Jeova ear kõm̦m̦ane juon jikin kallib ilo juon jikin etan Iden. Ilo jikin kallib in ekar wõr bwijin wũt, wõjke, im menninmour ko ie. Innem Anij ear kõm̦m̦ane em̦m̦aan eo m̦oktata etan Adam. Ear kõm̦m̦ane jãn bwidej im uuki bo̦tin. Kwõjel̦ã ke ta eo ear wal̦o̦k? Em̦m̦aan eo ear mour! Jeova ear lel̦o̦k an Adam jerbal ñan lale jikin kallib eo, im Ear ba ñane bwe en kõm̦m̦an etan aolep menninmour ko.

Jeova ear lel̦o̦k ñan Adam juon kien elukkuun aorõk. Ear ba: ‘Kwõmaroñ m̦õñã jãn aolep kain wõjke ak juon wõt wõjke kwõjjab aikuj m̦õñã jãne. Ñe kwõnaaj m̦õñã jãn leen wõjke en̦, kwõnaaj mej.’

Tokãlik Jeova ear ba: ‘Inaaj kõm̦m̦ane juon an Adam rijjipañ.’ Innem ear kõm̦m̦an bwe Adam en kiki im ettoñ, im ear bõk juon iaan di ko jãn katin Adam im kõm̦m̦ane juon kõrã bwe en pãleen. Etan kar kõrã eo in Iv. Baam̦le  eo an Adam im Iv ej baam̦le eo kar m̦oktata ioon lal̦ in. Kar ta eñjake eo an Adam ke ear lo kõrã eo pãleen? Joñan an kar m̦õn̦õn̦õ, ear ba: ‘Lale m̦õk kõrã in Jeova ear kõm̦m̦ane jãn katũ! Kiiõ ej kab naaj wõr m̦õtta!’

Jeova ear ba ñan Adam im Iv bwe erro en neji im koobrak aolepen lal̦ in kõn armej. Ear kõn̦aan bwe erro en m̦õn̦õn̦õ ilo aerro jerbal ippãn doon im kõm̦m̦an bwe aolepen lal̦ in en juon pedetaij ak juon jikin elukkuun aiboojoj, ãinwõt jikin kallib Iden. Ak erro kar jab maroñ kajejjete men in. Etke? Eokwe jenaaj lale ilo jebta eo tok juon.