Jon, nejin Zekaraia im Elisabet, ear juon rũkanaan ke ear rũtto. Jeova ear kõjerbale bwe en katakin armej ro kõn itok eo an Messaia eo. Ijo ear katakin armej ro ie kar ilo ãne jem̦aden im ejjab ilo im̦õn kabuñ ko im bukwõn ko. Armej ro rar itok jãn Jerusalem im aolepen jikin ko ilo Judia bwe ren roñjake naanin katak ko an. Ear katakin er kõn men ko rej aikuj bõjrak jãn aer kõm̦m̦ani bwe ren maroñ kabuñbũruon Anij. Ãlikin aer kar roñjake, elõñ iaaer rar oktak im ukel̦o̦k jãn men ko renana rar kõm̦m̦ani, innem Jon ear peptaiji er ilo Reba Jordan.

Ear jab lukkuun lõñ men ko m̦weien Jon. Nuknuk ko an kar kõm̦m̦an jãn kilin kamel̦ im ekkã an kar m̦õñã l̦okõj im honey. Elõñ armej rar kõn̦aan jel̦ã kõn Jon. Joñan, Parisi ro im Saddusi ro eutiej bũrueer rar itok ñan ippãn. Im Jon ear ba ñan er: ‘Kom̦win kaalikkar ami oktak jãn jerawiwi ko ami. Im jab l̦õmn̦ak bwe el̦ap ami aorõk kõn ami ba bwe kom̦ij ro nejin Ebream. Ilo m̦ool, men in ejjab kaalikkar bwe kom̦ij ro nejin Anij.’

Elõñ rar itok ñan ippãn Jon im kajjitõk: ‘Ta eo kõmij aikuj kõm̦m̦ane ñan kabuñbũruon Anij?’ Jon ear ba ñan er: ‘El̦aññe ewõr ruo am̦ nuknuk, kwõn aje juon iaaer ñan armej eo enaaj aikuji.’ Kwõjel̦ã ke etke ear ba naan kein? Jon ear kõn̦aan bwe rũkal̦oor ro an ren jel̦ã bwe ñan aer kabuñbũruon Anij, rej aikuj kwal̦o̦k aer yokwe armej ro.

Jon ear ba ñan rũtõltõl owõj ro: ‘Kom̦win m̦ool ilo ami jerbal im jab ko̦o̦te armej.’ Im ear ba ñan rũttarin̦ae ro: ‘Jab bõk men ko armej rej liwaji ñan wiaik bũruomi im kom̦win jab ba naan ko reriab.’

 Bareinwõt, ekar wõr bũrij im RiLivai ro rar itok ñan ippãn Jon. Im rar kajjitõk ippãn: ‘Wõn kwe? Enañin aolep rekõn̦aan jel̦ã.’ Jon ear ba: ‘Ña ainikien juon eo ej lam̦õj ilo ãne jem̦aden im tõl armej ro ñan ippãn Jeova ãinwõt an kar Aiseia kanaan kake.’

Ear em̦m̦an ippãn armej ro katak ko Jon ear katakin er kaki. Joñan elõñ iaaer rar l̦õmn̦ak bwe Jon ej Messaia eo. Ak ear jiroñ er im ba: ‘Ewõr juon eo el̦apl̦o̦k jãn ña ej itok wõt. Ijekkar ñan aõ naaj jillo̦k in tũm̦wi toin juuj ko an. Ij peptaiji armej kõn dãn, ak enaaj peptaiji kom̦ kõn jetõb kwõjarjar.’