Mary im l̦eo pãleen etan John, a rej jokwe ilo juon jikin me remaroñ kwal̦o̦k kõn ennaan eo em̦m̦an ñan elõñ ri-jerbal ro me rej itok jãn aelõñin Philippine. Ke ear wal̦o̦k nañinmejin COVID-19 eo, Mary ear jino katak ippãn armej ro ilo aelõñ eo ej jokwe ie im bareinwõt ippãn ro ilo aelõñ ko jet. Ewi wãween an kar kõm̦m̦ane men in?

Ekkã an Mary kajjitõk ippãn rũkkatak ro an, “Ewõr ke en̦ kwõjel̦ã kajjien me ekõn̦aan katak Baibõl̦?” Ñe rej ba aet, ej kajjitõk ippãer ñe remaroñ kwal̦o̦k kajjien ñan er. Ilo an kwal̦o̦k kajjitõk in, men in ear tõll̦o̦ke ñan lo elõñ an rũkkatak. Etke? Kõnke armej ro rej kautiej Naanin Anij ekkã aer kõn̦aan kwal̦o̦k kõn ta ko rej katak kaki ñan baam̦le ko aer im ro m̦õttaer me repaake er. Ta tokjãn ko rar wal̦o̦k itok jãn an Mary kwal̦o̦k kajjitõk in?

Rũkkatak eo an Mary etan Jasmin ear kwal̦o̦k kajjien ñan emãn armej ro. Juon iaaer me etan in Kristine, ear lukkuun em̦m̦an ippãn katak Baibõl̦, joñan ear kajjitõk ippãn Mary ñe remaroñ katak ruo alen ilowaan juon wiik. Ke Mary ear kajjitõk ippãn Kristine ñe ewõr en̦ ejel̦ã kajjien me ekõn̦aan katak Baibõl̦, ear ba, “Aet, inaaj kwal̦o̦k kajjiem̦ ñan kumi kan̦ m̦õtta.” Ilowaan jejjo wõt wiik, Kristine ear kwal̦o̦k kajjien Mary ñan emãn iaan ro m̦õttan me rar kõn̦aan katak. Tokãlik, Kristine ear bar kwal̦o̦k kajjien kumi ko jet m̦õttan im jet iaaer rar bar lel̦o̦k etan ro jet me remaroñ kõn̦aan katak Baibõl̦.

Kristine ear bareinwõt kõn̦aan bwe baam̦le eo an ilo Philippine ren katak kõn Baibõl̦ eo. Kõn men in, ear kõnnaan ippãn lio nejin etan Andrea. Ilo jinoin Andrea ear l̦õmn̦ak, ‘Elukkuun nana kabuñ en̦ an Ri-Kõnnaan ro an Jeova, rejjab tõmak ilo Jesus, im rej kõjerbale wõt Kallim̦ur M̦okta ilo Baibõl̦.’ Bõtab, ãlikin an katak juon wõt kõttan, ear kile bwe ebõd l̦õmn̦ak eo an. Ilo iien katak ko an, ekkã an ba, “Ñe eñin men eo Baibõl̦ ej ba, eokwe alikkar em̦ool!”

Tokãlik, Andrea ear kwal̦o̦k kajjien Mary ñan ruo iaan ro m̦õttan im juon iaan ri-jerbal ro m̦õttan, im rar bar jino katak Baibõl̦. Bareinwõt, ilo an Mary jab jel̦ã kake, kõrã eo nãj jinen Andrea etan Angela me epilo ekkã an kar roñjake aerro Andrea katak. Innem juon raan Angela ear kajjitõk ippãn Andrea ñe emaroñ kwal̦o̦k kajjien ñan Mary, innem Angela ear bar kajjitõk ñe emaroñ katak Baibõl̦. Ear lukkuun em̦m̦an ippãn Angela men ko ear katak kaki. Im ium̦win juon allõñ ear kiili elõñ iaan eoon ko im ear kõn̦aan katak emãn kõttan ilowaan juon wiik! Ikijjeen jipañ eo an Andrea, Angela ear jino kobal̦o̦k ilo iien kweilo̦k ko ad ilo online.

 Ke Mary ear kile bwe l̦eo ippãn Kristine etan Joshua ekkã an roñjake jãn juon jikin epaak ilo iien ko erro Kristine kõn katak, Mary ear kajjitõk ippãn ñe ekõn̦aan kobal̦o̦k. Joshua ear ba: “Ij roñjake wõt, ak jab kwal̦o̦k kajjitõk ñan ña, ñe kwõnaaj kwal̦o̦k kajjitõk inaaj jutak im etal jãn ijin.” Ium̦win l̦alem wõt minit in aer katak, ak elõñl̦o̦k kajjitõk ko Joshua ear kwal̦o̦ki jãn Kristine im ear bar kõn̦aan katak Baibõl̦.

Kõn wõt kajjitõk eo Mary ear kwal̦o̦ke, elõñ armej rar jino katak Baibõl̦. Ear kõm̦m̦an karõk bwe ro jeid im jatid ren katak ippãn jet iaan ro ear katak ippãer. Mary ear jino katak Baibõl̦ ippãn 28 armej ro jãn emãn aelõñ ko me reoktak jãn doon.

Jasmin, rũkkatak eo me kar kõnono kake ilo jinoin bwebwenato in, ear peptaij ilo Eprõl̦ 2021. Kristine ear peptaij ilo Mãe 2022 im ear jepl̦aak ñan Philippine bwe en pãd ippãn baam̦le eo an. Rũkkatak ro ruo me Kristine ear kwal̦o̦k kajjier ñan Mary rar bar peptaij. Angela ear peptaij jejjo allõñ tokãlik im kiiõ ej juon rekũl̦ar bainier. L̦eo ippãn Kristine, Joshua, im lio nejierro, Andrea, ekoba rũkkatak ro jet, em̦m̦an aer aolep kõm̦m̦an wõnm̦aanl̦o̦k ko.

Ilo tõre ko an rijjilõk ro, ear m̦õkaj an ajeeded ennaan eo em̦m̦an ikõtaan baam̦le ko im ro m̦õttaer. (Jon 1:​41, 42a; Jrb. 10:​24, 27, 48; 16:​25-33) Kwõmaroñ ke kajjitõk ippãn rũkkatak ro am̦ im ro jet me ewõr aer itoklimo kajjitõk in, “Ewõr ke en̦ kwõjel̦ã kajjien me ekõn̦aan katak Baibõl̦?” Ñe kwõj kwal̦o̦ke kajjitõk in em̦m̦an im epidodo, kwõmaroñ lo elõñ armej ro me rem̦õn̦õn̦õ in katak Baibõl̦.