“EL̦AP jonikkan, ak eiiet rũm̦adm̦õd in ainitok. Kom̦win akwel̦ap ñan irooj in jonikkan bwe en jilkinl̦o̦k elõñ rijerbal in aini jonikkan eo an.” (Luk 10:2, UBS) Naan kein me Jesus ear kwal̦o̦ki 2,000 iiõ ko remootl̦o̦k el̦ap aer jejjet ñan juon men ej wal̦o̦k ilo Myanmar rainin. Etke? Kõnke ilo Myanmar, ewõr 4,200 wõt rukwal̦o̦k naan ro rej kajeedede ennaan eo em̦m̦an ñan 55 milien armej ro ijin.

Bõtab em̦õj an “irooj in jonikkan” eo Jeova, tõpar bũruon elõñ to̦ujin ro jeid im jatid jãn kajjojo aelõñ. Kõn men in, em̦õj an rein em̦m̦akũtl̦o̦k ñan aelõñ in me ej pãd ilo Southeast Asia ñan jipañ jerbalin kwal̦o̦k naan eo ijin. Ta eo ear kõm̦m̦an bwe rein ren m̦õn̦õn̦õ in em̦m̦akũt jãn ijoko jikier? Ta eo ear jipañ er bwe ren maroñ em̦m̦akũt ñan aelõñ in? Im ta jeraam̦m̦an ko rej loi? Eokwe em̦m̦an jen lale.

Jet iiõ ko remootl̦o̦k, juon bainier ilo Japan etan Kazuhiro, ear jino bõk nañinmej in dibubbub im l̦otl̦o̦k im kar aikuj bõkl̦o̦k ñan aujpitõl̦. Taktõ eo ear ba ñane bwe ejjab aikuj in kattõr wa ium̦win ruo iiõ. Kazuhiro ear ikkũm̦l̦o̦k im kajjitõk ippãn make, ‘Kiiõ enaaj ewi wãween aõ maroñ wõnm̦aanl̦o̦k im kõm̦m̦ane jerbal eo em̦m̦an ippa ñan bainier?’ Kõn men in, ear akwel̦ap im jar ñan Jeova bwe en kõpel̦l̦o̦k juon ial̦ bwe en maroñ wõnm̦aanl̦o̦k wõt im bainier.

Kazuhiro ej ba: “Juon allõñ tokãlik, juon m̦õtta me ej jerbal ilo Myanmar ear roñ kõn nañinmej e aõ. Ear calle tok eõ im ba: Ilo Myanmar e, ekkã am uwe ilo bus im itoitak. Im ñe kwõnaaj itok ñan ije, kwõmaroñ naaj wõnm̦aanl̦o̦k wõt im kwal̦o̦k naan im jab aikuj kõjerbale wa eo waam̦! Iar kajjitõk ippãn taktõ eo aõ el̦aññe em̦m̦an ñan aõ etal ñan Myanmar kõn nañinmej e aõ. Im iar bwilõñ ke taktõ eo aõ ear ba: ‘Ewõr juon taktõ in kõmãlij jãn Myanmar ej itok ñan Japan kiiõ im inaaj kwal̦o̦k kajjiem̦ ñane. Im ñe kwõnaaj bar bõk nañinmej n̦e am̦, jab inepata bwe enaaj jipañ im lale eok.’ Iar kile bwe men eo taktõ eo ear ba ej uwaak eo jãn Jeova.”

Kazuhiro ear m̦õkaj im jejel̦o̦k ñan ra eo ilo Myanmar im kwal̦o̦k bwe erro kõrã eo pãleen kõn̦aan jerbal ilo aelõñ in im bainier ie. Ium̦win wõt l̦alem raan tokãlik, ra eo ear uwaake im ba, “Itok bwe el̦ap am aikuj bainier!” Kazuhiro im kõrã eo pãleen, Mari, rar wiakake wa ko waerro, kõm̦m̦an aerro visa, im wia aerro ticket. Kiiõ, erro ej m̦õn̦õn̦õ ilo aerro pãd ilo kurub eo an ro rejarroñroñ ilo Mandalay. Kazuhiro ej ba: “Am̦ro kar iioone men in, ekõm̦m̦an bwe en l̦apl̦o̦k am̦ro tõmak kallim̦ur eo ilo Sam 37:5 (UBS) me ej ba: ‘Kom̦win lel̦o̦k kom̦ make ñan Irooj; Lõke e im enaaj jipañ kom̦.’”

Ilo iiõ eo 2014, ear wõr juon jeraam̦m̦an ippãn Ri Kõnnaan ro an Jeova ilo Myanmar ñan kõm̦m̦ane juon kweilo̦k el̦ap (special convention). Elõñ ro jeid im jatid jãn jikin ko jet rar itok im pãd ilo kweilo̦k el̦ap in. Juon iaaer ej Monique, juon jeid im jatid kõrã jãn Amedka me 34 an iiõ ej ba: “Ãlikin aõ kar ro̦o̦l jãn kweilo̦k el̦ap eo, iar jar ñan Jeova kõn ta eo imaroñ kõm̦m̦ane tokãlik ilo mour eo aõ. Bareinwõt, iar kõnnaan ippãn jinõ im jema kõn mejãnkajjik ko aõ ilo doulul in. Kõmar aolep l̦õmn̦ak bwe ij aikuj ro̦o̦l ñan Myanmar, ijoke ear bõk jidik iien im iar aikuj lukkuun jar bwe en maroñ tõprak mejãnkajjik in aõ.” Monique ej kõmel̦el̦e unin an kar ãindein.

Ej ba, “Jesus ear rõjañ rũkal̦oor ro an bwe ren ‘pepe kõn on̦ããn.’ Kõn men in iar kajjitõk ippa make: ‘Imaroñ ke em̦m̦akũt ñan ijin im jipañ? Inaaj ke kabwe aikuj ko aõ make ilo aelõñ in ijello̦kun aõ jol̦o̦k el̦ap iien im jerbal?’” Monique ej wõnm̦aanl̦o̦k im ba: “Iar m̦õkaj im kile bwe ejabwe jããn ñan aõ em̦m̦akũt ñan bar juon jikin ilo lal̦ in.” Innem ewi wãween an kar Monique em̦m̦akũt?​—Luk 14:28.

Monique ej ba: “Juon raan bo̦o̦j eo aõ ear kajjitõk bwe in etal im kõnnaan ippãn. Iar lukkuun ikkũm̦kũm̦ im l̦õmn̦ak bwe enaaj kam̦õj aõ jerbal. Bõtab ijello̦kun an kar kõm̦m̦ane men in, ear kam̦m̦oolol eõ kõn an em̦m̦an aõ jerbal. Innem ear ba ñan ña bwe ear kõm̦m̦an karõk ñan letok aõ bonus. Im iar bwilõñ bwe joñan bonus eo ear letok ekar joñan wõt jããn eo iar aikuji ñan kõl̦l̦ãik m̦uri ko aõ.”

Monique ear jerbal ilo Myanmar jãn kar Tijem̦ba 2014 eo. Ewi wãween an l̦õmn̦ak kõn an jerbal ilo juon jikin el̦ap aikuj jipañ ie? Ej ba: “Ilukkuun m̦õn̦õn̦õ in pãd ijin im jipañ. Ewõr jilu armej ij katak Baibõl̦ ippãer. Juon iaan ro ij katak Baibõl̦ ippãer ej 67 an iiõ, im aolep iien ej yokyokwe eõ, ettõñdikdik ñan eõ, im atbo̦kwõj eõ. Ke ear katak im jel̦ã bwe etan Anij ej Jeova, ear to̦o̦r dãnnin kõmjaal̦al̦ jãn mejãn. Ej ba: ‘Ej kab kein kajuon in aõ roñ bwe etan Anij ej Jeova. Kwõlukkuun dik jãn ña, ak kwaar katakin eõ kõn juon men elukkuun aorõk.’ Joñan an kar men in tõpar bũruõ, ear bar to̦o̦r dãnnin kõmjaal̦al̦ jãn meja. Bwebwenato rot kein rej kõm̦m̦an bwe in lukkuun m̦õn̦õn̦õ ilo aõ kwal̦o̦k naan ilo juon jikin me el̦ap aikuj jipañ ie.” Tokãlik, Monique ear bõk jeraam̦m̦an eo ñan etal im pãd ilo Jikuul̦ eo ñan Rukwal̦o̦k Naan ro an Aelõñ Eo.

Un eo juon unin an kar jet etal ñan Myanmar ej kõn bwebwenato eo kar kwal̦o̦ke kõn aelõñ in ilo Yearbook eo an Ri Kõnnaan ro an Jeova an 2013. Juon jeid im jatid kõrã 30 jim̦a an iiõ etan Li ear jokwe ilo Southeast Asia. Ekar wõr juon an jerbal full-time, ak bwebwenato eo ilo Yearbook in ear kõm̦akũti ñan kõn̦aan kwal̦o̦k naan ilo Myanmar. “Ilo 2014 eo ke iar etal ñan kweilo̦k el̦ap eo ilo Yangon, iar iioone ruo rippãlele me rar em̦m̦akũt ñan jipañ ilo teretore eo an RiChina ilo Myanmar. Kõnke ijel̦ã kajin China, iar pepe in em̦m̦akũt ñan Myanmar bwe in jipañ kurub eo an RiChina ro ijo. Iar iioon Monique im kõm̦ro ar kõm̦m̦an pepe ñan em̦m̦akũt ñan Mandalay. Jeova ear kõjeraam̦m̦an kõm̦ro ilo am̦ro jim̦or bõk jerbalin rũkaki part time ilo juon jikuul̦. Bareinwõt kõm̦ro ar bar loe juon apartment epaake im̦õn jikuul̦ eo. Meñe mejatoto eo ijin ebwil im ewõr jet men ko ijjab imminene kaki, ak el̦ap aõ m̦õn̦õn̦õ ilo aõ kwal̦o̦k naan ijin. Meñe el̦amwaan wãween mour eo an armejin Myanmar, ak rejouj im rem̦õn̦õn̦õ in jol̦o̦k iien ñan roñjake ennaan eo em̦m̦an. El̦ap ad m̦õn̦õn̦õ in loe wãween an Jeova kam̦õkajl̦o̦k jerbal in. Im ij lukkuun tõmak bwe ej ankilaan Jeova bwe in pãd ijin ilo Mandalay.”

Elõñ ro rar em̦m̦akũt im jipañ ilo ijoko el̦ap aikuj ie rar lo joñan an aorõk jar. L̦õmn̦ak kõn Jumpei im kõrã eo pãleen etan Nao, me 30 jim̦a aerro iiõ. Erro ar jipañ eklejia eo an ro rejarroñroñ ilo Japan. Ak etke erro ar em̦m̦akũt ñan Myanmar? Jumpei ej ba: “Ekar juon mejãnkajjik ñan am̦ro kõrã eo ippa etal im jipañ ilo juon aelõñ el̦ap aikuj jipañ ie. Juon jeid im jatid em̦m̦aan ilo eklejia eo  an ro rejarroñroñ ilo Japan me kõmij pãd ie ear em̦m̦akũt ñan Myanmar. Meñe ekar jab lukkuun l̦ap jããn ippemro, ak kõm̦ro ar em̦m̦akũt ilo kar Mãe 2010. Ro jeid im jatid ilo Myanmar rar lukkuun karwainene kõm!” Ewi wãween an kar em̦m̦aan in jeid im jatid l̦õmn̦ak kõn an jipañ ilo teretore eo an ro rejarroñroñ ilo Myanmar? Ej ba: “El̦ap an armej ro rejarroñroñ itoklimo kõn ennaan in. Ñe kõmij kwal̦o̦kl̦o̦k pija ko ad kõn ro rejarroñroñ, relukkuun bwilõñ. El̦ap am̦ro m̦õn̦õn̦õ kõn am̦ro kar pepe in em̦m̦akũttok ñan ijin im jerbal ñan Jeova!”

Ewi wãween an kar Jumpei im Nao kijenmej wõt meñe ear jab lukkuun l̦ap jããn ippãerro? Jumpei ej ba: “Ãlikin jilu iiõ, kõm̦ro ar kõjerbal enañin aolepen jããn eo kõm̦ro ar kakon̦e, kõn men in ear jabwe jããn ñan am̦ro kõl̦l̦ã on̦ããn rent ilo iiõ eo tok juon. Elõñ alen am̦ro kõrã eo ippa jar im akwel̦ap bwe Jeova en jipañ kõm. Ak juon iien, ear wõr juon am̦ro lõta jãn ra eo im rar kũr kõm̦ro ñan bõk jerbalin jipejel̦ bainier ium̦win jidik iien. Kõm̦ro ar lõke Jeova im lo bwe ear jab mel̦o̦kl̦o̦k kõm̦ro, im ej jipañ kõm̦ro ilo elõñ wãween ko.” Jumpei im Nao rar bar etal ñan Jikuul̦ eo ñan Rukwal̦o̦k Naan ro an Aelõñ Eo.

Ta eo ear kõm̦akũt Simone, juon jeid im jatid em̦m̦aan 43 an iiõ im ej jãn Italy, im kõrã eo ippãn, Anna, me 30 jim̦a an iiõ im ej jãn New Zealand, ñan em̦m̦akũt ñan Myanmar? Anna ej ba: “Bwebwenato eo ilo Yearbook eo an 2013 kõn Myanmar ear kõm̦akũt kõm̦ro ñan kõm̦m̦ane men in!” Simone ej ba: “Ej juon jeraam̦m̦an el̦ap ñan pãd ilo Myanmar. Kõn an pidodol̦o̦k wãween mour ilo ijin, emaroñ l̦apl̦o̦k iien ñan aõ kõm̦m̦ane jerbal eo an Jeova. El̦ap ad m̦õn̦õn̦õ in lo an Jeova kwal̦o̦k an kea kake kõj ñe jej jerbal ilo juon jikin el̦ap aikuj ie.” (Sam 121:5, UBS) Anna ej ba: “El̦apl̦o̦k aõ m̦õn̦õn̦õ jãn kar m̦okta. Bareinwõt el̦amwaan wãween mour eo am̦ro. El̦apl̦o̦k aõ iien ippãn l̦eo ippa im el̦apl̦o̦k am̦ro epaake doon. Ejjab men in wõt ak elõñ ro kom̦ro ej kab jel̦ã kajjier im m̦õttãik er. Armej ro rejjab kwal̦o̦k aer kalijekl̦o̦k ñan Ri Kõnnaan ro an Jeova im el̦ap am̦ro bwilõñ kõn an armej ro ilo teretore eo lukkuun itoklimo in roñjake!” Ewi wãween?

Anna ej ba: “Juon raan, iar kwal̦o̦k naan ilo juon jikin wia ñan juon jiroñ me ej jikuul̦ ilo university im iar kõm̦m̦an karõk ippãn bwe in bar iioone tokãlik. Ke iar bar iioone, ear bõktok juon m̦õttan ippãntok. Iien eo tok juon, ebar bõktok jet jiroñ. Tokãlik ear lõñl̦o̦k jiroñ ro ear bõktok er. Im kiiõ ij katak Baibõl̦ ippãn l̦alem iaaer.” Simone ej ba: “Armej ro ilo teretore eo rejouj im rekõn̦aan jel̦ã kõn ennaan eo im elõñ relukkuun itoklimo. Joñan, ejabwe iien ñan ammim katak ippãn aolep rein reitoklimo.”

Ak ta eo juon armej ej aikuj kõm̦m̦ane im l̦õmn̦ak kake ñe ej pepe in em̦m̦akũt ñan Myanmar? Mizuho jãn Japan ej ba: “Eto am̦ro l̦eo ippa, Sachio, kõn̦aan etal im jipañ ilo juon aelõñ me el̦ap aikuj jipañ ie, ak ia eo kõm̦ro maroñ etal ñane? Eokwe ãlikin am̦ro riiti bwebwenato eo kõn aelõñin Myanmar ilo Yearbook eo an 2013, men in ear lukkuun tõpar bũruemro im kõm̦ro ar jino l̦õmn̦ak el̦aññe kõm̦ro maroñ etal im jipañ ilo Myanmar.” Sachio ej ba: “Kõm̦ro ar pepe ñan etal ñan jikin eo el̦ap ilo Myanmar etan Yangon im pãd ie ium̦win juon  wiik ñan etale jikin in. Meñe ejjab lukkuun aetok am̦ro kar pãd, ak men ko kom̦ro ar katak kõn jikin in rar kaalikkar bwe eñin ej ijo kõm̦ro en em̦m̦akũttok ñane.”

Rodney im kõrã eo pãleen etan Jane jãn Australia, me 50 jim̦a aerro iiõ, im bareinwõt l̦adik eo nejierro Jordan, im ledik eo nejierro Danica, rar jipañ ilo aelõñin Myanmar jãn iiõ eo 2010. Rodney ej ba: “Ke kõmar lo an armej ro kõn̦aan jel̦ã kõn m̦ool eo, men in ear lukkuun kõm̦akũt kõm. Ikõn̦aan lukkuun rõjañ baam̦le ko jet bwe ren kajjioñ jipañ ilo jikin ko el̦ap aikuj jipañ ie ãinwõt Myanmar.” Etke? Ej wõnm̦aanl̦o̦k im ba: “An kar baam̦le eo ammim em̦m̦akũttok im jipañ ijin ear jipañ kõm ñan epaakel̦o̦k Jeova. Elõñ jo̦dikdik ro el̦ap aer jol̦o̦k el̦ap iien kõn jeel̦boon ko nejier, poub kõn wa ko waer, jerbal ko aer, im men ko jet. Bõtab el̦ap an ajri ro nejũm̦ro poub ilo aer katak naan ko rekããl ilo kajin Burma me remaroñ kõjerbali ilo kwal̦o̦k naan. Rej kajjioñ katak ñan jel̦ã kilen jipañ ro rejjab jel̦ã kõn Baibõl̦ im wãween aer maroñ uwaak ilo iien kweilo̦k ko ilo kajin in ekããl, im rej bar poub ilo elõñ m̦akũtkũt ko rekãitoktoklimo ilo doulul in.”

Juon jeid im jatid em̦m̦aan me 37 an iiõ im ej jãn Amedka etan Oliver , ej kwal̦o̦k unin an kõn̦aan rõjañ ro jet bwe ren bar kõm̦m̦ane jerbal in, ej ba: “Elõñ tokjãn ko rem̦m̦an ij loi ilo aõ karejar ñan Jeova ilo juon jikin ijjab lukkuun imminene kõn wãween mour eo ie. Aõ kar em̦m̦akũt jãn ijo jikũ ear jipañ eõ bwe en l̦apl̦o̦k aõ lõke Jeova jekdo̦o̦n ta wãween ko ij iiooni. Ilo aõ jerbal ippãn ro me iar jab jel̦ã kajjier m̦okta im rej tõmak men ko ij tõmaki, men in ear lukkuun jipañ eõ ñan kile bwe ejjel̦o̦k bar juon men ilo lal̦ in eaorõkl̦o̦k jãn Aelõñ eo an Anij.” Rainin, Oliver im kõrã eo ippãn, Anna, rej wõnm̦aanl̦o̦k im kijejeto ilo aerro kwal̦o̦k naan ilo teretore eo an RiChina ro.

Trazel, juon jeid im jatid kõrã jãn Australia, me 52 an iiõ, ear jipañ ilo Myanmar jãn kar 2004. Ej ba: “Ñan ro im ewõr aer maroñ, ikõn̦aan rõjañ kom̦ ñan etal im jipañ ilo ijoko el̦ap aikuj jipañ ie. Em̦õj aõ loe bwe ñe kwõj m̦õn̦õn̦õ in jipañ, Jeova enaaj lukkuun kõjeraam̦m̦an eok kõn am̦ kate eok. Ejjel̦o̦k aõ kar kõtmãne ke enaaj kar ãindein wãween mour e aõ. El̦ap aõ m̦õn̦õn̦õ im ij lo tokjãn ko ilo mour e aõ kõn aõ kar kõm̦m̦ane pepe in elukkuun em̦m̦an.”

Ejjel̦o̦k pere bwe naan kein an rein jeid im jatid me rar em̦m̦akũt im jipañ ilo Myanmar, rej lukkuun kõm̦akũt eok ñan kõn̦aan jipañ armej ro em̦ool bũrueer ilo teretore ko me jejjañin etal im kwal̦o̦k naan ie. Aet, ro jeid im jatid me rar em̦m̦akũt im jipañ ilo Myanmar rej kajjitõk ippãd im ba, “Jouj im itok ñan Myanmar im jipañ kõm!”