Jebta im eoon ko ilo bok in rej kaalikkar bwe rijjilõk Paul ear kõnono kõn ennaan eo Anij ej kwal̦o̦ke kõn karõk ko an, im ennaan in epãd ilo Baibõl̦.

Ekkã an bok ko ad kwal̦o̦k kõn Hibru 4:12 ñan kaalikkar bwe Baibõl̦ emaroñ ukot mour ko an armej ro, im elukkuun jejjet ñan ad ba men in. Bõtab, bwe jen maroñ lukkuun mel̦el̦e kõn eoon in, em̦m̦an ñan etale ta ko Paul ear kõnnaan kaki m̦okta jãn an ba naan ko ilo Hibru 4:12. Paul ear rõjañ RiHibru ro jein im jatin bwe ren l̦oore karõk ko an Anij. Elõñ iaan karõk kein an em̦õj jei ilo jeje ko rekkwõjarjar. Ke Paul ear rõjañ er ñan kõm̦m̦ane men in, ear waanjoñak kõn bwebwenatoun RiIsrael ro ke kar lo̦mo̦o̦ren er jãn Ijipt. Ear wõr ippãer jeraam̦m̦an eo ñan jolõt ãneen kallim̦ur eo. Ãne in ear juon ãne “eibwijleplep kõn milik im honey,” im juon jikin remaroñ kakkije im aenõm̦m̦an ie.​—Exodus 3:8; Duteronomi 12:9, 10.

Eñin kar karõk eo an Anij ñan er. Bõtab RiIsrael ro rar jab pokake im rar jab kwal̦o̦k aer tõmak. Kõn men in, enañin aolepeer rar jab del̦o̦ñ ilowaan kakkije in an Anij. (Bõnbõn 14:30; Joshua 14:6-10, UBS) Bõtab, Paul ear kaalikkar bwe kallim̦ur in ñan del̦o̦ñ ilo kakkije eo an Anij ej wõnm̦aanl̦o̦k wõt. Ear ba bwe “Anij ear likũt an kallim̦ur ñan kõj bwe jen maroñ del̦o̦ñ im kakkije ippãn.” (Hibru 3:16-19, UBS; 4:1, UBS) Ilo m̦ool, “kallim̦ur” in ej m̦õttan ennaan eo Anij ej kwal̦o̦ke kõn karõk ko an. Ãinwõt kar RiHibru ro, jemaroñ katak kõn ennaan in Anij ej kwal̦o̦ke im l̦oore. Paul ear kaalikkar bwe kallim̦ur in ej pedped ioon Jeje ko ke ear ãliji jet iaan naan ko ilo Jenesis 2:2 im Sam 95:11.

Kõnke kallim̦ur eo an Anij ñan del̦o̦ñ ilowaan kakkije eo an ej wõnm̦aanl̦o̦k wõt, men in ej aikuj in kõm̦akũt kõj. Jej lukkuun tõmak bwe ewõr ippãd jeraam̦m̦an eo ñan del̦o̦ñ ilowaan kakkije eo an Anij me Baibõl̦ ej kwal̦o̦k kake, im elõñ men ko jaar kõm̦m̦ani bwe jen maroñ del̦o̦ñ ilowaan kakkije eo an. Jaar jab kõm̦m̦ane men in ilo ad l̦oore Kien Moses ak ilo ad kõm̦m̦ani jerbal ko rem̦m̦an ñan baj kabuñbũruon wõt Jeova. Bõtab jaar kõm̦m̦ane men in ke jaar kwal̦o̦k ad tõmak im m̦õn̦õn̦õ in l̦oore wõt karõk ko an Anij me ear kwal̦o̦ki ñan kõj. Bareinwõt, ãinwõt an kar jinoin katak in kaalikkar, elõñ to̦ujin armej ipel̦aakin lal̦ in rar jino katak Baibõl̦, im kõn men in rar maroñ katak im jel̦ã kõn karõk ko an Anij. Elõñ iaaer rar m̦õn̦õn̦õ in ukot mour ko aer, kwal̦o̦k aer tõmak, im peptaij. Men in ej kam̦ool bwe “naanin Anij ej mour im jerbal wõt.” Ealikkar bwe ennaan eo Anij ej kwal̦o̦ke ñan kõj ilo Baibõl̦ kõn karõk ko an, em̦õj an kõm̦akũt kõj im jelõt mour ko ad, im enaaj wõnm̦aanl̦o̦k wõt ilo an jelõt mour ko ad.