Ke Moses ear pãd ioon Tol̦ Sainai, Jeova ear jiroñe bwe en kalõke juon em̦ nuknuk, rej n̦aetan im̦õn kõppãd, bwe RiIsrael ro ren kõjerbale ñan aer kabuñ ñan E. Enaaj pidodo aer mejal̦e im̦õn kõppãd in ilo aer em̦m̦akũt im etal jãn jikin ñan jikin.

Jeova ear ba: ‘Kwõn kõnnaan ñan armej ro im ba bwe ren bũktoki men ko jenaaj aikuji ñan kalõke im̦õn kõppãd in ekkar ñan joñan aer maroñ.’ Kõn men in, RiIsrael ro rar bõkl̦o̦k gold, jelba, dekã ko raorõk, im men ko jet ãinwõt m̦arm̦ar, dede, im riiñ. Rar bar bõkl̦o̦k kilin menninmour, kool̦an jiip, m̦õttan ko remãni, im elõñ men ko jet. Joñan an lõñ men ko rar bũkil̦o̦k, Moses ear aikuj jiroñ er im ba: ‘Ebwe aolep men ko jej aikuji kiiõ! Jouj im jab bar ebbõktok jabdewõt.’

Elõñ em̦m̦aan im kõrã ro rekapeel rar jipañ kalõke im̦õn kõppãd eo. Jeova ear lel̦o̦k mãlõtlõt ñan er bwe ren jel̦ã kõm̦m̦ani jerbal ko aer. Jet rar kõm̦m̦an tõreej, im bar jet rar jel̦ã kilen ãj. Ro jet rar jel̦ã kilen jerbal kõn dekã ko raorõk im kõm̦m̦an jet men ko jãn gold. Bar jet rar jel̦ã kõm̦m̦an amim̦õn̦o ko jãn wõjke.

Armej ro rar kalõk im̦õn kõppãd eo ilo wãween eo Jeova ear jiroñ er bwe ren kalõke. Rar kiiji juon katiiñ eaiboojoj im totoiki bwe en wõr ruo ruum̦ ilowaan im̦õn kõppãd eo. Rar n̦aetan ruum̦ kein Jikin Kwõjarjar im Jikin Kwõjarjar Otem Kwõjarjar. Ilowaan Jikin Kwõjarjar Otem Kwõjarjar, ear pãd tõptõp in bujen eo ie me kar kõm̦m̦ane jãn juon kain wõjke im gold. Ilowaan Jikin Kwõjarjar, ear wõr juon jurõn l̦aam̦ kõm̦m̦an jãn gold, juon tebõl̦, im juon lokatok ñan tũli kein  kaijurjur ko. Innem ilo mel̦an in im̦õn kõppãd in, ear wõr juon pejin ak nien dãn im juon lokatok ekilep. Tõptõp in bujen eo ear kakeememej RiIsrael ro kõn kallim̦ur eo aer ñan pokake Jeova. Kwõjel̦ã ke ta mel̦el̦ein naan in bujen? Naan in bujen ej mel̦el̦ein juon kallim̦ur me elukkuun aorõk.

Jeova ear kããlõt Aron im l̦õm̦aro nejin bwe ren bũrij ilo im̦õn kõppãd eo. Rar aikuj kõjparoke im lale, im ajel̦o̦k menin katok ko ñan Jeova ijin. Kõnke kar kããlõt Aron bwe en bũrij l̦apl̦ap, e wõt ear maroñ del̦o̦ñ ñan ilowaan Jikin eo Eokkwõjarjar Otem Kwõjarjar. Ear kõm̦m̦ane men in juon kõttan ilo juon iiõ ilo iien eo ej ajel̦o̦k juon menin katok ñan jeorl̦o̦k jerawiwi ko an make, an baam̦le eo an, ekoba jerawiwi ko an aolep RiIsrael ro.

Juon iiõ ãlikin an kar RiIsrael ro diwõjl̦o̦k jãn Ijipt, ear dedel̦o̦k aer kalõk im̦õn kõppãd eo. Kiiõ ear wõr juon jikin aer kabuñ ñan Jeova.

Jeova ear kwal̦o̦k an m̦õn̦õn̦õ kõn im̦õn kõppãd in im ear likũt juon kõdo̦ ilõñin. Ke kõdo̦ in ear pãdwõt ioon m̦wiin, RiIsrael ro rar jab em̦m̦akũt ñan bar juon jikin. Ak ñe kõdo̦ in ear em̦m̦akũt, men in ear kaalikkar ñan er bwe eiien aer jino bar em̦m̦akũt. Innem rar aikuj bar mejal̦e im̦õn kõppãd eo im l̦oore l̦o̦k kõdo̦ eo.