Jon 3:1-36
3 Ekar wõr juon em̦m̦aan etan Nikodimõs, ej juon Parisi im juon ri-tõl an ri-Ju ro.
2 L̦ein ear itok ñan ippãn Jesus ke eboñ, im ear ba: “Rabbai,* kõm jel̦ã bwe kwe juon ri-kaki eo Anij ear jilkintok, kõnke ejjel̦o̦k en̦ emaroñ kõm̦m̦ane menin kabwilõñlõñ* kein kwõj kõm̦m̦ani el̦aññe Anij ejjab pãd ippãn.”
3 Im Jesus ear ba ñane: “Ij ba ñan eok bwe el̦aññe juon armej ejjab bar l̦otak,* innem ejjab maroñ lo Aelõñ eo an Anij.”*
4 Nikodimõs ear ba ñane: “Ewi wãween an juon armej maroñ l̦otak ñe erũtto? Ta m̦ool ke emaroñ bar del̦o̦ñ ilowaan lo̦jien jinen im bar l̦otak ke?”
5 Jesus ear uwaake im ba: “Ij ba ñan eok bwe el̦aññe juon armej ejjab l̦otak jãn dãn im jetõb kwõjarjar,* innem ejjab maroñ del̦o̦ñ ilo Aelõñ eo an Anij.
6 Ro rej l̦otaktok jãn armej rej nejin armej, im ro rej l̦otaktok jãn jetõb kwõjarjar* rej nejin Anij.*
7 Kwõn jab bwilõñ kõn aõ kar ba ñan kwe bwe kom̦ij aikuj in bar l̦otak.
8 Kõto ej etal ijo ekõn̦aan im kwõj roñ ainikien, bõtab kwõjaje ej itok jãn ia im ej etal ñan ia. Ãindein aolep ro im rar l̦otaktok jãn jetõb kwõjarjar.”*
9 Im Nikodimõs ear ba ñane: “Ewi wãween an men kein naaj wal̦o̦k?”
10 Jesus ear uwaak im ba: “Kwe juon ri-kaki ñan armej in Israel ak kwõjaje men kein ke?
11 Ij ba ñan eok juon men em̦ool, men ko kõm jel̦ã kõmij kõnnaan kaki, im men ko kõmar loi kõmij kwal̦o̦ki. Bõtab, kom̦ar jab bõk men ko kõmar kwal̦o̦ki.
12 El̦aññe iar kwal̦o̦k ñan kom̦ kõn men ko an lal̦ bõtab kom̦ar jab tõmak, innem enaaj ewi wãween ami tõmak ñe inaaj kwal̦o̦k ñan kom̦ kõn men ko an lañ?
13 Bareinwõt, ejjel̦o̦k armej enañin kar wanlõñl̦o̦k ñan lañ. Bõtab eo ear wanlal̦tak jãn lañ ej Nejin armej.*
14 Ãinwõt an kar Moses lelõñl̦o̦k jedpãnit eo ilo ãne jem̦aden, ãindein aer naaj aikuj lelõñl̦o̦k Nejin armej,
15 bwe aolep ro rej tõmak ilo e ren maroñ bõk mour indeeo.
16 “Joñan an Anij yokwe lal̦ in, ear letok eo ej make wõt Nejin, bwe jabdewõt eo ej kwal̦o̦k an tõmak ilo e, en jab jako ak en bõk mour indeeo.
17 Anij ear jab jilkintok Nejin bwe en ekajete lal̦ in, bõtab ear jilkintok bwe lal̦ in en maroñ bõk lo̦mo̦o̦r kõn e.
18 Jabdewõt eo ej kwal̦o̦k an tõmak ilo e, eban bõk ekajet. Bõtab jabdewõt eo ejjab kwal̦o̦k an tõmak ilo e, em̦õj an kadede bõk ekajet kõnke ear jab kwal̦o̦k an tõmak ilo etan eo ej make wõt Nejin Anij.
19 Eñin unin an armej naaj bõk ekajet: meram eo ear itok ñan lal̦ in, bõtab armej rar jab yokwe meram eo ak rar yokwe marok kõnke jerbal ko aer renana.
20 Jabdewõt eo ej kõm̦m̦ani men ko rekajjõjõ, edike meram eo im ejjab kõn̦aan itok ñan meram eo kõnke en jab alikkar kõm̦m̦an ko an.
21 Bõtab jabdewõt eo ej kõm̦m̦ani men ko rejim̦we, ej itok ñan meram eo, kõnke en alikkar ke kõm̦m̦an ko an rej ekkar ñan ankilaan Anij.”
22 Ãlikin men in, Jesus im ri-kal̦oor ro an rar ilo̦k ñan bukwõn ko ilo Judia, im ear pãd ijo ippãer ium̦win elõñ raan im peptaiji armej.*
23 Jon ear bar peptaij armej ilo jikin eo etan Inon iturin Selim kõnke el̦ap dãn ie. Ear jab bõjrak an armej itok ñan ippãn im ear peptaiji er.
24 Ilo tõre in, Jon ejjañin kalbuuj.
25 Innem ri-kal̦oor ro an Jon rar akwããl ippãn juon ri-Ju kõn m̦antin karreo.
26 Tokãlik rar itok ñan ippãn Jon im ba ñane: “Rabbai,* kwõj keememej ke em̦m̦aan eo kwaar kõnnaan kake im ear pãd ippam̦ iturearin Reba Jordan? Eokwe, eñen̦ ej peptaij armej, im aolep rej etal ñan ippãn.”
27 Im Jon ear uwaak im ba: “Ejjel̦o̦k armej emaroñ bõk jabdewõt men el̦aññe Anij ear jab lel̦o̦k ñane.
28 Kom̦ar roñ aõ ba, ‘Ejjab ña Christ, bõtab em̦õj jilkintok eõ im̦aan.’
29 Kõrã eo ej m̦are ej an em̦m̦aan eo ej m̦areiki. Bõtab, ñe l̦eo m̦õttan em̦m̦aan eo ej m̦are ej jutak im roñ ainikien em̦m̦aan eo, el̦ap an m̦õn̦õn̦õ ke ej roñ ainikien. Ãindein ña, el̦ap aõ m̦õn̦õn̦õ.
30 Enaaj l̦apl̦o̦k jerbal ko an Christ, ak ña enaaj dikl̦o̦k.”
31 Eo ej itok jãn lañ eutiejl̦o̦k jãn aolep. Eo ej itok jãn lal̦ in, ej an lal̦ in im ej kõnono kõn men ko an lal̦ in. Eo ej itok jãn lañ eutiejl̦o̦k jãn aolep.
32 Ear kwal̦o̦k kõn men ko ear loi im roñ kaki, bõtab ejjel̦o̦k armej ear tõmaki naan ko an.
33 Jabdewõt eo ej tõmaki naan ko an, ej lukkuun tõmak bwe Anij em̦ool.
34 Eo Anij ear jilkintok ej kõnnaan kõn naan ko an Anij, kõnke ñe Anij ej lel̦o̦k jetõb kwõjarjar* eo an ñane, ejjab jidik wõt an lel̦o̦k.
35 Jemãn ej yokwe Nejin, im em̦õj an lel̦o̦k men otemjej bwe ren pãd ium̦win pein.
36 Jabdewõt eo ej kwal̦o̦k an tõmak ilo Nejin, enaaj bõk mour indeeo. Bõtab jabdewõt eo ejjab pokake Nejin, ejjãmin mour im illu eo an Anij enaaj pãdwõt ippãn.
Footnotes
^ Ak “Ri-Kaki.”
^ Kajin Grik, “kõkal̦l̦e.”
^ Ak emaroñ, “ejjab l̦otak jãn lañ.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Nejin armej” ilo Kõmel̦el̦e Ko.
^ Ak “Ri-Kaki.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
