Eoon in ej kwal̦o̦k juon men me em̦m̦an ñan ad kõl̦mãnl̦o̦kjen̦ kake. Ej ba: “El̦aññe kwõj lo aer kam̦akokoik ro ri-jeram̦õl, im aer ko̦kkure men in wãnõk im jim̦we ilo juon aelõñ, kwõn jab bwilõñ kake; bwe juon eutiej jãn ri-utiej ro, ej lale; im ewõr reutiej jãn er.”​—Ekl. 5:8.

Naan ko ilo eoon in relukkuun jejjet ekkar ñan men ko reutiej ro ewõr aer maroñ ilo kien rej kõm̦m̦ani. Bõtab eoon in ej bareinwõt kaalikkar juon men em̦ool kõn Jeova me enãj kõkajoor im kaenõm̦m̦an kõj.

Eoon in ilo Ekklisiastis 5:8 ej jitõñl̦o̦k ñan juon ri-tõl ilo kien me ej kaeñtaan ro rejeram̦õl im kõjekdo̦o̦n er ilo an jab jim̦we an kõm̦m̦an ñan er. Ri-tõl in ej aikuj keememej bwe emaroñ wõr juon ri-tõl eutiejl̦o̦k jãn e im el̦apl̦o̦k an maroñ ilo kien, me ej lale ta ko ej kõm̦m̦ani. Im ilo m̦ool, emaroñ bar wõr ri-tõl ro jet me reutiejl̦o̦k im l̦apl̦o̦k aer maroñ jãn rein. Ekabũrom̦õjm̦õj bwe ilo kien ko an armej, aolep ri-tõl rein remaroñ kõm̦m̦ani jerbal ko rejjab jim̦we, im armej ro me rej pãd ium̦win kien kein rej aikuj kijenmej kõn elõñ wãween ko rejjab jim̦we rej kõm̦m̦ani.

Bõtab, jekdo̦o̦n ewi joñan an nana men ko rej wal̦o̦k, jemaroñ bõk kaenõm̦m̦an ilo ad jel̦ã bwe Jeova ej lale “ri-utiej ro” ilo kien ko an armej. Jemaroñ akwel̦ap ñan Anij bwe en jipañ kõj im bareinwõt jol̦o̦k eddodo ko ad n̦a ioon. (Sam 55:22; Pil. 4:6, 7) Jejel̦ã bwe “mejãn Jeova rej ettõrl̦o̦k im ettõrtok ilo aolepen lal̦, im make kwal̦o̦k E kajoor in jipañ ro bũrueer reweeppãn ñan E.”​—2 Kro. 16:9.

Kõn men in, Ekklisiastis 5:8 ej kakeememej kõj kõn men eo em̦ool kõn ri-tõl ro an kien, bwe aolep iien enaaj wõr bar juon ilo kien me el̦apl̦o̦k an maroñ. Eoon in emaroñ jipañ kõj ñan kõl̦mãnl̦o̦kjen̦ kõn men eo el̦apl̦o̦k an aorõk im m̦ool kõn Jeova, bwe ejjel̦o̦k en̦ eutiejl̦o̦k jãne, aet E eo Eutiej Bõtata. Ej irooj kiiõ ikijjeen Nejin, Jesus Christ, eo im ej Kiiñ in Aelõñ eo an Anij. Eo Ekajoor Bõtata, me ej loe aolep men, elukkuun jim̦we kõm̦m̦an ko an im ejjel̦o̦k an kalijekl̦o̦k, ãinwõt bar Nejin.