Ewõr juon em̦m̦aan me ejaje etetal im ekõn jijet im owar aolep raan ilo kõjãmin tampel̦ eo. Juon raelep, ear reilo̦k im lo an Piter im Jon itõn del̦o̦ñe tampel̦ eo. Innem ear ba ñan er: ‘Jouj im jipañ eõ.’ Im Piter ear ba ñane: ‘Ewõr juon men em̦m̦anl̦o̦k jãn jããn me inaaj lewaj ñan eok. Ilo etan Jesus, kwõn jutak im etetal!’ Piter ear jipañe bwe en jutak, im em̦m̦aan eo ear jino etetal! Armej ro rar lukkuun m̦õn̦õn̦õ ke rar loe menin bwilõñ in, joñan elõñl̦o̦k rar erom rũttõmak.

Ak bũrij im Saddusi ro rar lukkuun illu kõn men in. Rar jibwe im bõkl̦o̦k rijjilõk ro ruo ñan im̦õn ekajet eo, im rar ba: ‘Wõn ear lewaj maroñ bwe kom̦win kõmour em̦m̦aan in?’ Im Piter ear ba: ‘Kõmar bõk kajoor im maroñ jãn Jesus Christ, eo kom̦ar m̦ane.’ Innem rũtõlin kabuñ ro rar bũroñ erro im ba: ‘Kom̦win bõjrak jãn ami kõnnaan kõn Jesus!’ Ak erro kar ba: ‘Kõmij aikuj kwal̦o̦k kõn e. Eban bõjrak ammim kõnono kake e.’

M̦õjin wõt aer kar kõtl̦o̦k Piter im Jon, erro kar etal ñan ippãn rũkal̦oor ro jet im kwal̦o̦k ñan er kõn men ko rar wal̦o̦k. Innem rar jar ippãn doon im kajjitõk ippãn Jeova: ‘Jouj im kaperan kõm bwe kõmin maroñ wõnm̦aanl̦o̦k wõt im kõm̦m̦ane jerbal eo am̦.’ Innem Jeova ear lel̦o̦k jetõb kwõjarjar eo an, im rar wõnm̦aanl̦o̦k wõt im kwal̦o̦k naan im kõmour armej ro. Kõn men in, ear lõñl̦o̦k armej ro me rar erom rũttõmak. Joñan an kar Saddusi ro lukkuun ebbanban, rar jibwe im bõk rijjilõk ro im likũt er ilo kalbuuj. Ak ilo jo̦teen eo, Jeova ear jilkinl̦o̦k juon enjel̦ im ear kõpel̦l̦o̦k kõjãmin jikin kalbuuj eo. Im ear ba ñan rijjilõk ro: ‘Kom̦win bar jepl̦aak ñan tampel̦ eo, im katakin armej ro ijo.’

Ilo jibboñõn raan eo tok juon, rijerbal ro rar ba ñan ro uwaan jikin ekajet eo an RiJu ro im ba: ‘Jikin kalbuuj en̦ el̦ak, ak ejako em̦m̦aan ro kom̦ar kalbuuji er.’ Innem bar juon ear ba: ‘Erran̦ ilo tampel̦ en̦ rej katakin armej ran̦!’ Kõn men in, rar bar jibwe im bõkl̦o̦k rijjilõk ro ñan jikin  ekajet eo. Bũrij l̦apl̦ap eo ear ba ñan er: ‘Kõmar jiroñ kom̦ bwe kom̦win jab kwal̦o̦k kõn Jesus!’ Ak Piter ear ba: “Kõmij aikuj pokake Anij im jab armej.”

Rũtõlin kabuñ ro rar lukkuun illu, im rar kõn̦aan bwe rijjilõk ro ren mej. Ak juon Parisi etan Gameliel ear jutak im ba: ‘Kom̦win kõjparok! Bõlen Anij ej pãd ippãn armej rein. Kom̦ kõn̦aan jum̦aik Anij ke?’ Kõn men in, rar roñjake naan kein an im jab bõk mour ko an rijjilõk ro. Ak rar deñl̦o̦ke er im bar jiroñ er bwe ren jab bar kwal̦o̦k naan, innem rar kõtl̦o̦k er. Ak men in ear jab kabõjrak rijjilõk ro. Ilo peran, rar wõnm̦aanl̦o̦k wõt im kwal̦o̦k kõn nuuj eo em̦m̦an ilo tampel̦ eo im bareinwõt jãn em̦ ñan em̦.