Luk 19:1-48
19 Jesus ear del̦o̦ñel̦o̦k Jeriko im ear etal ilujenl̦o̦k.
2 Ekar wõr juon em̦m̦aan ijin etan Zakkiõs, ear juon ri-tõltõl eowõj eutiej im em̦weiie.
3 Em̦m̦aan in ear kajjioñ in pukot kilen bwe en lo Jesus, bõtab ear jab maroñ kõnke ekadu im epenjak mejãn ippãn jarlepju eo.
4 Kõn men in, ear ettõr im tallõñe juon wõjke sycamore* bwe en maroñ lo Jesus kõnke ej pojakin itok ijo tok.
5 Ke Jesus ear tõparl̦o̦k ijo, ear reilõñl̦o̦k im ba ñane: “Zakkiõs, kwõn m̦õkaj im to lal̦tak bwe ij aikuj pãd ilo m̦ween̦ im̦õm̦ rainin.”
6 Innem ear m̦õkaj im to, im ear m̦õn̦õn̦õ in karwaineneik Jesus ãinwõt juon an ri-lol̦o̦k.
7 Ke rar lo men in, rar aolep wũnojidikdik im ba: “L̦een̦ emoot im pãd ilo m̦ween̦ im̦õn rijjerawiwi en̦.”
8 Bõtab Zakkiõs ear jutak im kõnnaan ñan Irooj im ba: “Irooj, inaaj lel̦o̦k jimattanin aolepen men ko m̦weiõ ñan ro rejeram̦õl, im jabdewõt men ko iar bũki jãn armej ilo aõ kar riab, inaaj karo̦o̦ll̦o̦k ak emãn alen an naaj l̦apl̦o̦k.”
9 Innem Jesus ear ba: “Rainin emoottok lo̦mo̦o̦r ñan m̦wiin, kõnke em̦m̦aan in ej bar nejin Ebream.
10 Nejin armej* ear itok bwe en kappukot ro rejebwãbwe im lo̦mo̦o̦ren er.”
11 Ke ri-kal̦oor ro rar roñjake men kein, ear bar kwal̦o̦k juon waanjoñak kõnke ear epaakel̦o̦k Jerusalem im rar l̦õmn̦ak bwe Aelõñ eo an Anij* enaaj kajju wal̦o̦k.
12 Kõn men in, ear ba: “Juon em̦m̦aan eutiej ear pojakin etal ñan juon jikin ettol̦o̦k bwe en erom kiiñ, innem bar jepl̦aak.
13 Bõtab m̦okta jãn an kar etal, ear kũrtok joñoul iaan ri-karejar* ro an im ear lel̦o̦k ñan er joñoul mina* im ba, ‘Kom̦win koorl̦o̦k jããn kein m̦ae iien inaaj ro̦o̦ltok.’
14 Bõtab armej in aelõñ eo an rar dike, im rar jilkinl̦o̦k jet aer rũkkõnono ñan ippãn bwe ren ba ñane, ‘Kõmij jab kõn̦aan bwe kwõn kiiñ ñan kõm.’
15 “Ãlikin an kar erom kiiñ* im jepl̦aak, ear kũrtok ri-karejar ro ear lel̦o̦k jããn* ñan er bwe en jel̦ã joñan tõprak ko rar kõm̦m̦ani.
16 Ri-karejar eo kein kajuon ear wõnm̦aantak im ba, ‘Irooj, iar koorl̦o̦k mina eo kwaar letok ñan joñoul mina.’
17 Im ear ba ñane, ‘Kwe juon ri-karejar em̦m̦an, elukkuun em̦m̦an men eo kwaar kõm̦m̦ane! Kõnke kwaar tiljek kõn juon men elukkuun dik, kwõnaaj bõk eddon joñoul jikin.’
18 Innem ri-karejar eo kein karuo ear itok im ba, ‘Irooj, iar koorl̦o̦k mina eo kwaar letok ñan l̦alem mina.’
19 Im ear bar ba ñan ri-karejar in im ba, ‘Kwõnaaj bõk eddon l̦alem jikin.’
20 Bõtab bar juon ri-karejar ear itok im ba, ‘Irooj, eñin ej mina eo am̦, iar n̦ooje ilo juon m̦õttan nuknuk.
21 Iar kõm̦m̦ane men in kõn aõ mijak eok, kõnke kwe juon em̦m̦aan nana. Kwõj kaddiwõj jãn jããn ko kwaar jab kadel̦o̦ñi im kwõj m̦adm̦õd jãn men ko kwaar jab kalibwini.’
22 Im ear ba ñane, ‘Kwe juon ri-karejar nana, inaaj kõjerbal naan kan̦e am̦ ñan ekajete eok. El̦aññe kwõj ba bwe ña juon em̦m̦aan nana im ij kaddiwõj jãn jããn ko iar jab kadel̦o̦ñi im m̦adm̦õd jãn men ko iar jab kalibwini,
23 etke kwaar jab likũti jããn* ko aõ ilo im̦õn kakkon̦ jããn? Ñe kwõn kar kõm̦m̦ane men in, innem inãj l̦ak kar ro̦o̦ltok, in kar bũki ippãn orl̦o̦k ko aer.’
24 “Innem ear ba ñan ro rej jutak ijo, ‘Bõk mina n̦e jãn l̦õn̦e im lel̦o̦k ñan ri-karejar eo joñoul an mina.’
25 Bõtab rar ba ñane, ‘Irooj, ewõr kadede joñoul an mina!’
26 Ear uwaak im ba: ‘Ij ba ñan kom̦ bwe jabdewõt eo ewõr an eddo, naaj lel̦o̦k elõñl̦o̦k eddo ko ñane. Bõtab eo ejjel̦o̦k an eddo, meñe enaaj wõr jidik an eddo ak naaj bõk jãne.
27 Bareinwõt, kom̦win bõktok ñan ijin ri-kõjdat ro aõ im rar jab kõn̦aan bwe in kiiñ ñan er, im kom̦win m̦an er ñan mej im̦aan meja.’”
28 Ãlikin an kar ba men kein, ear wõnm̦aanl̦o̦k wõt ilo ial̦ eo an l̦o̦k ñan Jerusalem.
29 Ke ear epaakel̦o̦k Betpeje im Betani ilo tol̦ eo etan Tol̦ Olive, ear jilkinl̦o̦k ruo iaan ri-kal̦oor ro an,
30 im ear ba: “Komiro iwõj ñan bukwõn n̦e im̦aan im ñe komiro tõparl̦o̦k, komiro naaj lo juon koon in donkey em̦õj lukwõje im ejjel̦o̦k en̦ enañin kar uwe ioon. Komiro en jel̦ate im bõktok ñan ijin.
31 Bõtab ñe jabdewõt ej kajjitõk ippemi im ba, ‘Etke komiro ej jel̦ate koon n̦e?’ komiro en ba, ‘Irooj ej aikuji.’”
32 Innem ro ear jilkinl̦o̦k er rar etal im loe koon in donkey eo ãinwõt an kar ba ñan er.
33 Ak ke rej jel̦ate koon eo, armej ro nejier donkey eo rar ba: “Etke komiro ej jel̦ate koon n̦e?”
34 Im rar ba: “Irooj ej aikuji.”
35 Innem rar bõkl̦o̦ke ñan ippãn Jesus, im rar ere ioon kõn kopã ko aer, im Jesus ear uwe ioon.
36 Ke ej ilo̦k, armej ro rar erl̦o̦ki kopã ko aer ioon ial̦ eo.
37 Ilo iien eo ej epaakel̦o̦k ial̦ eo me ej wanlal̦l̦o̦k jãn Tol̦ Olive, juon jarlepju el̦ap in ri-kal̦oor ro an rar jino aer lañlõñ im rar kõl̦l̦aaj ainikieer im nõbar Anij kõn aolep menin bwilõñ ko rar loi.
38 Rar ba: “Ejeraam̦m̦an wõt Kiiñ eo ej itok ilo etan Jeova!* Aenõm̦m̦an ilo lañ, im nõbar en ilo̦k ñan ijo eutiejtata ilañ!”
39 Bõtab jet iaan Parisi ro rej pãd ibwiljin jarlepju eo rar ba: “Ri-Kaki, kwõn kauweiki ri-kal̦oor ran̦e am̦.”
40 Ak ear uwaak im ba: “Ij ba ñan kom̦ bwe el̦aññe renaaj ikõñ, dekã ko renaaj lam̦õj.”
41 Ke ear epaakel̦o̦k Jerusalem, ear kalimjeke im ear jañ
42 im ba: “Yokwe ke kwõn kar jel̦ã rainin kõn men ko renaaj kar lewaj aenõm̦m̦an ñan kwe. Bõtab kiiõ em̦õj n̦ooji bwe kwõn jab loi.
43 Ej itok wõt iien eo ñe ro rej kõjdate eok renaaj kalõk juon wõrwõr ipel̦aakũm̦ kõn al̦al̦ ko rekkañ bõraer, im renaaj kaapool̦ eok im nitbwil* eok jãn aolepen pel̦aakũm̦.
44 Innem renaaj kapedakilkil eok im m̦an ajri ro nejũm̦. Ejjel̦o̦k juon dekã ilo jikin in enaaj pãd ioon bar juon dekã kõnke kwaar jab kõn̦aan jel̦ã kõn iien eo kar etale eok.”
45 Innem ear del̦o̦ñl̦o̦k ilo tampel̦ eo im jino kadiwõjl̦o̦k ri-wiakake ro,
46 im ear ba ñan er: “Jeje ko rej ba, ‘Naaj likũt m̦weo im̦õ bwe en jikin an armej jar,’ bõtab em̦õj ami ukote bwe en im̦õn ri-ko̦o̦t.”
47 Aolep raan ear pãd ilo tampel̦ eo im katakin armej ro. Bũrij ro reutiej im skraib ro im ri-tõl ro an armej ro rar pukot kilen aer m̦ane,
48 ak rar jab maroñ kõnke aolep armej ro rel̦akkar pãd ippãn bwe ren roñjake.
Footnotes
^ Ak “fig-mulberry.”
^ Lale “Nejin armej” ilo Kõmel̦el̦e Ko.
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak “ri-kõm̦akoko.”
^ Juon mina ej tarrin on̦ããn juon ri-jerbal ñe ej jerbal ium̦win 3 allõñ. Mina ej jããn jelba im ej tarrin 100 drachma.
^ Ak “bõk maroñ ioon aelõñ eo.”
^ Kajin Grik, “jelba.”
^ Kajin Grik, “jelba.”
^ Lale “Jeova” ilo Kõmel̦el̦e Ko.
^ Ak “kaeñtaan.”
