Jon 17:1-26
17 Ãlikin an Jesus ba naan kein, ear reilõñl̦o̦k ñan lañ im ba: “Jema, emoottok awa eo. Kwõn kaiboojoj nejũm̦ bwe nejũm̦ en maroñ kaiboojoj eok.
2 Em̦õj am̦ lel̦o̦k an maroñ ioon armej otemjej,* bwe en maroñ lel̦o̦k mour indeeo ñan aolep ro kwaar lel̦o̦k ñane.
3 Bwe ren maroñ bõk mour indeeo, rej aikuj in jel̦ã kõn kwe, Anij eo wõt em̦ool, im Jesus Christ, eo kwaar jilkintok.
4 Iar kwal̦o̦k am̦ aiboojoj ijin ioon lal̦ ilo aõ kar kadedel̦o̦k jerbal eo kwaar letok bwe in kõm̦m̦ane.
5 Kõn men in, Jema, kwõn kaiboojoj eõ kiiõ n̦a iturum̦ ãinwõt am̦ kar kaiboojoj eõ m̦okta jãn an kar wõr armej.*
6 “Iar kwal̦o̦k etam̦ ñan armej ro kwaar letok ñan ña jãn lal̦ in. Rekar am̦, im em̦õj am̦ letok er ñan ña, im rar pokake naan ko am̦.
7 Rejel̦ã kiiõ bwe men otemjej kwaar litok ñan ña rej jãn kwe,
8 kõnke ke iar kwal̦o̦k ñan er aolep naan ko kwaar ba ñan ña, rar tõmaki im rar lukkuun tõmak bwe iar itok ikijjeem̦. Bareinwõt, rar tõmak bwe kwe eo kwaar jilkintok eõ.
9 Ij kajjitõk kõn er. Ijjab kajjitõk kõn lal̦ in, ak ij kajjitõk kõn ro kwaar letok er ñan ña, kõnke rej am̦.
10 Men otemjej ippa rej am̦ im men otemjej ippam̦ rej aõ, im men kein rar kaiboojoj eõ.
11 “Ij pojakin ilo̦k jãn lal̦ in im iwõj ñan ippam̦, bõtab rein rej pãd ilo lal̦ in. Jema, eo Eokkwõjarjar, kwõn lale er ikijjeen ãt eo etam̦, eo kwaar letok ñan ña bwe in jutak ikijjeen, bwe ren juon wõt* ãinwõt arro juon wõt.*
12 Ke iar pãd ippãer, ikõn lale er ikijjeen ãt eo etam̦, eo kwaar letok ñan ña bwe in jutak ikijjeen. Iar kõjparok er im ejjel̦o̦k juon iaaer ear jorrããn ijello̦kun wõt eo nejin jeepepl̦o̦k, kõnke en jejjet kũtien men eo Jeje ko rej ba.
13 Ij iwõj ñan ippam̦ kiiõ, ak ij ba men kein ilo lal̦ in bwe en kanooj l̦ap aer lañlõñ kõn ejja lañlõñ eo wõt epãd ippa.
14 Iar lel̦o̦k naan ko am̦ ñan er, bõtab lal̦ in edike er kõnke rejjab m̦õttan lal̦ in, ãinwõt aõ jab m̦õttan lal̦ in.
15 “Ijjab kajjitõk bwe kwõn bõk er jãn lal̦ in, bõtab ij kajjitõk bwe kwõn kõjparok er jãn ri-nana eo.*
16 Rejjab m̦õttan lal̦ in ãinwõt aõ jab m̦õttan lal̦ in.
17 Kwõn kokkwõjarjar er* kõn m̦ool eo, naan ko am̦ rej m̦ool eo.
18 Ij jilkinl̦o̦k er ilo lal̦ in ãinwõt am̦ kar jilkintok eõ ñan lal̦ in,
19 im ij kokkwõjarjar eõ make kõn er, bwe er bareinwõt ren maroñ eokkwõjarjar kõn m̦ool eo.
20 “Ijjab kajjitõk kõn rein wõt, ak ij bar kajjitõk kõn aolep ro renaaj likũt aer tõmak ilo ña ãlikin aer roñjake katak ko an rein.
21 Jema, ilo wãween in, renaaj juon wõt im renaaj bõro wõt juon ipperro, ãinwõt am̦ bõro wõt juon ippa im aõ bõro wõt juon ippam̦, bwe lal̦ en maroñ tõmak bwe kwe eo kwaar jilkintok eõ.
22 Iar lel̦o̦k ñan er aiboojoj eo kwaar letok ñan ña, bwe ren maroñ juon wõt ãinwõt arro juon wõt.
23 Ij bõro wõt juon ippãer im kwõj bõro wõt juon ippa. Ilo wãween in, remaroñ lukkuun juon wõt,* bwe lal̦ in en jel̦ã bwe kwaar jilkintok eõ im kwõj yokwe er ãinwõt am̦ yokwe eõ.
24 Jema, ikõn̦aan bwe ro kwaar letok er ñan ña ren pãd ijo ij pãd ie, bwe ren maroñ lo aiboojoj eo kwaar letok ñan ña, kõnke kwaar yokwe eõ m̦okta jãn kar jinoin lal̦.*
25 Jema, aolep iien kõm̦m̦an ko am̦ rewãnõk. Lal̦ in ejaje kajjiem̦ ak ña ijel̦ã kajjiem̦, im rein em̦õj aer jel̦ã bwe kwe eo kwaar jilkintok eõ.
26 Iar kwal̦o̦k etam̦ ñan er im inaaj wõnm̦aanl̦o̦k wõt im kwal̦o̦ke bwe yokwe eo kwaar kwal̦o̦ke ñan ña en pãd ippãer im bwe in bõro wõt juon ippãer.”
Footnotes
^ Ak “kanniõk otemjej.”
^ Kajin Grik, “m̦okta jãn an kar lal̦ in wal̦o̦k.”
^ Ak “ren bõrokuk.”
^ Ak “arro bõrokuk.”
^ Ak “lale er kõn wõt ri-nana eo.”
^ Ak “kõjenolo̦k er.”
^ Ak “lukkuun bõrokuk.”
^ Ej jitõñl̦o̦k ñan tõre ko an ajri ro nejin Adam im Iv.
