Luk 6:1-49
-
Jesus, “Irooj in Jabõt” (1-5)
-
Ear kõmour juon eo emej rãjetin pein (6-11)
-
Rijjilõk ro 12 (12-16)
-
Jesus ej katakin im kõmour armej (17-19)
-
Men ko rej bõktok m̦õn̦õn̦õ im ko rej bõktok jerata (20-26)
-
Yokwe ro rej kõjdate kom̦ (27-36)
-
Bõjrak jãn ami ekajet (37-42)
-
Leen juon wõjke rej kaalikkar kain wõjke rot eo (43-45)
-
M̦weo em̦m̦an kar kalõke; m̦weo kar jab kõm̦m̦an pedpedin (46-49)
6 Juon iien ilo kar raanin Jabõt,* Jesus ear ilo̦k ibul̦õn jikin kallib in wiit ko, im ri-kal̦oor ro an rar ittũm̦ leen wiit im irir kõn peier im m̦õñã.
2 Ke Parisi ro rar lo men in, rar ba: “Etke kom̦ij kõm̦m̦ane men n̦e ke emo̦ kõm̦m̦ane ilo raanin Jabõt?”
3 Ak Jesus ear uwaake er im ba: “Ta kom̦ij jañin kar riit kõn men eo Devid ear kõm̦m̦ane ke e im l̦õm̦aro doon rar kwõle ke?
4 Ear del̦o̦ñl̦o̦k ilo m̦weo im̦õn Anij im kañe bũreet in ajel̦o̦k* ko kar lil̦o̦k ñane, im ear lel̦o̦k jet iaaer ñan l̦õm̦aro doon. Emo̦ an jabdewõt kañi men kein kõnke rej ñan bũrij ro wõt.”
5 Innem ear jiroñl̦o̦k er im ba: “Nejin armej* ej Irooj in Jabõt.”
6 Ilo bar juon jabõt, ear del̦o̦ñl̦o̦k ilo juon im̦õn kabuñ im jino katakin armej ro ie. Ilo ijin, ekar wõr juon em̦m̦aan emej anmoon̦in pein.
7 Innem skraib ro im Parisi ro rar kanooj lale wãween an Jesus m̦akũtkũt bwe ren lale enaaj ke kõmour jabdewõt armej ilo raanin Jabõt kõnke ren kõm̦m̦an ruõn.
8 Bõtab ear jel̦ã l̦õmn̦ak ko aer, kõn men in ear ba ñan em̦m̦aan eo emej rãjetin pein im ba: “Jutak im itok ñan ije iol̦ap.” Innem ear etal im jutak ijo iol̦ap.
9 Im Jesus ear ba ñan er: “In kajjitõk ippemi men in, ta eo emãlim ñan kõm̦m̦ane ilo raanin Jabõt, men ko rem̦m̦an ke ak men ko renana? Emãlim ñan lo̦mo̦o̦ren juon armej ke ak m̦ane?”
10 Ãlikin an kalimjek er aolep, ear ba ñan em̦m̦aan eo: “Kwõn erl̦o̦ke peim̦.” Innem ear erl̦o̦ke pein im ear oktak im bar em̦m̦an.
11 Innem rar kanooj illu im rar jino kõnnaan ippãn doon kõn ta eo remaroñ kõm̦m̦ane ñan Jesus.
12 Juon raan ear etal ñan juon tol̦ bwe en jar, im ear jar ñan Anij aolepen boñõn eo.
13 Im ke ej raan, ear kũrtok ri-kal̦oor ro an im kããlõt 12 iaaer, im ear n̦aetaer rijjilõk.
14 Eñin ej etan rijjilõk ro: Saimõn, eo Jesus ear n̦aetan Piter, im l̦eo jatin* etan Andru, Jemes, Jon, Pilip, Bartolomu,
15 Matu, Tomas, Jemes nejin Alpiõs, Saimõn, eo rej ãñinñini “eo el̦ap an kijejeto,”
16 Judas nejin Jemes, im Judas Iskariõt, eo me tokãlik ear ketake Jesus.
17 Innem rar wanlal̦tak jãn ioon tol̦ eo im ear jutak ilo juon jikin ejepaan wõt juon. Jarlepju in ri-kal̦oor ro an rar pãd ijin, im ear bar wõr juon jarlepju jãn aolepen Judia im Jerusalem im jikin ko ilo Tair im Saidon im jikin ko ipel̦aakier. Armej rein rar itok bwe ren roñjake im bwe en kõmour er jãn nañinmej ko aer.
18 Ear bar kõmour ro jetõb ko rettoon rar mo̦k* n̦a ippãer.
19 Im aolep armej ro rar kõn̦aan uñũri kõnke ñe armej ro rej jibwe, ediwõjl̦o̦k kajoor jãne im kõmour er aolep.
20 Innem ear reilo̦k ñan ri-kal̦oor ro an im ba:
“Em̦õn̦õn̦õ kom̦ ro rejeram̦õl kõnke kom̦ naaj jolõt Aelõñ eo an Anij.*
21 “Em̦õn̦õn̦õ kom̦ ro rej kwõle kiiõ kõnke kom̦ naaj mat.
“Em̦õn̦õn̦õ kom̦ ro rej jañ kiiõ kõnke kom̦ naaj ettõñ.
22 Kom̦win m̦õn̦õn̦õ ñe armej rej dike kom̦, kõjekdo̦o̦n kom̦, kajook kom̦ im kõnanaik etami kõn wõt Nejin armej.
23 Ãindein an kar bar ro jim̦m̦aer kõm̦m̦an ñan ri-kanaan ro. Ilo raan en̦, kom̦win kanooj lañlõñ im m̦õn̦õn̦õ kõnke ewõr ami jeraam̦m̦an el̦ap ilañ.
24 “Bõtab jerata ñan kom̦ ro rem̦weiie kõnke ejjel̦o̦k bar jabdewõt men kom̦ naaj bõke, ede kan̦e ami jeraam̦m̦an.
25 “Jerata ñan kom̦ ro rej mat kiiõ kõnke kom̦ naaj kwõle.
“Jerata ñan kom̦ ro rej ettõñ kiiõ kõnke kom̦ naaj bũrom̦õj im jañ.
26 “Jerata ñan kom̦ ñe armej rej nõbar kom̦, ãindein an kar bar ro jim̦m̦aer kõm̦m̦an ñan ri-kanaan ro reriab.
27 “Bõtab ij ba ñan kom̦ ro rej roñjake: Wõnm̦aanl̦o̦k wõt im yokwe ro rej kõjdate kom̦, kõm̦m̦an em̦m̦an ñan ro rej dike kom̦,
28 kõjeraam̦m̦an ro rej ko̦o̦le kom̦, im jar kõn ro enana aer kõm̦m̦an ñan kom̦.
29 El̦aññe jabdewõt ej jeptake eok, kwõn oktakl̦o̦k ñan ijo turãjet bwe en bar jeptake. Im ñe jabdewõt ej bõk kopã n̦e am̦, kwõn jab dãpiji nuknuk n̦e am̦ jãn an bõke.
30 Ñe ewõr en̦ ej kajjitõk jabdewõt men ippam̦, kwõn lel̦o̦ke. Im ñe ewõr en̦ ear bũki men ko m̦weiõm̦, kwõn jab bar kajjitõki bwe en karo̦o̦liwaj.
31 “Bareinwõt, kom̦win kõm̦m̦an ñan ro jet ilo wãween eo kom̦ kõn̦aan bwe ren kõm̦m̦an ñan kom̦.
32 “El̦aññe kwõj yokwe ro wõt rej yokwe eok, ewõr ke tokjãn en̦ kwõnaaj loe? Rijjerawiwi ro rej bar yokwe ro rej yokwe er.
33 El̦aññe kwõj kõm̦m̦an em̦m̦an ñan ro rej kõm̦m̦an em̦m̦an ñan kwe, ewõr ke tokjãn en̦ kwõnaaj loe? Rijjerawiwi ro rej bar kõm̦m̦ane men in.
34 El̦aññe kwõj kam̦uriiki* jabdewõt armej im kõtmãne bwe ren bar karo̦o̦lwaj, ewõr ke tokjãn en̦ kwõnaaj loe? Rijjerawiwi ro rej bar kam̦uriik rijjerawiwi ro jet im kõtmãne bwe ren bar karo̦o̦ll̦o̦k aolepen m̦uri ko aer.
35 Kom̦win jab ãindein, ak kom̦win wõnm̦aanl̦o̦k wõt im yokwe ro rej kõjdate kom̦, kõm̦m̦an em̦m̦an, kam̦uriik ro jet im jab kõtmãne bwe ren karo̦o̦lwaj jabdewõt. Ilo wãween in, enaaj l̦ap ami jeraam̦m̦an, im kom̦ naaj nejin Eo Eutiejtata, kõnke ej bar kwal̦o̦k jouj ñan ro rejaje kam̦m̦oolol im ro renana.
36 Kom̦win wõnm̦aanl̦o̦k wõt im kwal̦o̦k tũriam̦o ãinwõt an Jememi kwal̦o̦k tũriam̦o.
37 “Bareinwõt, kom̦win bõjrak jãn ami ekajete ro jet bwe Anij en jab ekajete kom̦, im kom̦win bõjrak jãn ami liaakel̦o̦k ro jet bwe Anij en jab liaakel̦o̦k kom̦. Kom̦win wõnm̦aanl̦o̦k wõt im jol̦o̦k an ro jet bõd, im Anij enaaj jol̦o̦k ami bõd.
38 Wõnm̦aanl̦o̦k wõt im lel̦o̦k ñan ro jet, innem renaaj bar lewaj ñan kom̦. Renaaj lutõkwaj ñan lowaan bõjo̦ ko* ami juon joñan ekanooj l̦ap, renaaj kakkon̦kon̦i, jipedi lal̦l̦o̦k im renaaj lutõkl̦o̦k. Joñan eo kom̦ij joñak kake ñan ro jet, eñin joñak eo naaj bar kõjerbale ñan kom̦.”
39 Bareinwõt ear kwal̦o̦k jet waanjoñak ñan er. Ear ba: “Juon ri-pilo emaroñ ke tõl bar juon ri-pilo? Ñe enaaj ãindein, erro jim̦or naaj wõtlo̦k ilowaan juon ro̦ñ.
40 Juon ri-jikuul̦* ejjab utiejl̦o̦k jãn ri-kaki eo an, bõtab jabdewõt eo ejejjet wãween aer kar katakini, enaaj ãinwõt ri-kaki eo an.
41 Innem etke kwõj kalimjek pelo̦k jidikdik eo ilowaan mejãn eo jeim̦ ak jatũm̦ ak kwõjjab l̦õmn̦ak kõn al̦al̦ kileplep n̦e ilowaan mejam̦?
42 Etke kwõnañin maroñ ba ñan jeim̦ ak jatũm̦ im ba, ‘In jol̦o̦k pelo̦k n̦e imejam̦,’ ak kwe make kwõjjab lo al̦al̦ kileplep n̦e ilowaan mejam̦? Kwe ri-etao! Kwõn jol̦o̦k m̦okta al̦al̦ n̦e ekilep ilowaan mejam̦, innem enaaj em̦m̦an am̦ lale im jol̦o̦k pelo̦k eo edik jãn mejãn eo jeim̦ ak jatũm̦.
43 “Juon wõjke em̦m̦an eban kalle leen ko renana, im juon wõjke enana eban kalle leen ko rem̦m̦an.
44 Men ko leen juon wõjke rej kaalikkar kain wõjke rot eo. Ñan waanjoñak, armej rejjab ae fig* jãn mar, im rejjab ae kũreep jãn kãlõklõk ko.
45 Juon armej em̦m̦an ej kõnnaan kõn men ko rem̦m̦an kõnke em̦m̦an bũruon, ak juon armej enana ej kõnnaan kõn men ko renana kõnke enana bũruon. Men ko juon armej ej ba rej itok jãn bũruon.
46 Etke kom̦ij ãñinñin eõ im ba ‘Irooj!’ ak kom̦ij jab pokaki men ko ij ba?
47 Jabdewõt eo ej itok ñan ippa im roñjake naan ko aõ im pokaki, inaaj kwal̦o̦k ñan kom̦ kain armej rot e.
48 Ej ãinwõt juon em̦m̦aan me ear kõn̦aan kalõk juon em̦. Kõn men in, ear kũbwij juon ro̦ñ em̦wilal̦ im kõm̦m̦ane pedpedin m̦weo ioon dekã. Innem ke ej wal̦o̦k juon ibwijleplep, ear ibebtok dãn jãn reba im buñut m̦weo bõtab ear jab em̦m̦akũt kõnke em̦m̦an an kar kalõke.
49 Bõtab, jabdewõt eo ej roñjake naan ko aõ im jab pokaki, ej ãinwõt juon em̦m̦aan me ear kalõk juon em̦ ak ear jab kõm̦m̦an pedpedin. Ke ear ibebtok dãn jãn reba im buñut m̦weo, ekajju okjak im lukkuun jorrããn.”
Footnotes
^ Lale “Jabõt” ilo Kõmel̦el̦e Ko.
^ Lale “Bũreet in ajel̦o̦k” ilo Kõmel̦el̦e Ko.
^ Lale “Nejin armej” ilo Kõmel̦el̦e Ko.
^ Ilo kajin Grik ejjab alikkar wõn eo erũtto iaan Saimõn im Andru.
^ Ak “del̦o̦ñ.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Mel̦el̦ein, kam̦uriiki ak ejjel̦o̦k nejin.
^ Rej nukuj ubõn nuknuk ko aer ñan kõm̦m̦an bwe en bõjo̦, im rekõn kanne jabdewõt men ñe rej itoitak.
^ Ak “ri-kal̦oor.”
^ Etan juon kain leen wõjke.
