ij etal ñane, ak tokãlik kwõnaaj l̦oor eõ.”
37 Piter ear ba ñane: “Irooj, etke ijjab maroñ l̦oor eok kiiõ? Ipojakin mej kõn kwe.”
38 Jesus ear uwaak im ba: “Ta kwõlukkuun pojakin mej kõn ña ke? Ij ba ñan kwe bwe m̦okta jãn an ikkũr kako, jilu alen am̦ naaj kaarmejjeteik eõ.”
Footnotes
^ Ak “kañũrñũr kake.”
^ Ak “ear kañũrñũr kake.”
^ Ak “innem ej ami eddo ñan.”
^ Ak “ri-kõm̦akoko.”
^ Kajin Grik, “iturin ubõn.” Mel̦el̦ein bwe eutiej ippãn.
^ Ak “kõkal̦l̦el̦o̦k.”
^ Ej jitõñl̦o̦k ñan Kwõjkwõjin Bũreet Ejjab Kauwe.
^ Lale “Nejin armej” ilo Kõmel̦el̦e Ko.
