Saul, eo ear l̦otak ilo Tarsus, kar juon RiRom. Ear juon Parisi me ear lukkuun jel̦ã kõn kien ko an RiJu ro, im ear dike Kũrjin ro. Joñan, ear kadiwõj nabõjl̦o̦k Kũrjin em̦m̦aan im kõrã ro jãn m̦õko im̦weer im bõkl̦o̦k er ñan jikin kalbuuj eo. Ewõr bar juon iien ear jutak wõt im lale an juon kumi in armej rellãj kade rũkal̦oor eo etan Stipen ñan mej.

Ak Saul ear jab kõn̦aan wõt kalbuuji Kũrjin ro ilo Jerusalem. Joñan, ear kajjitõk ippãn bũrij l̦apl̦ap eo ñe emaroñ etal ñan Damaskõs bwe en pukote Kũrjin ro jet ijo. Ke Saul ear pãd epaake jikin in, juon meram ear romel̦o̦k, im ear okjak im pãd lal̦. Ear roñ juon ainikien ej ba: ‘Saul, etke kwõj kaeñtaane eõ?’ Saul ear kajjitõk ippãn: ‘Wõn kwe?’ Im ainikien eo ear uwaak im ba: ‘Ña Jesus. Kwõn etal ñan Damaskõs im kwõnaaj jel̦ã ta eo kwõj aikuj kõm̦m̦ane.’ Ilo iien eo wõt, Saul ear pilo im ro jet rar aikuj jibwe pein im ãñinl̦o̦ke ñan Damaskõs.

Ilo ijin, ear wõr juon Kũrjin etiljek etan in Anenaiõs. Jesus ear ba ñane ilo juon pijen: ‘Kwõn ilo̦k ñan m̦weo im̦õn Judas ilo ial̦ eo etan Jim̦we, im pukote Saul.’ Ak Anenaiõs ear ba: ‘Irooj, iar roñ elõñ men ko renana kõn armej n̦e! E eo ej pukot im kalbuuji rũkal̦oor ro am̦!’ Jesus ear ba: ‘Kwõn etal ñan ippãn. Em̦õj aõ kããlõt Saul bwe en kab kwal̦o̦k kõn nuuj eo em̦m̦an ilo elõñ aelõñ ko.’

Kõn men in, Anenaiõs ear etal ñan ippãn Saul im ear ba ñane: ‘Saul jatũ, Jesus ear jilkintok eõ bwe kwõn bar maroñ lo l̦o̦k im̦aan.’ Ilo iien eo wõt, ear jako an Saul pilo. Ear katak kõn Jesus innem erom juon iaan rũkal̦oor ro an. Ãlikin an kar peptaij im erom juon Kũrjin, Saul ear jino kwal̦o̦k naan ippãn Kũrjin ro jet m̦õttan ilo im̦õn kabuñ ko an RiJu ro. Kwõmaroñ ke  pijaikl̦o̦k an kar RiJu ro lukkuun bwilõñ ke rej lo an Saul katakin armej ro kõn Jesus? Rar ba: ‘Ejjab ke armej eo in ekõn pukot rũkal̦oor ro an Jesus im kalbuuji er?’

Ium̦win jilu iiõ, Saul ear kwal̦o̦k naan ñan armej ro ilo Damaskõs. Bõtab RiJu ro rar dike Saul im rar pepe ñan aer m̦ane. Ak rũkal̦oor ro jet rar roñ kõn men in, im rar jipañ Saul bwe en ko jãn jikin in. Rar likũti ilo juon iep im karũm̦l̦o̦ke im lelal̦l̦o̦k ilo juon ro̦ñ ilo wõrwõrin jikin eo.

Ke Saul ear etal ñan Jerusalem, ear kajjioñ kobal̦o̦k ippãn rũttõmak ro jein im jatin. Bõtab rein rar lukkuun mijake. Ak juon rũkal̦oor etan Barnebas me elukkuun jouj, ear ãñinl̦o̦k Saul ñan ippãn rijjilõk ro im kam̦ool ñan er bwe em̦õj an Saul lukkuun oktak. Innem Saul ear jino kijejeto ilo an kwal̦o̦k kõn nuuj eo em̦m̦an ippãn eklejia eo ilo Jerusalem. Tokãlik, ãt eo etan ear oktak ñan Paul.