Kiiñ eo an Juda etan Jihoshapat, ear julo̦k lokatok ko im ekjab ko an Beal jãn ãneo. Ear kõn̦aan bwe armej ro ren jel̦ã kõn kien ko an Jeova. Kõn men in, ear jilkinl̦o̦k ruutiej ro im RiLivai ro ñan aolepen Juda bwe ren katakin armej ro kõn kien ko an Jeova.

Aelõñ ko jet me rar epaake aelõñin Juda rar mijak in tarin̦aeik er kõnke rar jel̦ã bwe Jeova ear pãd ippãn armej rein an. Joñan, rar bõkl̦o̦k aer menin lel̦o̦k ñan Kiiñ Jihoshapat. Ak aelõñ ko jet jãn Moab, Amon, im jikin ko ilo Sier rar pojakin tarin̦aeik aelõñin Juda. Jihoshapat ear jel̦ã bwe enaaj aikuji jipañ eo an Jeova. Kõn men in, ear kũrtok aolep em̦m̦aan, kõrã, im ajri bwe ren pãd ilo Jerusalem. Ke ej jutak im̦aaer, ear jar im ba: ‘Jeova, kõm ban anjo̦ ñe kwõjjab pãd ippemmim. Jouj im kwal̦o̦k ñan kõm ta ko kõmin kõm̦m̦ani.’

Jeova ear uwaak im ba: ‘Kom̦win jab mijak. Inaaj jipañ kom̦. Jutak wõt ijoko jikimi im kom̦ naaj loe wãween aõ naaj lo̦mo̦o̦ren kom̦.’ Ewi wãween an kar Jeova lo̦mo̦o̦ren er?

Ilo jibboñõn raan eo tok juon, Jihoshapat ear kããlõt jet rial im ba ñan er bwe ren m̦aaj im̦aanin kumi in tarin̦ae eo. Innem rar aolep m̦aaj jãn Jerusalem ñan Tekoa, ijo renaaj kar tarin̦ae ie.

Ke rial ro rej al im kal̦ap ainikien aer nõbar Jeova, Jeova ear tarin̦ae ñan aelõñin Juda. Ear kõm̦m̦an bwe RiAmon ro im RiMoab ro ren wiwijet im pok. Joñan, rar jino m̦an doon im aolepeer rar mej. Ak Jeova ear kõjparok armejin Juda kab rũttarin̦ae ro aer im bũrij ro aer. Aolep armej ro ilo aelõñ ko repaake Juda rar roñ kõn men eo Jeova ear kõm̦m̦ane, im rar jel̦ã bwe Jeova eo ej jipañ im kõjparok armej ro an. Ewi wãween an Jeova lo̦mo̦o̦ren armej ro an? Eokwe elõñ wãween ko ej kõm̦m̦ani ñan lo̦mo̦o̦ren er. Ejjab aikuj jipañ jãn armej bwe en maroñ kõm̦m̦ane men in.