Rom 5:1-21
5 Kiiõ ke em̦õj kõwãnõk kõj kõn wõt tõmak eo ad, jen mour ilo aenõm̦m̦an* ippãn Anij ikijjeen Jesus Christ ad Irooj,
2 eo me ikijjeen ad tõmak ilo e, epel̦l̦o̦k ial̦an ad maroñ bõk jouj eo el̦ap an Anij, eo jej bõke kiiõ. Innem jen lañlõñ* kõn kõjatdikdik eo bwe jenaaj bõk aiboojoj eo ej itok jãn Anij.
3 Ejjab men in wõt, ak jen lañlõñ* ñe jej iioon eñtaan ko kõnke jejel̦ã bwe eñtaan ej kõm̦m̦an bwe jen jel̦ã kijenmej,
4 im kijenmej ej kõm̦m̦an bwe Anij en buñbũruon ippãd, innem men in ej letok kõjatdikdik,
5 im kõjatdikdik in eban tõll̦o̦k kõj ñan bũrom̦õj kõnke em̦õj koobrak bũruod kõn yokwe eo an Anij ikijjeen jetõb kwõjarjar,* eo kar letok ñan kõj.
6 Innem ke jaar m̦õjn̦o̦, Christ ear mej kõn ro rijjerawiwi ilo iien eo ejejjet.
7 Enañin ejjel̦o̦k en̦ ej m̦õn̦õn̦õ in mej kõn juon eo ewãnõk, ak bõlen juon emaroñ m̦õn̦õn̦õ in mej kõn juon eo em̦m̦an.
8 Bõtab Anij ear kwal̦o̦k an yokwe kõj ilo wãween in: Christ ear mej kõn kõj meñe kõj rijjerawiwi.
9 Innem kiiõ ke em̦õj kõwãnõk kõj ikijjeen bõtõktõkin, el̦apl̦o̦k wõt ad tõmak bwe kõn e jenaaj bõk lo̦mo̦o̦r jãn illu eo an Anij.
10 Jaar ri-kõjdat bõtab kiiõ jej bar aenõm̦m̦an ippãn Anij kõn an kar Nejin mej kõn kõj. Ak kiiõ ke emour, enaaj l̦apl̦o̦k wõt ad bõk lo̦mo̦o̦r kõnke em̦õj ad aenõm̦m̦an ippãn Anij.
11 Ejjab men in wõt, ak jej bareinwõt lañlõñ ilo Anij ikijjeen Jesus Christ ad Irooj, eo ear kõm̦m̦an bwe jen bar aenõm̦m̦an ippãn Anij.
12 Eñin unin kõn juon wõt armej, jerawiwi ear del̦o̦ñ ilo lal̦ in im mej ear wal̦o̦k kõn wõt jerawiwi, im mej ear ajeeded ñan aolep armej kõnke er aolep rar jerawiwi—.
13 Jerawiwi ear pãd ilo lal̦ in m̦okta jãn an wal̦o̦k Kien eo, bõtab ejjel̦o̦k juon ej jerawiwi el̦aññe ejjel̦o̦k kien.
14 Meñe ãindein ak mej ear tõl ãinwõt juon kiiñ jãn iien ko an Adam ñan iien ko an Moses, ekoba ioon ro rar jab jerawiwi ilo ejja wãween eo wõt Adam ear jerawiwi. Adam ej ãinwõt armej eo enaaj itok.
15 Menin letok eo an Anij eoktak jãn jerawiwi. Kõn wõt jerawiwi eo an juon armej, elõñ rej mej. Ilo ejja wãween in wõt, kõn wõt jouj eo el̦ap an juon armej, Jesus Christ, elõñ rej bõk jouj eo el̦ap an Anij im menin letok eo an ejjel̦o̦k on̦ããn.
16 Bareinwõt, men ko rej wal̦o̦k jãn menin letok eo an Anij im men ko rej wal̦o̦k jãn wõt jerawiwi in an juon wõt armej reoktak jãn doon. Jerawiwi in an juon armej ear liaakel̦o̦k aolep armej. Bõtab Anij ear letok menin letok eo an kõnke elõñ rar jerawiwi, im ikijjeen men in elõñ rej wãnõk im̦aan mejãn.
17 Kõn wõt jerawiwi eo an juon armej, mej ear tõl ãinwõt juon kiiñ. Bõtab, jouj eo el̦ap an Anij im menin letok eo an ejjel̦o̦k on̦ããn rel̦l̦apl̦o̦k im rem̦m̦anl̦o̦k. Ro renaaj bõk men kein renaaj mour kõn wõt juon armej, Jesus Christ, im renaaj tõl ãinwõt kiiñ!
18 Innem kõn wõt juon jerawiwi, kar liaakel̦o̦k jabdewõt armej, ãindein kõn wõt juon jerbal jim̦we, kar kõwãnõk jabdewõt armej bwe ren mour.
19 Kõn wõt an kar juon armej jab pokake, ear kõm̦m̦an an elõñ armej jerawiwi. Ejja ãindeinl̦o̦k wõt, kõn wõt an juon armej pokake, naaj kõm̦m̦an bwe elõñ armej ren wãnõk.
20 Kiiõ ear wal̦o̦k Kien eo bwe en alikkar an l̦apl̦o̦k jerawiwi,* bõtab el̦ak l̦apl̦o̦k jerawiwi, el̦apl̦o̦k wõt an alikkar jouj eo el̦ap an Anij.
21 Etke ej ãindein? Ãinwõt an kar jerawiwi im mej tõl ãinwõt kiiñ, jouj eo el̦ap an Anij enaaj irooj ilo wãnõk ãinwõt kiiñ bwe en tõl kõj ñan mour indeeo ikijjeen Jesus Christ ad Irooj.
Footnotes
^ Ak emaroñ, “jej mour ilo aenõm̦m̦an.”
^ Ak emaroñ, “jej lañlõñ.”
^ Ak emaroñ, “jej lañlõñ.”
^ Ak “kajoor eo an.” Lale “Jetõb kwõjarjar” ilo Kõmel̦el̦e Ko.
^ Mel̦el̦ein, armej ren kile an lõñ aer jerawiwi.
