Tokãlik, RiIsrael ro rar bar bõjrak jãn aer kabuñ ñan Jeova im jino kabuñ ñan anij ko rewaan. Ium̦win kar 7 iiõ in an RiMidian ro ko̦o̦ti menninmour ko nejin RiIsrael ro im ko̦kkure keinikkan ko aer. RiIsrael ro rekõn ko im kũttiliek jãn RiMidian ro ilowaan ro̦ñ ko im ilo tol̦ ko. Rar akwel̦ap ñan Jeova bwe en lo̦mo̦o̦ren er. Kõn men in, Jeova ear jilkinl̦o̦k juon enjel̦ ñan ippãn juon em̦m̦aan etan Gideon. Enjel̦ in ear ba ñane: ‘Jeova ej kããlõt eok bwe kwõn juon rũttarin̦ae eo ekajoor im peran.’ Gideon ear uwaake im ba: ‘Ewi wãween aõ naaj lo̦mo̦o̦ren RiIsrael ro? Ña juon armej ettã im ejej tokjãn.’

Ewi wãween an kar Gideon maroñ jel̦ã bwe Jeova ear kããlõte? Gideon ear bõk juon m̦õttan nuknuk kõm̦m̦an jãn kool̦an jiip im ear likũti lal̦. Ear ba ñan Jeova: ‘Ilju jibboñ, ñe m̦õttan nuknuk in etutu kõn an m̦õl̦awi, ak bwidej eo em̦õrã, inaaj jel̦ã bwe kokõn̦aan bwe in lo̦mo̦o̦ren RiIsrael ro.’ Ilo jibboñõn raan eo tok juon, m̦õttan nuknuk in ear tutu, ak bwidej eo ear m̦õrã! Innem Gideon ear bar kajjitõk ippãn Jeova bwe ilo jibboñõn raan eo tok juon, en kõm̦m̦an bwe m̦õttan nuknuk in en m̦õrã, ak bwidej eo en tutu. Ke ear wal̦o̦k men in, Gideon ej kab kiiõ tõmak bwe Jeova ear kããlõte.  Innem ear kobaik aolep rũttarin̦ae ro an bwe ren etal im tarin̦aeik RiMidian ro.

Jeova ear ba ñan Gideon: ‘Inaaj kõm̦m̦an bwe RiIsrael ro ren bõk anjo̦, ak elukkuun lõñ ami rũttarin̦ae. Bõlen kom̦ naaj l̦õmn̦ak bwe kom̦ eo make kom̦ij kõm̦m̦an ami anjo̦. Kwõn ba ñan jabdewõt eo ej mijak bwe en ro̦o̦l.’ Innem tarrin 22,000 rũttarin̦ae ro rar ro̦o̦l, ak 10,000 rar pãdwõt. Ak Jeova ear ba: ‘Ej lõñ wõt ami rũttarin̦ae. Bõkl̦o̦k er ñan reba eo, im ba bwe ren idaak jãne. Kwõn kab bõk wõt em̦m̦aan ro renaaj kwal̦o̦k aer ekkõl kõn rũkõjdat ro aer ilo iien eo rej idaak.’ Innem tarrin 300 wõt iaan em̦m̦aan ro rar kõm̦m̦ane men in. Jeova ear kallim̦ur bwe meñe em̦m̦aan rein reiet ak renaaj bõk anjo̦ ioon 135,000 rũttarin̦ae ro an Midian.

Ilo boñõn eo wõt, Jeova ear ba ñan Gideon: ‘Eiien kiiõ ami tarin̦aeik RiMidian ran̦!’ Gideon ear lel̦o̦k ñan em̦m̦aan ro ippãn jilel im bato ko rekkillep me ewõr kijeek ilowaaer. Ear ba ñan er: ‘Kom̦win kab kalimjek eõ im kõm̦m̦ane ejja men eo wõt inaaj kõm̦m̦ane.’ Innem Gideon ear uuk jilel eo an, rupe bato eo ippãn, im bõk al̦al̦ in kijeek eo im kõjjaal̦al̦e, im ear lam̦õj im ba: ‘Jãje eo an Jeova im an Gideon!’ Aolep em̦m̦aan ro 300 ippãn rar bar kõm̦m̦ani ejja men ko wõt ear kõm̦m̦ani. RiMidian ro rar lukkuun pok im wiwijet im rar aolep ettõrto ettõrtak im jino m̦an doon. Bar juon alen an RiIsrael ro bar anjo̦ ioon rũkõjdat ro aer kõnke Jeova eo ear jipañ er.