1. Ewi wãween an Jeova eñjake ñe juon ej bar jepl̦aak im karejar ñane?

ÃINWÕT ad kar etale ilo katak eo l̦o̦k, Jeova ej keidi e make ñan juon jabõt em̦m̦an me ej kõjparok im lukkuun kaorõk jiip ko an. Im ej pukot jabdewõt eo ejebwãbwe. Jeova ear ba ñan ri-Israel ro me rar el̦l̦o̦k jãn e im ba: “Kom̦win ro̦o̦l ñan Ippa, im Inaaj ro̦o̦l ñan kom̦.” Jejel̦ã bwe ejjañin oktak an Jeova l̦õmn̦ak kõnke ej ba: “Ijjab oktak.” (Mal. 3:6, 7) Jesus ear ba bwe Jeova im enjel̦ ro rej lukkuun lañlõñ ñe juon iaan ri-karejar ro An me ear jebwãbwe ej bar jepl̦aak ñan Ippãn.​—Luk 15:10, 32.

2. Ta ko jenaaj etali ilo katak in?

² Jen etale jilu iaan waanjoñak ko Jesus ear kwal̦o̦ki me rej kwal̦o̦k kõn wãween ad maroñ jipañ ro rar jebwãbwe jãn Jeova. Jenaaj etali jet iaan kadkad ko jej aikuji bwe jen maroñ jipañ jiip ko rejebwãbwe ñan bar jepl̦aak ñan ippãn. Im jenaaj loe etke ewõr tokjãn ad kate kõj ñan rejetake ro rem̦õjn̦o̦.

3-4. Etke kõrã eo kar kwal̦o̦k kake ilo Luk 15:8-10 ear lukkuun kate pukpukote jããn jelba eo an me ear jako?

³ Jej aikuj lukkuun kate kõj ñan pukot ro rekõn̦aan bar jepl̦aak ñan Jeova. Ilo Gospel in Luk, Jesus ear kwal̦o̦k juon waanjoñak kõn juon kõrã me ej pukot juon jããn jelba eaorõk me ear jako. Men eo jej kile ilo waanjoñak in ej kõn wãween an kõrã in kate pukpukote jããn jiddik in.​—Riit Luk 15:8-10.

⁴ Jesus ej kõmel̦el̦eik eñjake eo an kõrã in ke ej loe jããn jelba in eaorõk me ear jako. Ilo tõre ko an Jesus, ñe juon kõrã ilo Israel ear m̦are, jet iien jinen ej lel̦o̦k ñane joñoul jããn jelba. Bõlen jããn in ear aorõk ippãn kõrã in kõnke ej m̦õttan jããn ko jinen ear lil̦o̦k ñan e. Kõrã in ej l̦õmn̦ak bwe jããn eo ear wõtlo̦k ilo lal̦. Kõn men in ej tile l̦aam̦ eo an im reito reitak im pukpukote, bõtab ejjab loe. Emaroñ dik meramin l̦aam̦ eo an im kõm̦m̦an bwe en pen an loe. Tokãlik, ej kõkkõm̦m̦anm̦õn an burum̦i aolepen m̦weo. Ãlikin an burum̦ im aini bũñal ko, ej loe jããn jelba eo eaorõk, ej rabõlbõl jãn meramin l̦aam̦ eo an. Em̦m̦an an  mour bwe eloe! Ej kũr aolep ro m̦õttan im ro ri-turin bwe en ba ñan er kõn men eo em̦m̦an ear wal̦o̦k.

5. Etke emaroñ pen ñan ad loe ro em̦õj aer el̦l̦o̦k jãn eklejia eo?

⁵ Ilo waanjoñak in an Jesus, jej lo bwe ewõr men ko jej aikuj in kõm̦m̦ani bwe jen maroñ loe juon men ejako. Ejja ãindeinl̦o̦k wõt, elõñ men ko jej aikuj kate kõj kõm̦m̦ani bwe jen maroñ loe ro rar el̦l̦o̦k jãn eklejia eo. Emaroñ mootl̦o̦k elõñ de iiõ jãn ke rar bõjrak jãn aer kobatok ippãd. Bõlen em̦õj aer em̦m̦akũt ñan juon jikin me ro jeid im jatid ilo jikin eo rejaje kajjien. Ejjel̦o̦k pere bwe rein me ejako aer kwal̦o̦k naan im etal ñan kweilo̦k ko relukkuun kõn̦aan jepl̦aaktok ñan ippãn Jeova. Rekõn̦aan karejar ñan Jeova ippãn baam̦le eo an me ej ejaakin ri-karejar ro rem̦ool, bõtab rej aikuj jipañ eo ad.

6. Ewi wãween an aolep ro ilo eklejia eo maroñ bõk kun̦aaer pukot ro em̦õj aer bõjrak jãn aer kwal̦o̦k naan im etal ñan kweilo̦k ko?

⁶ Wõn ro remaroñ bõk kun̦aaer ñan pukot ro em̦õj aer bõjrak jãn aer kwal̦o̦k naan im etal ñan kweilo̦k ko? Kõj aolep​—em̦m̦aan ro rej lale eklejia, bainier ro, baam̦le eo an rein, im ri-kwal̦o̦k naan ro ilo eklejia eo—jemaroñ jipañ pukot er. Ewõr ke juon m̦õttam̦ ak nukum̦ me em̦õj an bõjrak jãn an kwal̦o̦k naan im etal ñan kweilo̦k ko? Kwõnañin ke iioone juon iaan rein ilo am̦ jerbalin em̦ ñan em̦ ak ke kwõj bõk kun̦aam̦ ilo jerbalin kwal̦o̦k naan ilo̦bwilej? Kõmel̦el̦e ñan armej in bwe ñe ekõn̦aan bwe juon en lol̦o̦k e, ba ñane bwe kwõm̦õn̦õn̦õ in lel̦o̦k atõrej ak nõm̦ba eo an ñan em̦m̦aan ro rej lale eklejia eo kwõj pãd ie.

7. Ta eo kwõj katak jãn naan ko an juon em̦m̦aan ej lale eklejia etan Thomas?

⁷ Ta buñtõn ne ko em̦m̦aan ro rej lale eklejia remaroñ kõm̦m̦ani bwe ren maroñ loe ro rekõn̦aan jepl̦aak ñan Jeova? Lale ta eo juon em̦m̦aan ej lale eklejia etan Thomas * ej ba me ej jokwe ilo Spain. Em̦õj an jipañ elõñl̦o̦k jãn 40 Ri-Kõnnaan ro an Jeova jepl̦aak ñan eklejia eo. Thomas ej ba: “M̦okta, ij kajjitõk ippãn elõñ iaan ro jeid im jatid el̦aññe rejel̦ã ia ko rein rej jokwe ie. Ak ij kajjitõk ippãn ri-kwal̦o̦k naan ro el̦aññe rej keememej jabdewõt armej me ejako an pãd ilo kweilo̦k ko. Ekkã an elõñ iaan ro ilo eklejia eo lukkuun m̦õn̦õn̦õ in jipañ kõnke ej ãinwõt ñe rej bar bõk kun̦aaer im pukot rein. Tokãlik, ñe ij lol̦o̦k ro ejako aer kwal̦o̦k naan im etal ñan kweilo̦k ko, ij kajjitõk ippãer ejet an ajri ro nejier im ro jet nukwier mour. Jet iaan rein rekõn bõktok ajri ro nejier ñan kweilo̦k ko, im ajri rein remaroñ kar juon ri-kwal̦o̦k naan me ejjañin peptaij. Rein remaroñ bareinwõt bõk jipañ bwe ren bar jepl̦aak ñan Jeova.”

8. Ilo waanjoñak eo kõn likao eo ear jebwãbwe ilo Luk 15:17-24, ewi wãween an kar jemãn kõm̦m̦an ñan likao eo nejin me ear ukel̦o̦k?

⁸ Kadkad ta ko rej aikuj wõr ippãd el̦aññe jekõn̦aan jipañ ro rekõn̦aan jepl̦aak ñan ippãn Jeova? Lale jet iaan men ko jemaroñ katak jãn waanjoñak eo Jesus ear kwal̦o̦ke ikijjeen likao eo ear jab kõn̦aan pokake me ear etal jãn m̦weo im̦õn jemãn im jinen. (Riit Luk 15:17-24.) Jesus ej kõmel̦el̦e kõn an likao in kar tokãlik kile an bõd im kõn̦aan ro̦o̦l ñan m̦weo im̦õn. Jemãn likao in ear ettõrl̦o̦k ñane im lukkuun jiburlepe, im kaalikkar an yokwe e. Ear nana bõklõkõt eo an likao in im ear l̦õmn̦ak bwe ejjab tõllo̦kũn ñan an jemãn kõm̦m̦an ñane ãinwõt juon nejin. Jemãn ear tũriam̦okake l̦eo nejin ke ear lutõkl̦o̦k aolepen bũruon ñan e. Innem, tokãlik, ewõr men ko jemãn ear kõm̦m̦ani ñan kaalikkar ñan l̦eo nejin bwe em̦õn̦õn̦õ in bar kadel̦o̦ñe ñan m̦weo im̦õn, ejjab ãinwõt juon ri-jerbal, ak ãinwõt juon eo ej uwaan baam̦le eo im eaorõk. Jemãn ear kam̦oole men in ilo an kar kõm̦m̦an juon m̦õñã el̦ap im lel̦o̦k  juon nuknuk em̦m̦antata ñan eo nejin me ear ukel̦o̦k.

9. Kadkad ta ko jej aikuji bwe jen maroñ jipañ ro ejako aer kwal̦o̦k naan im etal ñan kweilo̦k ko ñan bar jepl̦aak ippãn Jeova? (Lale bo̦o̦k eo “ Wãween Ad Maroñ Jipañ Ro Rekõn̦aan Jepl̦aaktok.”)

⁹ Jeova ej ãinwõt jemãn likao eo ilo waanjoñak eo. Ej yokwe ro jeid im jatid me ejako aer kwal̦o̦k naan im etal ñan kweilo̦k ko im ekõn̦aan bwe ren bar jepl̦aak ñan ippãn. Ilo ad anõke Jeova, jemaroñ jipañ er ñan bar jepl̦aak. Bwe jen kõm̦m̦ane men in, jej aikuj jel̦ã kijenmej, kwal̦o̦k tũriam̦o, im yokwe. Etke eaorõk bwe jen kwal̦o̦k kadkad kein, im ewi wãween ad maroñ kwal̦o̦ki?

10. Etke jej aikuj jel̦ã kijenmej bwe jen maroñ jipañ juon ñan bar ruwaakl̦o̦k ñan Jeova?

¹⁰ Jej aikuj jel̦ã kijenmej kõnke emaroñ bõk iien ñan an juon armej bar ro̦o̦ltok ñan ippãn Jeova. Elõñ iaan ro rar bõjrak jãn aer kwal̦o̦k naan im kweilo̦k rej kwal̦o̦k m̦ool im ba bwe rej kab em̦m̦akũt ãlikin an em̦m̦aan ro rej lale eklejia im ro jet ilo eklejia eo kar lol̦o̦k er elõñ alen. Juon jeid im jatid kõrã etan Nancy jãn Southeast Eijia, ej ba: “Juon m̦õtta ilo eklejia eo me ilukkuun epaake, ear l̦ap an jipañ eõ. Ear kwal̦o̦k an yokwe eõ ãinwõt juon jeiũ. Ear kakeememej eõ kõn iien ko rem̦m̦an kom̦ro ar ippãn doon. Ear kijenmej ilo an kar roñjake aõ kwal̦o̦k bũruõ ñane, im ear jab ãliklik in letok naanin jipañ. Ealikkar an kar juon jeran em̦ool, eo im ear pojakin jipañ ilo jabdewõt iien.”

11. Etke jej aikuj kwal̦o̦k tũriam̦o bwe jen jipañ juon eo ear illu im inepata?

¹¹ Ñe juon ej illu ak inepata, emaroñ metak ãinwõt juon kinej ekõmetak. Tũriam̦o ej ãinwõt juon uno ekajoor me emaroñ jipañ armej eo bwe en bar em̦m̦an an mour. Ewõr jet im ejako aer kwal̦o̦k naan im etal ñan kweilo̦k ko, rej illu  wõt ippãn juon ilo eklejia eo. Eñjake kein rej kõm̦m̦an bwe ren jab kõn̦aan ro̦o̦l ñan ippãn Jeova. Jet remaroñ l̦õmn̦ak bwe ejjab jim̦we men eo ear wal̦o̦k ñan er. Kõn men in, remaroñ aikuji juon eo enaaj roñjake er im mel̦el̦e kõn eñjake ko aer. (Jem. 1:19) María, juon eo ekar jako an kwal̦o̦k naan im etal ñan kweilo̦k ko, ej ba, “Iar aikuji an juon roñjake eõ, kaenõm̦m̦ane eõ, im letok naanin rõjañ ko rem̦m̦an im jipañ eõ.”

12. Ewi wãween an yokwe eo an Jeova ãinwõt juon to?

¹² Baibõl̦ eo ej keidi yokwe eo an Jeova ñan armej ro an ãinwõt juon to. Ewi wãween an yokwe eo an Anij ãinwõt juon to? L̦õmn̦ak kõn waanjoñak in: Baj pijaikl̦o̦k m̦õk am̦ mal̦oñ ak enana lo̦jet im juon armej ej jowaj juon jakũt in eppepe. Ealikkar kwõnaaj m̦õn̦õn̦õ kõnke jakũt in eppepe eo enaaj jipañ eok bwe kwõn jab apañ ilo am̦ kate eok bwe kwõn jab mal̦oñ. Bõtab bwe kwõn mour wõt, ejabwe wõt ñan am̦ kõjerbale juon jakũt in eppepe. Em̦õl̦o dãn eo im kwoban mour el̦aññe kwõtõpar juon waan lo̦jet ñan am̦ bõk lo̦mo̦o̦r. Kwõj aikuji an juon jowaj juon to bwe en kanõketok eok ñan wa eo. Ke Jeova ear kõnono kõn ri-Israel ro me rar jebwãbwe, ear ba: “Iar ipertok er kõn . . . to in yokwe.” (Hos. 11:4) Ilo rainin, Anij ej bõk ejja eñjake in kõn ro em̦õj aer bõjrak jãn aer karejar ñane im rej mal̦oñ ilo apañ im inepata ko aer. Ekõn̦aan bwe ren jel̦ã bwe ej yokwe er, im ekõn̦aan karuwaakl̦o̦k er ñan e. Im Jeova emaroñ kõjerbal eok ñan kwal̦o̦k yokwe in an ñan er.

13. Kwal̦o̦k juon bwebwenato me ej kaalikkar kõn ewi joñan an kajoor yokwe eo an ro jemjein jemjati.

¹³ Eaorõk ñan kaalikkar ñan ro em̦õj aer bõjrak jãn aer kwal̦o̦k naan im etal ñan kweilo̦k ko bwe Jeova ej yokwe er im bwe jej bareinwõt yokwe er. Pablo, eo kar kwal̦o̦k kake ilo katak eo  l̦o̦k, ekar bõjrak an kwal̦o̦k naan im etal ñan kweilo̦k ko ium̦win elõñl̦o̦k jãn 30 iiõ. Ej ba: “Juon jibboñ ke iar tõn pojakin em̦m̦akũt jãn m̦weo im̦õ, juon jeid im jatid lel̦l̦ap me ejouj ear iioone eõ im ear kwal̦o̦k yokwe ilo wãween an kar kõnnaan ippa. Iar jino jañ ãinwõt juon ajri. Iar ba ñan e bwe ej ãinwõt ñe Jeova ear jilkintok e bwe en kõnnaan ippa. Ilo kar iien in wõt, iar pepe in bar jepl̦aak ñan ippãn Jeova.”

14. Ekkar ñan waanjoñak eo ilo Luk 15:4, 5, ta eo jabõt eo ear kõm̦m̦ane ke ear loe jiip eo ekar jebwãbwe?

¹⁴ Ro em̦õj aer bõjrak jãn aer kwal̦o̦k naan im etal ñan kweilo̦k ko, rej aikuji ad wõnm̦aanl̦o̦k wõt im jipañ er. Ãinwõt kar likao eo me ear jebwãbwe ilo waanjoñak eo an Jesus, rein remaroñ lukkuun metak, im eñjake ko aer rej ãinwõt juon kinej me emaroñ bõk elõñ iien ñan an mo̦. Im kõn aer kar pãd ilo lal̦ in an Setan, emaroñ jab lukkuun kajoor jem̦jerã eo aer ippãn Jeova ãinwõt kar m̦okta. Jej aikuj jipañ er kõkajoore tõmak eo aer ilo Jeova. Ilo waanjoñak eo kõn jiip eo ear jebwãbwe, Jesus ej kwal̦o̦k kõn wãween an kar jabõt eo likũt jiip eo ioon aeran innem karo̦o̦le ñan ippãn bwij eo. Em̦õj an jabõt eo jol̦o̦k iien im maroñ ko an ñan pukot jiip eo ejebwãbwe. Bõtab ej kile bwe enaaj aikuj kotake jiip eo im bõkl̦o̦ke ñan bwij eo kõnke ejjel̦o̦k an kajoor ñan make ro̦o̦ll̦o̦k ñan bwij eo.​—Riit Luk 15:4, 5.

15. Ewi wãween ad maroñ jipañ ro rem̦õjn̦o̦ me rekõn̦aan bar jepl̦aak ñan Jeova? (Lale bo̦o̦k eo etan “ Juon Kein Jerbal El̦ap an Aorõk.”)

¹⁵ Jemaroñ aikuj kõjerbal iien im maroñ ko ad ñan jipañ ro em̦õj aer bõjrak jãn aer kwal̦o̦k naan im kweilo̦k bwe ren anjo̦ ioon m̦õjn̦o̦ ko aer. Bõtab ikijjeen kajoor eo an Jeova, Naan eo an, im bok ko jej bũki jãn eklejia eo, jemaroñ jipañ rein bwe en bar kajoor kõtaan eo aer ippãn Jeova. (Rom 15:1) Ewi wãween ad maroñ kõm̦m̦ane men in? Juon em̦m̦aan me eto an lale eklejia ej ba, “Ñe ro em̦õj aer bõjrak jãn aer kwal̦o̦k naan im etal ñan kweilo̦k ko make pepe bwe  rekõn̦aan bar jepl̦aak ippãn Jeova, ekkã aer aikuj bwe juon en katak Baibõl̦ ippãer.” * Innem ñe em̦õj kajjitõk ippam̦ bwe kwõn katak ippãn rein, em̦m̦an bwe kwõn m̦õn̦õn̦õ in bõk jerbal in el̦aññe kwõmaroñ. Em̦m̦aan in ej bareinwõt ba, “Ri-kwal̦o̦k naan eo me ej katak ippãn in jeid im jatid, eaorõk bwe en juon m̦õttan em̦m̦an, eo me armej in emaroñ kwal̦o̦k bũruon ñane.”

16. Ewi wãween ad jel̦ã bwe enjel̦ ro renaaj jipañ kõj?

¹⁶ Elõñ bwebwenato ko rej kaalikkar bwe enjel̦ ro rej jerbal iturid im jipañ kõj loi ro relukkuun kõn̦aan bar jepl̦aak ñan ippãn Jeova. (Rev. 14:6) Ñan waanjoñak, Silvio, jãn Ecuador, ear akwel̦ap ilo an jar im kajjitõk jipañ bwe en bar jepl̦aak ñan eklejia eo. Ilo lukwõl̦pãn an jar, ruo em̦m̦aan rej lale eklejia rar tõpar m̦weo im̦õn. Ilo kar iien in rej lol̦o̦ke, rar m̦õn̦õn̦õ in jino lel̦o̦k jipañ eo ear aikuji.

17. Ta jeraam̦m̦an eo jej bõke jãn ad jipañ ro ejjab kajoor kõtaan eo aer ippãn Jeova?

¹⁷ El̦ap ad naaj lañlõñ ñe jenaaj jipañ ro ejjab kajoor kõtaan eo aer ippãn Jeova ñan bar jepl̦aak ñane. Lale ta eo, Salvador, juon bainier me el̦ap an kate ñan jipañ rein, ej ba: “Ewõr iien epen aõ dãpij an to̦o̦r dãnnin meja kõn m̦õn̦õn̦õ. Elukkuun l̦ap aõ m̦õn̦õn̦õ ñe ij kile bwe em̦õj an Jeova lo̦mo̦o̦rene juon iaan jiip ko an raorõk jãn lal̦ in an Setan im bwe iar bõk jeraam̦m̦an eo ñan jipañ jerbal Ippãn ilo wãween in.”​—Jrb. 20:35.

18. El̦aññe em̦õj am̦ bõjrak jãn am̦ kwal̦o̦k naan im etal ñan kweilo̦k ko, ta eo kwõmaroñ lõke?

¹⁸ El̦aññe em̦õj am̦ bõjrak jãn am̦ kobal̦o̦k ippãn armej ro an Jeova, kwõmaroñ lõke bwe Jeova ej yokwe wõt eok. Ekõn̦aan bwe kwõn bar jepl̦aak ñan e. Kwõnaaj aikuj bõk jet buñtõn ne ko bwe kwõn jepl̦aak ñan ippãn. Bõtab, ãinwõt jemãn likao eo ilo waanjoñak eo Jesus ear kwal̦o̦ke, Jeova ej kõttar ñan iien eo kwõnaaj bar jepl̦aak ñan ippãn, im enaaj m̦õn̦õn̦õ in karwaineneik eok.