Naanin Ijjino ko ñan Jebta 3
Ilo iiõ ko ãlikin Ibwijleplep eo, Baibõl̦ ej kwal̦o̦k kõn jejjo wõt iaan armej ro me rar karejar ñan Jeova. Juon iaan rein ej Ebream, eo im kar n̦aetan jeran Jeova. Etke kar n̦aetan, jeran Jeova? El̦aññe ewõr nejũm̦ ajri, jipañe ñan mel̦el̦e bwe Jeova ej kaorõke im ekõn̦aan jipañe. Ãinwõt kar Ebream, Lot, Jekob, im rũkarejar ro jet retiljek, jemaroñ jar im kajjitõk jipañ jãn Jeova jabdewõt iien. Jemaroñ lõke bwe Jeova enaaj kajejjet aolep kallim̦ur ko an.
ILO JEBTA IN
KATAK 7
M̦weo Eutiej ilo Bebel
Jet armej rar pepe ñan kalõk juon jikin kweilo̦k im juon em̦ utiej ñan ñe etõpar lañ. Etke Jeova ear kajju kõm̦m̦an bwe ren kõnono kajin ko reoktak jãn doon?
KATAK 8
Ebream im Sera Rar Pokake Anij
Etke Ebream im Sera rar ilo̦k jãn jikin kweilo̦k eo ñan mour ãinwõt riitoitak ro ilo ãneen Kenan?
KATAK 9
Ej Kab Wõr Juon Nejin L̦addik!
Enaaj kar ewi wãween an jejjet kallim̦ur eo an Anij ñan Ebream? Wõn iaan l̦adik ro nejin Ebream enaaj kar kajejjet men in—Aisak ke ak Ishmael?
KATAK 10
Keememej Lio Pãleen Lot
Anij ear ko̦wõtlo̦k kijeek ioon Sodom im Gomorra. Etke ear jorrããn jikin kein ruo? Etke jej aikuj keememej men eo ear wal̦o̦k ñan lio pãleen Lot?
KATAK 11
Kar Mãlejjoñe Tõmak eo an Ebream
Anij ear ba ñan Ebream: ‘Jouj im bõk l̦adik n̦e ej make wõt nejũm̦, im katok kake ãinwõt juon menin katok ilo tol̦ eo ej pãd ilo jikin eo etan Moraia.’ Ta eo Ebream enaaj kar kõm̦m̦ane ke kar kajjitõk ippãn ñan kõm̦m̦ane men in? Im ta eo men in enaaj kar kaalikkar kõn tõmak eo an?
KATAK 12
Jekob Ear Bõke Menin Jolõt Eo
Ear wõr nejin Aisak im Rebeka po l̦addik im etaerro in Iso im Jekob. Kõnke Iso ear l̦otak m̦okta, e eo enaaj kar bõk menin jolõt eo. Etke ear ajel̦o̦k menin jolõt in an kõn juon bowl in juub?
KATAK 13
Jekob im Iso Rej Kõm̦m̦an Aenõm̦m̦an
Ewi wãween an kar Jekob maroñ kõm̦m̦an bwe juon enjel̦ en kajeraam̦m̦ane? Im ewi wãween an kar kõm̦m̦an aenõm̦m̦an ippãn Iso?
