Jeova enaaj jol̦o̦k aolep men ko renana me Setan ear kõm̦m̦ani. Em̦õj an Jeova kããlõt Jijej bwe en Kiiñ ak Ri Tõl ñan aolep armej ro ilo lal̦ in. Jijej enaaj kõm̦m̦an bwe lal̦ in en juon pedetaij.​—Daniel 7:13, 14; Jabõn Kõnnaan 2:21.

Jeova ej kallim̦ur bwe:

• ENAAJ KANOOJ LÕÑ M̦ÕÑÃ: “Ãneo [enaaj] jebar leen; Irooj ad Anij [enaaj] kajeraam̦m̦an kõj.” “Ãneo [enaaj] obrak kõn wiit; Keinikkan ko [renaaj] kabwe ioon tol̦ ko.”​—Sam 67:6, UBS; 72:16, UBS.

• EBAN BAR WÕR TARIN̦AE: “Kom̦win iten lo men ko Irooj ear kõm̦m̦ani! Lale menin kabwilõñlõñ ko ear kõm̦m̦ani ioon lal̦! Ej kabõjrak tarin̦ae ko ioon aolepen lal̦.”​—Sam 46:8, 9, UBS.

• ENAAJ EJJEL̦O̦K ARMEJ NANA: “Ro rej kõm̦m̦an nana renaaj jako . . . Bwe jidik wõt iien, im eo enana enaaj jako; aet, kwõnaaj kalimjeke jikin im enaaj ejjel̦o̦k.”​—Sam 37:9, 10.

•  ENAAJ EJJEL̦O̦K NAÑINMEJ, BŨROM̦ÕJ, AK MEJ: “Ro repilo renaaj lol̦o̦kjen̦, im ro rejarroñroñ renaaj roñl̦o̦kjen̦. Ro ri akã renaaj jutak im eb, im ro rejaje kõnnaan renaaj lam̦õj im lañlõñ.”​—Aiseia 35:5, 6, UBS.

  “[Anij] enaaj kõm̦õrãik jãn mejãer dãnnin kõmjaal̦al̦ otemjej, im enaaj ejjel̦o̦k bar mej, im rejamin bar liaajlo̦l̦, ak jañ, ak eñtaan; bwe men ko m̦okta rejako.”​—Revelesõn 21:4.

Jeova ejjab ãinwõt Setan im enjel̦ ro renana kõnke ejjab riab. Aolep men ko ej kallim̦ur kaki renaaj jejjet kitieer. (Luk 1:36, 37, UBS) El̦ap an Jeova yokwe eok im ekõn̦aan bwe kwõn mour ilo Pedetaij. Kõn men in, kwõn kajjioñ tõpar Ri Kõnnaan ro an Jeova bwe kwõn katak im kal̦apl̦o̦k am̦ mel̦el̦e kõn katak ko rem̦ool jãn Baibõl̦ eo. El̦aññe kwõj l̦oori katak ko rem̦ool ilo mour eo am̦, kwõnaaj rõl̦o̦k jãn kabuñ ko reriab im jãn m̦antin anijnij im kajjetõbtõb ko. Im tokãlik, kwõnaaj rõl̦o̦k jãn jerawiwi im mej. Kwõnaaj kam̦oole naan ko an Jijej ke ear ba: “Kom̦ naaj jel̦a m̦ool eo, im m̦ool eo enaaj kanemkwõj kom̦.”​—Jon 8:32, UBS.