Jon 15:1-27
15 “Ña wõjke kũreep eo em̦ool, im Jema ej ri-kallib eo.
2 Ej jol̦o̦k aolep ra ko raõ rejjab kalle, im ej karreoiki jabdewõt ra rej kalle bwe en lõñl̦o̦k wõt leer.
3 Kom̦ erreo kadede kõn wõt naan ko iar ba ñan kom̦.
4 Kom̦win bõro wõt juon ippa im inaaj bõro wõt juon ippemi. Ãinwõt an juon ra jab maroñ kalle ñe ejjab pãd ilo wõjke kũreep eo, enaaj ãindein bar kom̦ el̦aññe kom̦ij jab bõro wõt juon ippa.
5 Ña wõjke kũreep eo im kom̦ ra ko. Jabdewõt eo ej bõro wõt juon ippa im ij bõro wõt juon ippãn, enaaj l̦ap an kalle kõnke ejjel̦o̦k men en̦ kom̦ maroñ kõm̦m̦ane ñe kom̦ij jenolo̦k jãn ña.
6 El̦aññe jabdewõt ejjab bõro wõt juon ippa, enaaj ãinwõt juon ra rej jol̦o̦ke im ej m̦õram̦rõm̦l̦o̦k. Innem armej rej aini ra kein im julo̦ki ilo kijeek im rebwil.
7 Bõtab el̦aññe kom̦ij bõro wõt juon ippa im naan ko aõ rej pãdwõt ilo bũruomi, innem ñe kom̦ij kajjitõk kõn jabdewõt men kom̦ kõn̦aan, enaaj tõprak.
8 Armej renaaj nõbar Jema el̦aññe enaaj l̦apl̦o̦k wõt ami kalle im el̦aññe kom̦ij kam̦ool bwe kom̦ ri-kal̦oora.
9 Ij yokwe kom̦ ãinwõt an Jema yokwe eõ. Kom̦win pãdwõt ilo yokwe eo aõ.
10 El̦aññe kom̦ij pokake kien ko aõ, kom̦ naaj pãdwõt ilo yokwe eo aõ, ãinwõt aõ kar pokake kien ko an Jema im pãdwõt ilo yokwe eo an.
11 “Iar jiroñ kom̦ men kein kõnke kom̦win bõk ejja lañlõñ eo wõt epãd ippa im en kanooj l̦ap ami lañlõñ.
12 Eñin kien eo aõ: Kom̦win yokwe doon ãinwõt aõ kar yokwe kom̦.
13 Ejjel̦o̦k yokwe en̦ el̦apl̦o̦k jãn yokwe eo an juon eo ej lel̦o̦k mour eo an kõn ro jeran.
14 Kom̦ij ro jera el̦aññe kom̦ij kõm̦m̦ani men ko ij kakien kom̦ kaki.
15 Ijjãmin bar añinñin kom̦ ri-karejar* kõnke juon ri-karejar ejaje kõn men ko irooj eo an ej kõm̦m̦ani. Bõtab, ij añinñin kom̦ ro jera kõnke em̦õj aõ kwal̦o̦k ñan kom̦ men otemjej iar roñ jãn Jema.
16 Kom̦ar jab kããlõt eõ, ak iar kããlõt kom̦ im jitõñ kom̦ bwe kom̦win ilo̦k im wõnm̦aanl̦o̦k wõt im kalle leen ko renaaj pãdwõt ñan indeeo. Innem jekdo̦o̦n ta eo kom̦ naaj kajjitõk kake ippãn Jema ilo eta, ak enaaj lewaj ñan kom̦.
17 “Ij kakien kom̦ kõn men kein bwe kom̦win yokwe doon.
18 El̦aññe lal̦ in ej dike kom̦, kom̦win keememej bwe ear dike eõ m̦okta jãn an dike kom̦.
19 El̦aññe kom̦win kar m̦õttan lal̦ in, innem lal̦ in enaaj kar yokwe kom̦ kõnke kom̦ij an. Bõtab kom̦ij jab m̦õttan lal̦ in im iar kããlõt kom̦ jãn lal̦ in, eñin unin an lal̦ in dike kom̦.
20 Kom̦win keememej wõt men eo iar ba ñan kom̦: Juon ri-karejar ejjab utiejl̦o̦k jãn irooj eo an. El̦aññe rar kaeñtaan eõ, innem renaaj bar kaeñtaan kom̦. El̦aññe rar pokake naan ko aõ, innem renaaj bar pokake naan ko ami.
21 Bõtab renaaj kõm̦m̦ani aolep men kein n̦ae kom̦ kõn wõt ãt eo eta,* kõnke rejaje kajjien Eo ear jilkintok eõ.
22 El̦aññe in kar jab itok im kõnnaan ñan er, enaaj kar ejjel̦o̦k aer jerawiwi.* Ak kiiõ rejjab maroñ jekpen kõn jerawiwi ko aer.
23 Jabdewõt eo ej dike ña, ej bar dike Jema.
24 El̦aññe in kar jab kõm̦m̦ani im̦aan mejãer jerbal ko ejjel̦o̦k en̦ enañin kõm̦m̦ani, enaaj kar ejjel̦o̦k aer jerawiwi.* Bõtab rar lo eõ im dike eõ im dike bar Jema.
25 Meñe ãindein ak men in ear wal̦o̦k ñan kajejjet kũtien naan ko kar jei ilo Jeje* ko aer: ‘Rar dike eõ kõn ejjel̦o̦k unin.’
26 Ñe inaaj jilkinwaj jãn Jema rijjipañ eo, jetõb kwõjarjar,* eo me ej rejetake m̦ool eo, enaaj iwõj jãn Jema im kwal̦o̦k kõn ña.
27 Innem ãlikin, kom̦win bar kwal̦o̦k kõn ña kõnke kom̦ar pãd ippa jãn jinoin.
Footnotes
^ Ak “ri-kõm̦akoko.”
^ Ak “kõnke kom̦ij ri-kal̦oora.”
^ Ak “eban kar wõr rueer.”
^ Ak “eban kar wõr rueer.”
^ Kajin Grik, “Kien eo.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
