Ewõr juon kar em̦m̦aan in Israel etan Elkena. Ear wõr ruo pãleen kõrã, etaer in Hanna im Penina, ak el̦apl̦o̦k an kar Elkena yokwe Hanna. Aolep iien Penina ear kajjirere kake Hanna kõnke Hanna ear jab maroñ neje, ak Penina ear maroñ lõñ nejin. Kajjojo iiõ Elkena ekõn bõkl̦o̦k baam̦le in an ñan im̦õn kõppãd eo ilo Shailo bwe ren kabuñ ie. Juon iien ke rar pãd ijin, Elkena ear kile bwe Hanna ear lukkuun bũrom̦õj. Innem ear ba ñane: ‘Hanna, jouj im jab jañ. El̦ap aõ yokwe eok. Kwõn m̦õn̦õn̦õ bwe ña ij pãd ippam̦.’

Tokãlik, Hanna ear makel̦o̦k iaan im etal bwe en jar. El̦ap an jañ ke ej akwel̦ap im kajjitõk ippãn Jeova bwe en jipañe. Ear kallim̦ur ñan Jeova im ba: ‘Jeova, el̦aññe kwõnaaj letok juon nejũ l̦addik, inaaj lewaje ñan eok, im enaaj karejar ñan eok toon wõt an mour.’

Bũrij L̦apl̦ap eo etan Ilai ear loe an Hanna jañ, im ear l̦õmn̦ak bwe ekadek. Ak Hanna ear ba ñane: ‘Ejjab, ijjab kadek. Ewõr juon men ij lukkuun inepata kake, im ij jar kake ñan Jeova.’ Kiiõ Ilai ej kab kile bwe ebõd l̦õmn̦ak eo an, im ear ba ñan Hanna: ‘Anij en lewaj ñan eok men eo kokõn̦aan.’ Ear jako an Hanna inepata im ear ro̦o̦l. Tokãlik, ear wõr  juon nejin l̦addik im ear likũt etan Samuel. Kwõmaroñ ke pijaikl̦o̦k an kar Hanna lukkuun m̦õn̦õn̦õ ilo iien in?

Hanna ear jab mel̦o̦kl̦o̦ke kallim̦ur eo an ñan Jeova. Ke ear rũttol̦o̦k jidik Samuel, Hanna ear bõkl̦o̦ke ñan im̦õn kõppãd eo bwe en jerbal ie. Ear ba ñan Ilai: ‘Eñin l̦adik eo iar jar im kajjitõk kake. Ij ajel̦o̦k e ñan Jeova bwe en karejar ñane toon wõt an mour.’ Kajjojo iiõ Elkena im Hanna rekõn lol̦o̦k Samuel, im aolep iien rar bõkl̦o̦k juon an kopã kããl. Tokãlik, Jeova ear kõjeraam̦m̦an Hanna im bar lel̦o̦k jilu nejin l̦addik im ruo nejin leddik.