Juon em̦m̦aan etan Dauda jãn Africa ear ba: “Iar dik im rũttol̦o̦k ilo juon bukwõn jidikdik. Juon iien, ke iar dik, ear wal̦o̦k juon kõtaan wãto ikõtaan baam̦le eo aõ im bar juon baam̦le. Baam̦le eo aõ ej ba bwe amim bwidej eo, bõtab baam̦le eo juon ej ba bwe aer bwidej eo. Ñan kõm̦adm̦õde apañ eo, rar aikuj ba bwe juon ri uno en itok. Ri uno eo ear lel̦o̦k juon kilaaj ñan bar juon em̦m̦aan, innem ear kalbubuuki em̦m̦aan eo kõn juon ko̦o̦j mouj. Ejjabto, l̦eo ibul̦õn ko̦o̦j eo ear jino wũdiddid im lukkuun menokadu. Ke em̦m̦aan eo ej kalimjek kilaaj eo, ear ba: ‘Juon e l̦al̦l̦ap ej itok! Ej nuknuk mouj. Eaetok im rũtto, im eouwan̦, im eajukuk an etetal.’

“Lukkuun aolepen jim̦m̦a eo ej kõmel̦el̦eiki! Em̦m̦aan eo ear jino wiwijet im ear lam̦õj im ba: ‘Ñe kom̦ij jab tõmak ña, itok im lale bwe kom̦win make loe kõn mejãmi!’ Kõn amim kar bar mijak, ejjel̦o̦k juon iaamim ear etal! Ri uno eo ear kadikl̦o̦k an l̦eo wũdiddid im ellam̦õjm̦õj ilo an kar utdikdiki kõn juon men ear kãreiki kõn bõlõk im aebõj.

“Jim̦m̦a ear ba ñan em̦m̦aan eo bwe amim bwidej eo. Ear ba bwe bũbũ en lale im mour ilo bwidej eo amim im en jab inepata. Baam̦le eo juon ear errã ilo men in. Kiiõ, ejem̦l̦o̦k apañ eo.”

 Eñin ej juon iaan men ko me ekkã aer wal̦o̦k ilo elõñ jikin ko ipel̦aakin lal̦ in. Elõñ milien armej ro rej tõmak bwe ro remej rej mour m̦aanl̦o̦k wõt. Bareinwõt, rej tõmak bwe rein remej remaroñ jipañ, ñe eab ko̦kkure armej ro. M̦ool ke men in? M̦ool ke bwe ro remej rej mour m̦aanl̦o̦k wõt? El̦aññe ejjab, innem wõn ro me rej arin ri mej ro? Elukkuun aorõk bwe kwõn jel̦ã uwaakin kajjitõk kein kõnke mour eo am̦ ej wawa ioon am jel̦ã uwaakier.