Samuel ear dãpij wõt an tiljek ñan Jeova ilo aolepen mour eo an. Ke ear juon l̦addik, ear m̦akoko in kõm̦m̦ani men ko renana ãinwõt l̦õm̦aro nejin Ilai, Hopnai im Pinehas. (1Sa 2:22-26) Samuel ear rũttol̦o̦k, im Jeova ear pãdwõt ippãn. (1Sa 3:19) Ke ear juon l̦al̦l̦ap, ear wõnm̦aanl̦o̦k wõt im karejar ñan Jeova ilo tiljek, meñe l̦õm̦aro nejin rar jab.​—1Sa 8:1-5, UBS.

Ta eo jemaroñ katak jãn joñak eo an Samuel? El̦aññe kwõj juon jo̦dikdik, kwõn lõke bwe Jeova emel̦el̦e kõn mãlejjoñ ko kwõj iiooni im wãween am̦ eñjake. Emaroñ jipañ eok bwe kwõn peran. (Ais 41:10, 13) El̦aññe kwõj juon jemãn im jinen me ajri eo nejũm̦ ejebwãbwe jãn m̦ool eo, kwõmaroñ lo kaenõm̦m̦an ilo am̦ jel̦ã bwe Samuel ear jab maroñ iuun l̦õm̦aro nejin ñan dãpij wõt aer tiljek ñan kien ko an Jeova. An kar likũt wõt apañ eo ippãn Jeova, ear kate ñan dãpij wõt an tiljek im kabuñbũruon Jemãn ilañ, Jeova. Joñak ko am̦ rem̦m̦an remaroñ kõm̦akũt eo nejũm̦ ñan bar jepl̦aak ñan Jeova.

ALWÕJE PIJA EO ETAN LEARN FROM THEM​—SAMUEL, INNEM UWAAKE KAJJITÕK KEIN ITULAL̦:

• Ewi wãween an kar Samuel kwal̦o̦k an peran ke ear juon l̦addik?

• Ewi wãween an kar Danny kwal̦o̦k peran?

• Ewi wãween an kar Samuel likũt juon joñak em̦m̦an ke ear juon l̦al̦l̦ap?

• Ewi wãween an kar jemãn im jinen Danny likũt juon joñak em̦m̦an?