Ekar wõr juon em̦m̦aan me ear karejar ñan Jeova im ear jokwe ilo juon jikin etan Uz. Etan em̦m̦aan in ej Job. Ear juon rũm̦weiie im ear lõñ nejin ajri. Ear juon eo ejouj, im ear jipañ ro rejerata, ekoba kõrã ro emej l̦õm̦aro pãleer im ajri ro emej jineer im jemãer. Innem kõnke Job ear kõm̦m̦ani men ko rem̦m̦an, mel̦el̦ein ke bwe eban wal̦o̦k jabdewõt apañ ilo mour eo an?

Setan Tepil̦ ear lale ta ko Job ej kõm̦m̦ani ilo mour eo an, ak Job ear jab jel̦ã kõn men in. Jeova ear ba ñan Setan: ‘Kwaar lo ke karejera Job? Ejjel̦o̦k juon armej ioon lal̦ ãinwõt e. Ej pokake ña im kõm̦m̦ani men ko rem̦m̦an.’ Setan ear ba: ‘Ewõr unin an Job ãindein. Ej pokake eok kõnke kwõj kõjparoke im kõjeraam̦m̦ane. Kwõj lel̦o̦k an wãto im elõñ nejin menninmour. Ak ñe kwõnaaj bũki aolep men kein jãne, enaaj bõjrak jãn an karejar ñan kwe.’ Innem Jeova ear ba: ‘Eokwe am̦ wõt pepe ta ko kokõn̦aan kõm̦m̦ani ñan mãlejjoñe. Ak kwõn jab bõk mour en̦ an.’ Etke Jeova ear kõtl̦o̦k bwe Setan en mãlejjoñe Job? Kõnke Jeova ear tõmak bwe Job enaaj dãpij wõt an tiljek ñane.

Setan ear jino mãlejjoñe Job ilo an kõm̦m̦an bwe en wal̦o̦k elõñ jorrããn im apañ ko ñane. M̦okta ear jilkinl̦o̦k jet armej me kar n̦aetaer RiSebia bwe ren ko̦o̦ti kau im donkey ko nejin. Innem juon kijeek jãn lañ ear tũli im ko̦kkure aolep jiip ko nejin. Bareinwõt, jet armej jãn Kaldia rar ko̦o̦ti kamel̦ ko nejin. Innem aolep rijerbal ro me rar lale menninmour ko nejin Job, rar mej. Ãlikin wõt men kein, ear bar wal̦o̦k juon jorrããn el̦apl̦o̦k an nana. Aolep ajri ro nejin Job rar mej ke m̦weo rar m̦õñã ie ear okjak im ure er. Job ear lukkuun bũrom̦õj kõn aolep men kein rar wal̦o̦k ñane, ak ear jab bõjrak jãn an karejar ñan Jeova.

Setan ear kõn̦aan bwe en l̦apl̦o̦k wõt an Job eñtaan,  kõn men in ear kõm̦m̦an bwe en eddek wõt ilo aolepen ãnbwinnin. Men in ear kõm̦m̦an an lukkuun eñtaan. Job ear jab jel̦ã etke ear wal̦o̦k aolep men kein ñane. Bõtab ear jab bõjrak jãn an karejar ñan Jeova. Jeova ear loi aolep men kein, im ear lukkuun buñbũruon kõn Job.

Tokãlik, Setan ear jilkinl̦o̦k jilu em̦m̦aan ñan ippãn Job bwe ren mãlejjoñe. Rar ba ñan e: ‘Bõlen kwaar jerawiwi im kwõj kajjioñ in n̦ooje. Kiiõ Anij ej kajeik eok.’ Job ear ba: ‘Ejjel̦o̦k men en̦ enana iar kõm̦m̦ane.’ Ak Job ear oktak im jino l̦õmn̦ak bwe Jeova eo ej kõm̦m̦an bwe en wal̦o̦k apañ kein ñane. Kõn men in, ear n̦aruon Anij im ba bwe ejjab jim̦we wãween an kõm̦m̦an ñane.

Bar juon em̦m̦aan edikl̦o̦k etan in Ilaihu ear pãd iturier im roñjake aer kõnnaan. Innem ear jino kõnnaan ñan er im ba: ‘Aolep naan ko ami rebõd. Jeova el̦ap an utiej im jejjab maroñ lukkuun mel̦el̦e kõn utiej eo an. Eban kõm̦m̦ani men ko renana. Ejel̦ã kõn aolep men, im ej jipañ ro rej iioon apañ.’

Innem Jeova ear kõnnaan ippãn Job im ba: ‘Kwaar pãd ke ilo iien eo iar kõm̦anm̦an lañ im lal̦? Etke kwõj n̦aruõ im ba bwe ejjab jim̦we aõ kõm̦m̦an ñan kwe? Kwõj kõnnaan, ak kwõjjab jel̦ã unin an men kein wal̦o̦k.’ Innem Job ear kile bwe ear bõd im ear ba: ‘Ña eo ibõd. Iar jel̦ã wõt men ko iar roñ kõn kwe, ak kiiõ em̦õj aõ lukkuun jel̦ã kõn kwe. Ejjel̦o̦k juon men kwõbane. Jol̦o̦k aõ bõd kõn naan ko iar ba.’

Ke ear jem̦l̦o̦k an Setan mãlejjoñe Job, Jeova ear kõm̦m̦an bwe Job en bar ãjmour im el̦apl̦o̦k an kar kõjeraam̦m̦ane jãn m̦okta. Ear aetok an Job mour im ear m̦õn̦õn̦õ. Jeova ear kõjeraam̦m̦ane kõnke ear pokake e meñe ear iiooni apañ ko. Kwõnaaj ke anõke Job im karejar wõt ñan Jeova jekdo̦o̦n ta apañ ko renaaj wal̦o̦k ñan kwe?