Matu 8:1-34
8 Ãlikin wõt an wanlal̦tak jãn ioon tol̦ eo, jarlepju in armej ro rar l̦oore.
2 Im juon ri-lõba ear itok im kwal̦o̦k kautiej* ñane im ba: “Irooj, el̦aññe kokõn̦aan, kwõmaroñ kõm̦m̦an bwe in erreo.”
3 Im Jesus ear lel̦o̦k pein im uñũri em̦m̦aan eo im ba: “Ikõn̦aan! Kwõn erreo.” Im em̦õkaj an jako an em̦m̦aan eo lõba.
4 Innem Jesus eba ñane: “Lale kwaar ba ñan jabdewõt, ak kwõn jãdel̦o̦k ñan ippãn bũrij en̦, innem kwõn lel̦o̦k am̦ menin katok ekkar ñan men ko Moses ear ba, bwe en kein am̦ kam̦ool ñan er.”
5 Ke Jesus ear etal ñan Kaperneum, juon kapen in jarin tarin̦ae ear kepaake im akwel̦ap ñane
6 im ba: “Irooj, eo karejera ej babu wõt ioon kinien ilo m̦weo im̦õ kõnke emej ãnbwinnin, im elukkuun l̦ap an eñtaan.”
7 Im Jesus eba ñane: “Inaaj iwõj im kõmouri.”
8 Im kapen in jarin tarin̦ae eo eba: “Irooj, ña juon eo ejjel̦o̦k tokjãn ñan am̦ jibadektok m̦ween̦ im̦õ. Bõtab kwõn kwal̦o̦k wõt juon naan im eo karejera enaaj mour.
9 Ña ij bar juon eo ej pãd ium̦win maroñ eo an ro reutiejl̦o̦k, im ewõr rũttarin̦ae rej pãd ium̦win maroñ e aõ. Ñe ij jiroñ juon im ba, ‘Etal!’ ej etal, im ñe ij jiroñ bar juon im ba, ‘Itok!’ ej itok. Im ñe ij ba ñan eo karejera* im ba, ‘Kõm̦m̦ane men in!’ ej kõm̦m̦ane.”
10 Ke Jesus ear roñ men kein ear lukkuun bwilõñ, im eba ñan ro rej l̦oore: “Ij ba ñan kom̦ bwe ijjañin kar lo juon armej ilo Israel joñan dein an l̦ap an tõmak.
11 Ij ba ñan kom̦ bwe elõñ renaaj itok jãn ijoko irear im irilik, im jijet ilo tebõl̦ eo ippãn Ebream, Aisak, im Jekob ilo Aelõñin lañ.*
12 Bõtab, naaj jol̦o̦k ro nejin Aelõñ eo inabõj ilo ijo emarok. Eñin ijo renaaj jañ im kij dekein ñier ie.”
13 Innem Jesus eba ñan kapen in jarin tarin̦ae eo: “Kwõn ilo̦k. Kõn am̦ kwal̦o̦k am̦ tõmak, enaaj tõprak kajjitõk n̦e am̦.” Im ri-karejar eo ear mour ilo ejja awa eo wõt.
14 Ke Jesus ear etal im del̦o̦ñl̦o̦k ilo m̦weo im̦õn Piter, ear lo an jinen kõrã eo ippãn Piter babu kõn an piba.
15 Kõn men in, ear uñũr pein im ear jako an piba, im ear jerkak im jino kõm̦m̦an kijen Jesus.
16 Ke ear jotal̦o̦k, armej rar bõktok ro em̦õj an jetõb ko rettoon mo̦k* ilo ãnbwinnier* ñan ippãn Jesus. Innem ear kadiwõjl̦o̦k jetõb ko rettoon jãn armej ro ilo an kõnnaan wõt, im ear kõmour aolep ro renañinmej.
17 Ear kõm̦m̦ane men kein ñan kajejjet kũtien kanaan eo ri-kanaan Aiseia ear kwal̦o̦ke im ba: “Ear bõkl̦o̦k nañinmej ko ad im ineek eñtaan ko ad.”*
18 Ke Jesus ear lo jarlepju eo ej kaapool̦e, ear ba ñan ri-kal̦oor ro an bwe ren em̦m̦akũt ñan iturãjetin lom̦al̦o eo.
19 Im juon iaan skraib ro ear kepaake im ba ñane: “Ri-Kaki, inaaj l̦oor eok jabdewõt jikin kwõj ilo̦k iel̦o̦k.”
20 Bõtab Jesus eba ñane: “Ewõr ro̦ñin an fox* ko jokwe im ewõr an bao ko imejatoto el, ak Nejin armej* ejjel̦o̦k jikin an kõbabuuk bõran.”
21 Im juon iaan ri-kal̦oor ro eba: “Irooj, kwõn kõtl̦o̦k eõ bwe in ilo̦k im kalibwin jema m̦okta.”
22 Jesus ear ba ñane: “Kwõn l̦oor wõt eõ im kõtl̦o̦k bwe ro remej ren kalibwin ri-mej ro aer.”
23 Innem ke Jesus ear uwe ilo juon wa, ri-kal̦oor ro an rar uwel̦o̦k ippãn.
24 Im ke rar pãd ilom̦al̦o, ewal̦o̦k juon l̦añ el̦ap im euwe dãn ilowaan wa eo, bõtab Jesus ear kiki wõt.
25 Im rar ko̦ruji im ba: “Irooj, kwõn lo̦mo̦o̦ren kõj bwe m̦õttan jidik jemej!”
26 Ak ear ba ñan er: “Etke enañin l̦ap ami mijak im dik ami tõmak?” Im ear jerkak im kauwe kõto eo im lo̦jet, im ear lukkuun lur.
27 Ri-kal̦oor ro an rar lukkuun bwilõñ im ba: “Wõn armej in ke meñe kõto im n̦o ak rej bar pokake e?”
28 Ke Jesus ear tõparl̦o̦k ijo jikin ri-Gadara ro ilo turãjetin lom̦al̦o eo, ear iioon ruo em̦m̦aan em̦õj an jetõb ko rettoon mo̦k ilo ãnbwinnier im rar itok jãn ibwiljin lõb* ko. Kõn an l̦õm̦arein lukkuun lãj im kaamijak, ejjel̦o̦k armej eperan in itok ilo ial̦ eo tok.
29 Im rar lam̦õjl̦o̦k ñane im ba: “Nejin Anij, ta n̦e kokõn̦aan jãn kõm? Kwaar itõn kaeñtaan kõm m̦okta jãn an jejjet iien eo ke?”
30 Ilo iien in, ekar lõñ piik rej m̦õñã ilo juon jikin ettol̦o̦k jãn er.
31 Kõn men in, jetõb ettoon ko rar akwel̦ap ñane im ba: “Ñe kwõj kadiwõjl̦o̦k kõm, kwõn jilkinl̦o̦k kõm ñan ilowaan piik kan̦.”
32 Innem eba ñan er: “Etal!” Im rar diwõjl̦o̦k im etal im mo̦k n̦a ippãn piik ko, innem aolep piik ko rar ettõr im wõtlo̦k jãn tõrerein tol̦ eo* ñan lo̦jet im mej.
33 Ak ro rar lale piik ko rar ko ñan bukwõn eo im kwal̦o̦k kõn aolep men ko rar wal̦o̦k, im kõn l̦õm̦aro me jetõb ko rettoon rar mo̦k ilo ãnbwinnier.
34 Kõn men in, aolep armej ro ilo bukwõn eo rar pukotl̦o̦k Jesus, im ke rar loe, rar akwel̦ap ñane bwe en em̦m̦akũt jãn ijo jikier.
Footnotes
^ Ak “buñpedo.”
^ Ak “ri-kõm̦akoko eo aõ.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak “del̦o̦ñ.”
^ Naan eo ilo kajin Grik ej dai·mo·niʹzo·mai, ej jitõñl̦o̦k ñan ro emo̦k enjel̦ ro renana n̦a ippãer.
^ Ak “Ear jol̦o̦k ad nañinmej im eñtaan.”
^ Juon menninmour ãinwõt kidu ilo Israel.
^ Lale “Nejin armej” ilo Kõmel̦el̦e Ko.
^ Kajin Grik, “libõn keememej.”
^ Ak “jirũm̦le eo ilo tol̦ eo.”
