1, 2. Ilo 2018, iien ta eo elukkuun aorõk me enaaj kabõrokuk kõj aolep, im etke? (Lale pija eo itulõñ.)

ILO M̦aaj 31, 2018, elõñ milien armej ipel̦aakin lal̦ in renaaj etal ñan juon iien eaorõk me ej wal̦o̦k juon wõt alen ilo juon iiõ. Ãlikin an naaj tulo̦k al̦, Ri Kõnnaan ro an Jeova kab elõñ armej ro jet renaaj koba ippãn doon ñan keememej katok in mour eo an Jesus. Elukkuun kabwilõñlõñ bwe ilo kajjojo iiõ, Kwõjkwõjin Mej eo an Christ el̦apl̦o̦k an kabõrokuk armej jãn iien ko jet rel̦l̦ap rej wal̦o̦k ipel̦aakin lal̦.

² El̦ap an Jeova im Jesus m̦õn̦õn̦õ ñe rej loe an elõñ milien armej ilo kajjojo jikin ko ipel̦aakin lal̦ in etal ñan iien in elukkuun aorõk. Baibõl̦ ej kõmel̦el̦e im ba bwe “jar el̦ap, eo ejjel̦o̦k armej ej maroñ in bwinier, jãn aolep kain armej, bwij, aelõñ, im kajin,” rej lam̦õj ilo ainikien el̦ap im ba: “Lo̦mo̦o̦r ñan amwõj Anij eo Ej jijet ioon tũroon, im ñan L̦aam̦.” (Rev. 7:9, 10) Elukkuun em̦m̦an bwe kajjojo iiõ ilo iien Kwõjkwõj eo, elõñ armej rej nõbar Jeova im  Jesus kõn men ko relukkuun em̦m̦an erro ar kõm̦m̦ani.

3. Ta kajjitõk ko jenaaj lo uwaakier ilo katak in?

³ Ilo katak in, kwõnaaj lo uwaakin kajjitõk kein emãn: (1) Ewi wãween aõ maroñ kõppojakl̦o̦k im̦aan ñan iien Kwõjkwõj eo bwe en l̦ap aõ bõk tokjãn jãne? (2) Ewi wãween an Kwõjkwõjin Mej eo an Jesus jipañ kabõrokuk aolep armej ro an Anij? (3) Ta ko imaroñ kõm̦m̦ani ñan jipañ kal̦apl̦o̦k an wõr bõrokuk ibwiljin armej ro an Anij? (4) Ewõr ke juon iien enaaj jem̦l̦o̦k ad kõm̦m̦ane Kwõjkwõjin Mej eo an Jesus? El̦aññe aet, ñããt men in enaaj wal̦o̦k?

4. Etke eaorõk bwe jen pãd ilo iien Kwõjkwõj eo?

⁴ Etke eaorõk bwe jen pãd ilo iien Kwõjkwõj eo? Kõnke ad pãd ilo kweilo̦k ko ej juon wãween jej kabuñ ñan Jeova. Ejjel̦o̦k pere bwe Jeova im Jesus rej lo adwõj kate kõj joñan wõt ad maroñ bwe jen pãd ilo kweilo̦k in eaorõktata, me ej wal̦o̦k juon alen ilo juon iiõ. Jekõn̦aan bwe Jeova im Jesus ren lo bwe jenaaj pãd ilo iien Kwõjkwõj in, ijello̦kun wõt ñe ewal̦o̦k juon utam̦we jejjab maroñ el̦l̦ã ioon. Ñe kõm̦m̦an ko ad rej kaalikkar bwe el̦ap ad kaorõki kweilo̦k ko ad, men in enaaj juon iaan men ko renaaj kõm̦akũt Jeova ñan likũti wõt etad ilo “bokin keememej” eo an. Ãt eo juon etan bok in ej “bokin mour.” Im ilo bok in, em̦õj an Jeova je etan aolep ro me ekõn̦aan lel̦o̦k mour indeeo ñan er.​—Mal. 3:16; Rev. 20:15.

5. Ilo wiik ko m̦okta jãn iien Kwõjkwõj eo, ewi wãween ad maroñ ‘etale im lale el̦aññe jej mour ilo tõmak’?

⁵ Ilo wiik ko m̦okta jãn iien Kwõjkwõj eo, jemaroñ kõm̦m̦an iien ñan ad jar im lukkuun kõl̦mãnl̦o̦kjen̦ kõn ewi joñan an kajoor jem̦jerã eo ad ippãn Jeova. (Riit 2 Korint 13:5, UBS.) Rijjilõk Paul ear ba ñan Kũrjin ro: “Kom̦win make etale im ekajete kom̦, bwe kom̦win jel̦ã ñe kom̦ij mour ilo tõmak.” Ewi wãween ad maroñ kõm̦m̦ane men in? Eokwe, jemaroñ kajitũkin kõj make: ‘Ij ke lukkuun tõmak bwe eñin ej doulul eo wõt Jeova ear kããlõte ñan kõm̦anm̦an ankilaan? Ij ke kate eõ joñan wõt aõ maroñ ñan kwal̦o̦k im katakin ro jet kõn ennaan eo em̦m̦an? Kõm̦m̦an ko aõ rej ke kaalikkar bwe ij lukkuun tõmak bwe jej mour ilo raan ko ãliktata, im bwe epaak an naaj jem̦l̦o̦k an Setan irooj im tõl? Ej l̦ap wõt ke aõ tõmak im lõke Jeova im Jesus ãinwõt ilo jinoin ke iar jino karejar ñan Jeova? (Matu 24:14; 2 Ti. 3:1; Hi. 3:14) Ad l̦õmn̦ak kõn uwaakin kajjitõk kein enaaj jipañ kõj ñan etale kõj make bwe jen jel̦ã ia eo jepãd ie.

6. (1) Ta wãween eo wõt emaroñ tõll̦o̦k kõj ñan bõk mour indeeo? (2) Ewi wãween an juon em̦m̦aan ej lale eklejia kõppojakl̦o̦k im̦aan ñan iien Kwõjkwõj eo kajjojo iiõ, im ewi wãween am̦ maroñ bar kõm̦m̦ane men in?

⁶ Juon wãween kwõmaroñ kõppojakl̦o̦k im̦aan ñan iien Kwõjkwõj eo, ej ilo am̦ riit im kõl̦mãnl̦o̦kjen̦ kõn katak ko rej kwal̦o̦k unin an iien in lukkuun aorõk. (Riit Jon 3:16, UBS; 17:3.) Wãween eo wõt bwe jen maroñ bõk mour indeeo ej ilo ad katak bwe jen jel̦ã kõn Jeova im tõmak ilo Nejin, Jesus. Ñe jej kõppojakl̦o̦k im̦aan ñan iien Kwõjkwõj eo, jemaroñ kããlõt katak ko renaaj kal̦apl̦o̦k ad epaakel̦o̦k erro. Eñin men eo juon jeid im jatid em̦m̦aan me eto an bõk jerbalin lale eklejia ear kõm̦m̦ane. Ium̦win elõñ iiõ, ear kakon̦i Naan in Keeañ ko me rej kwal̦o̦k kõn Kwõjkwõjin Mej eo an Jesus, im kõn wãween an kar Jeova im Jesus kwal̦o̦k aerro yokwe kõj. Im ilo wiik ko m̦okta jãn iien Kwõjkwõj eo, ej bar riiti katak kein im lukkuun l̦õmn̦ak kõn unin an aorõk iien in. Jet iien ej kobaik juon ak ruo katak ippãn katak kein em̦õj an kakon̦i. Bareinwõt, ej riit im lukkuun kõl̦mãnl̦o̦kjen̦ kõn eoon ko em̦õj kããlõti ñan ad riiti ilo raan ko m̦okta jãn iien Kwõjkwõj eo. Em̦m̦aan in ej lale eklejia ej ba bwe an kõm̦m̦ani aolep men kein, elõñ men ko rekããl ej katak kajjojo iiõ. El̦aptata, ej kile an l̦apl̦o̦k an yokwe Jeova im Jesus. Ãindeinl̦o̦k wõt, el̦aññe kwõj katak im kõm̦m̦ani wãween kein enaaj bar l̦apl̦o̦k wõt am̦ yokwe  Jeova im Jesus. Enaaj bareinwõt l̦apl̦o̦k am̦ kam̦m̦oolol kõn men eo erro ar kõm̦m̦ane, im enaaj l̦apl̦o̦k am̦ bõk tokjãn jãn iien Kwõjkwõj eo.

7. (1) Ta eo Jesus ear jar kake ilo boñõn eo jinointata ke ear kõm̦m̦ane Kõjota eo an Irooj? (2) Ta eo ej kaalikkar bwe Jeova ear uwaake jar in an Jesus?

⁷ Ilo boñõn eo jinointata me kar kõm̦m̦ane Kõjota eo an Irooj, Jesus ear jar bwe aolep rũkal̦oor ro an ren bõrokuk ippãn doon, ãinwõt aerro Jemãn bõrokuk. (Riit Jon 17:20, 21, UBS.) Alikkar bwe Jeova ear uwaake jar in an Nejin eo ejitõnbõro ippãn. Kwõjkwõjin Mej eo an Jesus ej kweilo̦k eo me el̦aptata an kaalikkar bwe Ri Kõnnaan ro an Jeova rej bõrokuk ippãn doon. Ilo iien in, elõñ milien armej ro jãn kajjojo aelõñ im eoktak kil ko kilier jãn doon rej kweilo̦k ippãn doon ipel̦aakin lal̦ in, im kwal̦o̦k aer tõmak bwe Jeova ear jilkintok Nejin. Ilo jet aelõñ, ejeja an armej ro me eoktak kil ko kilier kweilo̦k ippãn doon im elõñ rej l̦õmn̦ak bwe ej juon men ejjab jim̦we. Bõtab, ejjab ãindein wãween an Jeova im Jesus l̦õmn̦ak kõn men in. Erro ej watõk bwe ej juon men eaiboojoj ñe rej lo ad bõrokuk ippãn doon.

8. Ta ennaan eo Jeova ear lel̦o̦k ñan Ezekiel?

⁸ Kõj armej ro an Jeova jejjab bwilõñ kõn ad bõrokuk ippãn doon. Jeova ear ba ilo kar naan ko an ñan Ezekiel bwe men in enaaj kar wal̦o̦k. Ear jiroñ Ezekiel bwe en bõk ruo al̦al̦, juon “an Juda” im juon “an Josep,” im kakobaik al̦al̦ kein ruo bwe ren juon wõt. (Riit Ezekiel 37:15-17.) Ilo katak eo etan “Kajjitõk ko jãn Ro Rej Riit” me epãd ilo Naan in Keeañ eo an Jul̦ae 2016, ear kõmel̦el̦e im ba: “Jeova ear lel̦o̦k ñan Ezekiel juon ennaan kõn an naaj koba aolep bwij ko ilo aelõñin Israel ãlikin aer bar jepl̦aak ñan Ãneen Kallim̦ur eo. Ennaan in ej bar juon kanaan kõn an armej ro an Anij naaj koba im juon wõt ilo raan kein ãliktata.”

9. Ewi wãween ad lo an jejjet kũtien kanaan eo an Ezekiel kajjojo iiõ ilo iien Kwõjkwõj eo?

⁹ Ilo kar jinoin iiõ eo 1919, Jeova ear jino bar karõk im kabõrokuk rũkkapit ro. Rein rar ãinwõt al̦al̦ eo “an Juda.” Tokãlik, ekar lõñl̦o̦k uwaan ro me kõjatdikdik eo aer ej ñan mour indeeo ijin ioon lal̦ im rar jino kobal̦o̦k ippãn rũkkapit ro. Kumi in armej rein me renaaj mour ijin ioon lal̦ rej ãinwõt al̦al̦ eo “an Josep.” Jeova ear kallim̦ur bwe enaaj kakobaik al̦al̦ kein ruo im kõm̦m̦an bwe ‘ren juon wõt al̦al̦’ ilo pein. (Ezk. 37:19) Ear kõm̦m̦an bwe rũkkapit ro im ‘jiip ro jet’ ren “juon wõt bwij.” (Jon 10:16; Zk. 8:23, UBS) Ilo raan kein, kumi kein ruo rej bõrokuk ippãn doon ilo aer karejar ñan Jeova. Kiiñ eo aer ej Jesus Christ, eo me Anij ear n̦aetan “rũkarejera Devid” ilo kanaan eo an Ezekiel. (Ezk. 37:24, 25) Kajjojo iiõ ilo iien Kwõjkwõj eo, rũkkapit ro im jiip ro jet rej bõrokuk ippãn doon ãinwõt an kar Ezekiel kanaan kake. Bõtab, ta eo kõj kajjojo jemaroñ kõm̦m̦ane bwe en wõr wõt bõrokuk ibwiljin armej ro an Anij?

10. Ewi wãween ad maroñ kõm̦m̦an bwe en l̦apl̦o̦k an wõr bõrokuk ibwiljin armej ro an Anij?

¹⁰ Ta wãween eo kein kajuon jemaroñ kõm̦m̦ane ñan kal̦apl̦o̦k an wõr bõrokuk ibwiljin armej ro an Anij? Juon wãween ej ilo ad kate kõj bwe en ettã bũruod. Ke Jesus ear pãd ijin ioon lal̦, ear ba ñan rũkal̦oor ro an bwe ej aikuj ettã bũrueer. (Matu 23:12) Ekkã an armej ro ilo lal̦ in l̦õmn̦ak bwe reutiejl̦o̦k jãn ro jet. Bõtab el̦aññe ettã bũruod, jenaaj kõttãik kõj ñan em̦m̦aan ro rej tõl ilo eklejia eo im jenaaj pokaki naanin tõl ko aer. Eñin ej juon wãween eaorõk me enaaj kõm̦m̦an bwe aolep ro ilo eklejia eo ren bõrokuk ippãn doon. El̦aptata, el̦aññe jej kõttãik wõt bũruod, jenaaj kabuñbũruon Anij, kõnke “Anij ej jum̦ae ro eutiej bũrueer, ak ej jouj ñan ro ettã bũrueer.”—1 Pi. 5:5, UBS.

11. Ewi wãween ad kõl̦mãnl̦o̦kjen̦ kõn pilawã eo im wain eo jej kõjerbale ilo iien Kwõjkwõj eo emaroñ jipañ kal̦apl̦o̦k ad bõrokuk ippãn doon?

 ¹¹ Ta wãween eo kein karuo jemaroñ kõm̦m̦ane ñan kal̦apl̦o̦k an wõr bõrokuk? Ej ilo ad lukkuun kõl̦mãnl̦o̦kjen̦ kõn mel̦el̦ein pilawã eo im wain eo ilo iien Kwõjkwõj eo. Jej aikuj kõm̦m̦ane men in m̦okta jãn iien Kwõjkwõj eo, el̦aptata ilo boñõn eo jej kõm̦m̦ane Kwõjkwõj eo. (1 Ko. 11:23-25) Pilawã eo ejjab uwe ej kõkkar kõn ãnbwin eo ãnbwinnin Jesus me eweeppãn im ear katok kake, im wain eo ebũrõrõ ej jitõñl̦o̦k ñan bõtõktõkin. Bõtab, ebar wõr men ko jet jej aikuj kõm̦m̦ani ijello̦kun ad baj jel̦ã wõt kõn men kein. Jej aikuj keememej bwe katok in mour eo an Jesus ej kwal̦o̦k kõn ruo men ko rel̦l̦ap kar kõm̦m̦ani kõn wõt yokwe. Juon, ej yokwe eo Jeova ear kwal̦o̦ke ke ear letok Nejin bwe en mej kõn kõj, im ruo, ej yokwe eo Jesus ear kwal̦o̦ke ke ear m̦õn̦õn̦õ in katok kõn mour eo an kõn kõj. Em̦ool bwe ejjel̦o̦k juon enañin kwal̦o̦k yokwe rot in! Innem, el̦aññe jej kõl̦mãnl̦o̦kjen̦ kõn an kar Jeova im Jesus kwal̦o̦k yokwe, men in enaaj kõm̦akũt kõj ñan bar yokwe erro. Im yokwe eo ad kajjojo ñan Jeova enaaj kakobaik kõjwõj ippãn doon im kal̦apl̦o̦k ad bõrokuk.

12. Ewi wãween an bwebwenato eo an Jesus kõn kiiñ eo im rũkõm̦akoko eo an kaalikkar bwe Jeova ekõn̦aan bwe jen jol̦o̦k an ro jet bõd?

¹² Ta wãween eo kein kajilu jemaroñ kõm̦m̦ane ñan kal̦apl̦o̦k an wõr bõrokuk? Ej ilo ad m̦õn̦õn̦õ in jol̦o̦k an ro jet bõd. Ñe jej kõm̦m̦ane men in, jej kwal̦o̦k ad kam̦m̦oolol Jeova kõnke ikijjeen katok in mour eo an Jesus emaroñ jol̦o̦k ad bõd. Jesus ear kwal̦o̦k juon bwebwenato kõn juon kiiñ im juon rũkõm̦akoko ñan kwal̦o̦k etke elukkuun aorõk ñan jol̦o̦k an ro jet bõd. Jouj im riiti bokin Matu 18:23-34 im kajitũkin eok make: ‘Ij ke em̦m̦akũt im kõm̦m̦ane men eo Jesus ear katakin kõj kake? Ij ke kwal̦o̦k wõt aõ kijenmej ippãn ro jeiũ im jatũ im mel̦el̦e kõn men ko rej iiooni? Ipojak ke in jol̦o̦k bõd ko an ro rar kõmetak eõ?’ Em̦ool bwe ewõr bõd ko relukkuun l̦ap jãn bõd ko jet. Im kõj eo me jejjab weeppãn, emaroñ lukkuun pen ñan ad julo̦ki jet iaan bõd kein. Bõtab bwebwenato eo Jesus ear kwal̦o̦ke ej kaalikkar ta eo Jeova ekõn̦aan bwe jen kõm̦m̦ane. (Riit Matu 18:35, UBS.) Jesus ear kaalikkar bwe Jeova eban jol̦o̦k ad bõd ñe  jejjab jol̦o̦k an ro jeid im jatid bõd, meñe jejel̦ã bwe rej m̦oolin ukel̦o̦k. Men in elukkuun aorõk im jej aikuj l̦õmn̦ak kake. Kõn men in, ñan kõjparok im kal̦apl̦o̦k an wõr bõrokuk, jej aikuj jol̦o̦k an ro jet bõd ãinwõt an kar Jesus katakin kõj.

13. Ñe jej kõm̦m̦an aenõm̦m̦an ippãn ro jet, ewi wãween ad kõm̦m̦an bwe en l̦apl̦o̦k ad bõrokuk ippãn doon?

¹³ Ñe jej jol̦o̦k an ro jet bõd, jej kõm̦m̦an bwe en wõr wõt aenõm̦m̦an ikõtaad im ro jeid im jatid. Rijjilõk Paul ear ba bwe jej aikuj kate kõj bwe jen bõrokuk im aenõm̦m̦an wõt ippãn doon. (Ep. 4:3, UBS) Innem ilo raan ko m̦okta jãn iien Kwõjkwõj eo, el̦aptata ilo jo̦teenin raanin Kwõjkwõj eo, em̦m̦an ñe kwõj lukkuun l̦õmn̦ak kõn wãween am̦ kõm̦m̦an ñan ro jet. Kwõn kajitũkin eok make: ‘Ealikkar ke ippãn ro rejel̦ã kajjieõ bwe ijjab dãpij aõ illu ippãn ro rar kõmetak eõ? Ro jet remaroñ ke kile bwe ij lukkuun kate eõ ñan kõm̦m̦an bwe en wõr aenõm̦m̦an im kal̦apl̦o̦k an wõr bõrokuk?’ Eokwe, kajjitõk kein rej jet kajjitõk ko relukkuun aorõk im jej aikuj l̦õmn̦ak kaki.

14. Ewi wãween jemaroñ kwal̦o̦k bwe jej ‘yokwe im jipañ doon’?

¹⁴ Ta wãween eo kein kãmen jemaroñ kõm̦m̦ane ñan kal̦apl̦o̦k an wõr bõrokuk? Ej ilo ad anõke Jeova im kwal̦o̦k yokwe. (1 Jon 4:8) Jejjab maroñ ba, “Ij aikuj yokwe ro jeiũ im jatũ ak ijjab aikuj epaake er.” El̦aññe jej bõk l̦õmn̦ak rot in, alikkar bwe jejjab l̦oore naanin kakapilõk eo an Paul ñan ‘yokwe im jipañ doon.’ (Ep. 4:2, UBS) Paul ear jab baj ba wõt bwe jen “jipañ doon,” ak ekar ba bwe jen kõm̦m̦ane men in ilo “yokwe.” Ewõr oktak ilo wãween kein ruo, ñe jej jipañ ro jet kõnke ej menin aikuj im ñe jej jipañ er kõnke jej yokwe er. Ilo eklejia ko ad, armej ro ie reoktak jãn doon im em̦õj an Jeova kepaakl̦o̦k er ñane. (Jon 6:65) Alikkar bwe Jeova ear lo wãween ko rem̦m̦an ippãer im ej yokwe er. Innem, el̦aññe Jeova ej yokwe rein, etke jemaroñ ba bwe jejjab aikuj in yokwe ro jeid im jatid? Alikkar bwe jej aikuj in bar yokwe er ilo wãween eo Jeova ekõn̦aan.​—1 Jon 4:20, 21.

15. Etke jejel̦ã bwe juon iien enaaj jem̦l̦o̦k ad kõm̦m̦ane Kwõjkwõjin Mej eo an Jesus?

¹⁵ Juon iien, enaaj jem̦l̦o̦k ad kõm̦m̦ane Kwõjkwõjin Mej eo an Jesus. Etke jejel̦ã men in? Paul ear ba bwe ilo ad keememej mej eo an Jesus kajjojo iiõ, ‘jej kwal̦o̦k mej eo an Irooj ñan iien eo Ej itok.’ (1 Ko. 11:26) Jesus ear bar kwal̦o̦k kõn an naaj “itok” ilo kanaan eo an kõn raan ko ãliktata. Ke ear kõnnaan kõn eñtaan eo el̦ap me ej pojakin wal̦o̦k, ear ba: “Ilo iien eo kõkal̦l̦en Nejin armej enaaj weaak ilañ, im ilo iien eo bwij otemjej ilal̦ renaaj bũrom̦õj, im renaaj lo Nejin Armej ej itok ilo kõdo̦ ko ilañ, kõn kajoor im aiboojoj el̦ap. Im enaaj jilkinl̦o̦k enjel̦ ro An kõn jilel im el̦ap ainikien, im renaaj ko̦kweilo̦ktok ro ar kããlõt er jãn emãn kõto, jãn turin lañ ñan ijen̦ im ijen̦.” (Matu 24:29-31) Jesus enaaj “ko̦kweilo̦ktok ro ar kããlõt er” ñe enaaj ain aolep rũkkapit ro rej pãd wõt ijin ioon lal̦ im bõk er ñan lañ. Men in enaaj wal̦o̦k ãlikin an jino eñtaan eo el̦ap im m̦okta wõt jãn an naaj jino Armagedon. Im ilo naaj tarin̦ae in, Jesus, ekoba aolep ro uwaan 144,000, renaaj tarin̦aeik kiiñ ro an lal̦ im renaaj bõk anjo̦ ioer. (Rev. 17:12-14, UBS) Kõn men in, jenaaj kõm̦m̦ane Kwõjkwõjin Mej eo an Jesus ãliktata m̦okta jãn an Jesus “itok” im ain aolep rũkkapit ro.

16. Etke kwõj kate eok bwe kwõn pãd ilo iien Kwõjkwõj eo enaaj wal̦o̦k ilo iiõ in?

¹⁶ Kate eok bwe kwõn maroñ pãd ilo iien Kwõjkwõjin Mej eo an Jesus ilo naaj M̦aaj 31, 2018. Bareinwõt, kajjitõk ippãn Jeova bwe en jipañ eok ñan kõm̦m̦ane ijo kun̦aam̦ ñan kal̦apl̦o̦k an wõr bõrokuk ibwiljin armej ro an. (Riit Sam 133:1.) Keememej bwe juon iien enaaj jem̦l̦o̦k ad kõm̦m̦ane Kwõjkwõjin Mej eo an Jesus. M̦ae iien en̦, jen kate kõj aolep bwe jen pãd ilo iien Kwõjkwõj eo kajjojo iiõ im kaorõk ad bõrokuk ilo iien Kwõjkwõj in.