Jen lale etke ejjab jejjet im jim̦we mel̦el̦e in. Juon jeid im jatid em̦m̦aan me l̦adik eo nejin ear bõk mour eo an make, ear kajjitõk im ba: ‘Jeova ear ke etale joñan maroñ ko am̦ro lio ippa im l̦õmn̦ak bwe kõm̦ro naaj maroñ kijenmej ñe l̦adik eo nejũm̦ro enaaj kar bõk mour eo an make? Men in ear ke wal̦o̦k kõnke Anij ear pepel̦o̦k im̦aan bwe kõm̦ro naaj maroñ kijenmej kake?’ Ejim̦we ke ñan ad tõmak bwe Jeova ej kããlõt wãween ko jenaaj iiooni ilo mour ko ad?

Ñe jenaaj bar etale naan kein an Paul ilo 1 Korint 10:13, men in enaaj jipañ kõj ñan kile juon men eaorõk. Ta in? Jenaaj kile bwe Baibõl̦ ejjab rejetak mel̦el̦e in bwe Jeova ej etale kõj m̦okta ñan lale joñan eo jemaroñe innem kããlõt ta mãlejjoñ ko jenaaj iiooni. Jen etale 4 un ko unin ad maroñ tõmak bwe ejjab jim̦we mel̦el̦e in.

Kein kajuon, Jeova ear lel̦o̦k ñan armej anemkwõj in kããlõt. Ekõn̦aan bwe jen make kããlõt ak pepe kõn ta ko jenaaj kõm̦m̦ani ilo mour ko ad. (Dt. 30:19, 20, UBS; Jos. 24:15) El̦aññe jej kããlõt ñan kõm̦m̦ani men ko rejim̦we, innem jemaroñ atartar ioon Jeova kõnke enaaj tõl im jipañ kõj. (JK. 16:9, UBS) Bõtab el̦aññe jej kããlõt ñan kõm̦m̦ani men ko renana, jenaaj iioon apañ ak tokjãn ko renana. (Ga. 6:7, UBS) Kõn men in, el̦aññe Jeova enaaj kar kããlõt mãlejjoñ ko jenaaj iiooni, men in enaaj kar kaalikkar an bõbrae kõj jãn ad kõjerbal anemkwõj in kããlõt eo ad.

Kein karuo, jorrããn ak “jerata ej wal̦o̦k ñan jabdewõt armej.” (Ekl. 9:11, UBS) Jet iien jej iioon jorrããn ak l̦aanwõtwõt ilo iien ko ejjel̦o̦k ad kõtmãne bwe renaaj kar wal̦o̦k. Juon iien Jijej ear kwal̦o̦k kõn an kar juon em̦ eutiej okjak im buñut 18 armej im kõm̦m̦an bwe ren mej, im ear kaalikkar bwe Anij ear jab karõk ak pepe bwe rein ren kar pãd ilo l̦aanwõtwõt in. (Luk 13:1-5, UBS) Kõn men in, ejjab jim̦we ñan ba bwe Anij ej pepe l̦o̦k im̦aan kõn wõn ro renaaj mour wõt im wõn ro renaaj mej ñe ej wal̦o̦k jorrããn im l̦aanwõtwõt ko ilo idiñ.

Kein kajilu, kõj kajjojo jej aikuj kaalikkar ad tiljek wõt ñan Anij. Setan ear riab n̦ae aolep rũkarejar ro an Jeova ilo an kar ba bwe ejjel̦o̦k juon iaaer enaaj dãpij wõt an tiljek ñan Jeova ñe ej iioon mãlejjoñ ko. (Job 1:9-11; 2:4; Rev. 12:10) El̦aññe Jeova ej bõbrae an wal̦o̦k apañ im mãlejjoñ ko ñan kõj kõnke ej l̦õmn̦ak bwe jeban maroñi, men in enaaj kar kam̦ool naan ko an  Setan ke ear ba bwe unin ad karejar ñan Anij ejjab kõnke jej yokwe e ak kõnke jekõn̦aan bwe en kajeraam̦m̦an kõj.

Kein kãmen, meñe ewõr an Jeova maroñ ñan jel̦ã kobban ilju im jekl̦aj ak ejjab aolep iien ej kõjerbale maroñ in an bwe en jel̦ã kõn aolep men ko renaaj wal̦o̦k ñan kõj. El̦aññe Anij ej kããlõt im pepe l̦o̦k im̦aan kõn ta mãlejjoñ ko renaaj wal̦o̦k ñan kõj, mel̦el̦ein bwe ej aikuj m̦okta jel̦ã kõn aolep men ko renaaj wal̦o̦k ñan kõj. Bõtab mel̦el̦e in ejjab pedped ioon Baibõl̦. M̦ool bwe ewõr an Anij maroñ ñan jel̦ã kõn kobban ilju im jekl̦aj. (Ais. 46:10, UBS) Bõtab, Baibõl̦ ej kaalikkar bwe Anij ej kõjerbale maroñ in an jet iien. (Jen. 18:20, 21, UBS; 22:12) Ilo an kõjerbal maroñ in an ilo wãween in, ej kwal̦o̦k an kautiej anemkwõj in kããlõt eo ad. Jej tõmak men in kõnke Jeova ekõn̦aan bwe jen kõjerbal anemkwõj in kããlõt eo ad im aolep iien ejim̦we men ko ej kõm̦m̦ani.​—Dt. 32:4; 2 Ko. 3:17, UBS.

Innem ta mel̦el̦ein an kar Paul ba bwe ‘Anij . . . ejjãmin likũt bwe ren kapo kõj el̦ap jãn ad maroñ’? Ilo eoon in, Paul ej kwal̦o̦k kõn men eo Jeova ej kõm̦m̦ane ilo iien eo jej iioon mãlejjoñ, im ejjab kõn iien eo m̦okta jãn ad iioon mãlejjoñ. * (Lale kõmel̦el̦e eo itulal̦.) Naan kein an rijjilõk Paul rej kaenõm̦m̦an kõj kõnke ej kaalikkar bwe jekdo̦o̦n ta apañ ak mãlejjoñ ko jej iiooni, Jeova enaaj kõkajoor im jipañ kõj el̦aññe jej lõke im reilo̦k wõt ñane. (Sam 55:22) Naan kein rekaenõm̦m̦an an Paul rej pedped ioon ruo mel̦el̦e ko rem̦ool.

Kein kajuon, ‘ejjel̦o̦k menin kapo ej wal̦o̦k ñan kõj, ak eo wõt armej rej maroñe.’ Mel̦el̦ein bwe ro jet rej iioon ejja mãlejjoñ ko wõt jej iiooni. Mãlejjoñ kein rejjab l̦ap jãn joñan maroñ ko ad el̦aññe jej atartar wõt ioon Anij. (1 Pi. 5:8, 9) Ilo eoon ko m̦okta jãn 1 Korint 10:13, Paul ear kwal̦o̦k kõn menin kapo im mãlejjoñ ko RiIsrael ro rar iiooni ilo kar ãne jem̦aden. (1 Ko. 10:6-11) Mãlejjoñ kein RiIsrael ro rar iiooni rar jab l̦ap jãn joñan maroñ ko aer. Ekabũrom̦õjm̦õj bwe jet iaan RiIsrael ro rar l̦oor kõn̦aan ko aer rebõd kõnke rar jab atartar ioon Anij. Emãn alen an kar Paul kaalikkar im ba bwe “jet iaaer” rar jab pokake.

Kein karuo, “Anij etiljek.” Bwebwenato ko me rej kwal̦o̦k kõn wãween an kar Anij jipañ armej ro an rej kaalikkar bwe ej kwal̦o̦k an yokwe im tiljek ñan “ro rej yokwe e im pokaki kien ko an.” (Dt. 7:9, UBS) Bwebwenato kein rej bar kaalikkar bwe aolep iien Anij ej kajejjete kallim̦ur ko an. (Jos. 23:14) Anij ej kallim̦ur bwe: (1) Ejjãmin kõtl̦o̦k bwe mãlejjoñ ko jej iiooni ren l̦apl̦o̦k ñan joñan eo me jeban maroñe, im (2) “enaaj kõm̦m̦an ial̦ in ko” ñan kõj. Kõnke Anij ear kwal̦o̦k an tiljek ñan armej ro an ilo iien ko etto, ro im rej yokwe im pokake remaroñ lõke bwe enaaj bar kajejjet kallim̦ur kein an ñe rej iioon apañ im mãlejjoñ ko.

Ewi wãween an Jeova “kõm̦m̦an ial̦ in ko” ñan ro im rej atartar ioon ñe rej jelm̦aik mãlejjoñ ko? Ejjel̦o̦k pere bwe el̦aññe Jeova ekõn̦aan jol̦o̦k mãlejjoñ ak apañ ko jej iiooni, enaaj kar wõr an maroñ ñan kõm̦m̦ane men in. Bõtab jen keememej bwe Paul ear ba: “Ilo menin kapo [Jeova] enaaj kõm̦m̦an ial̦ in ko, bwe kom̦win maroñe.” Mel̦el̦ein bwe enañin aolep iien ñe Jeova ej “kõm̦m̦an ial̦ in ko” ej letok ñan kõj men ko jej aikuji bwe en wõr ad maroñ ñan kijenmej wõt ium̦win mãlejjoñ ko. L̦õmn̦ak m̦õk kõn jet iaan wãween kein Jeova ej jipañ kõj bwe jen maroñ kijenmej:

• Ej ‘kaenõm̦m̦ane kõj ilo jorrããn ak mãlejjoñ ko otemjej’ jej iiooni. (2 Ko. 1:3, 4) Jeova emaroñ kaenõm̦m̦an bũruod im l̦õmn̦ak ko ad ikijjeen naan ko an ilo Baibõl̦, jetõb kwõjarjar eo an, im katak ko an rem̦ool me rũkarejar eo etiljek im mãlõtlõt ej litok ñan kõj.​—Matu 24:45, UBS; Jon 14:16; Rom 15:4.

• Emaroñ tõl kõj ikijjeen jetõb kwõjarjar. (Jon 14:26, UBS) Ñe ej wal̦o̦k mãlejjoñ ko, jetõb kwõjarjar emaroñ jipañ kõj ñan keememej bwebwenato ak naanin kakapilõklõk ko ilo Baibõl̦, innem jenaaj jel̦ã ta ko rejim̦we jemaroñ kõm̦m̦ani.

• Emaroñ kõjerbal enjel̦ ro an ñan jipañ kõj.​—Hi. 1:14, UBS.

• Emaroñ jipañ kõj ikijjeen rũttõmak ro m̦õttad. Naan ko aer im men ko rej kõm̦m̦ani ñan jipañ kõj remaroñ “kaenõm̦m̦an” ak kõkajoor kõj.​—Kol. 4:11.

Innem kiiõ, ta mel̦el̦ein naan ko an Paul ilo 1 Korint 10:13? Jeova ejjab kããlõt ak pepe l̦o̦k im̦aan kõn ta mãlejjoñ ko jenaaj iiooni. Bõtab ñe jej iioon mãlejjoñ ak apañ ko, jemaroñ lõke bwe el̦aññe jenaaj atartar wõt ioon Jeova, ejjãmin kõtl̦o̦k bwe mãlejjoñ ko jej iiooni ren l̦apl̦o̦k ñan joñan eo jejjab maroñe. Bareinwõt, aolep iien enaaj “kõm̦m̦an ial̦ in ko” bwe jen maroñ kijenmej wõt ium̦win mãlejjoñ ko. Ejjel̦o̦k pere bwe ad jel̦a kõn men in ej lukkuun kaenõm̦m̦an kõj!