Jekob ear jel̦ã bwe ej tõllo̦kũn ñan kabuñ ñan Jeova wõt meñe Jeova ejjañin kar lel̦o̦k juon kien ñan jab kabuñ ñan ekjab. (Ex 20:3-5) Innem, ãlikin an kar Jeova ba ñane bwe en jepl̦aak ñan Betel̦, Jekob ear jiroñl̦o̦k aolep ro rar pãd ippãn bwe ren jol̦o̦k ekjab ko ippãer. Jekob ear jol̦o̦k ekjab ko, ekoba dede ko me remaroñ kar kõn̦aki ñan kein karwaan ak kein bõktok jeraam̦m̦an. (Jen 35:1-4) Ejjel̦o̦k pere bwe Jeova ear m̦õn̦õn̦õ ippãn Jekob kõn men eo ear kõm̦m̦ane.

Ilo raan kein ad, ewi wãween ad maroñ kwal̦o̦k bwe jej kabuñ ñan Jeova wõt? Men eo m̦oktata ej ilo ad kõjparok kõj jãn jabdewõt men ko me rej ekkejell̦o̦k ñan kabuñ ñan ekjab ak kajjetõbtõb. Men in emaroñ kitibuj ad jol̦o̦k jabdewõt men ko ewõr anijnij ak kajjetõbtõb ie im lukkuun etali menin kam̦õn̦õn̦õ ko. Ñan waanjoñak, kajjitõk ippam̦ make: ‘Ij ke itoklimo kõn bok ko ak pija ko ewõr vampire, ãnbwinnin ri-mej ro me rej oktak im bar mour (zombie), ak armej ro me ewõr kajoor ko ippãer? Ewõr ke iaan menin kam̦õn̦õn̦õ ko aõ rej kwal̦o̦k kõn mãjiik, ekkõpãl, ak ekko̦o̦l ãinwõt ñe ejjel̦o̦k jorrããn? Jej aikuj kattol̦o̦k kõj jãn jabdewõt men ko Jeova ediki.​—Sam 97:10.

ALWÕJE PIJA EO ETAN “OPPOSE THE DEVIL,” INNEM UWAAKI KAJJITÕK KEIN:

• Ta apañ eo ear wal̦o̦k ilo mour eo an juon rũkkatak etan Palesa?

• Etke ej juon menin mãlõtlõt ñan kappok jipañ jãn em̦m̦aan ro rej lale eklejia ñe ewõr apañ ko rej ekkejell̦o̦k kõn kajjetõbtõb?

• Ñan ro rekõn̦aan bwe Jeova en kõjparok er, ta men ko rej aikuj lukkuun jol̦o̦ki?

• Ta pepe eo Palesa ear kõm̦m̦ane ilo m̦õkaj?

• Ilo jikin eo kwõj jokwe ie, ta jet iaan wãween ko kwõmaroñ kõm̦m̦ani ñan kõjparok eok jãn jetõb ro renana?