EKKÃ an armej ro kõn̦aan bwe ren m̦õn̦õn̦õ. Bõtab kõnke raan ko ãliktata kein, aolep armej rej iioon elõñ apañ kõn an ‘kanooj in pen mour.’ (2 Ti. 3:1, UBS) Ewõr jet ej jako aer lañlõñ kõn an jab jim̦we an ro jet kõm̦m̦an ñan er, kõn aer nañinmej, em̦õj jol̦o̦k er jãn jerbal ko aer, ak ñe ro rejitõnbõro ippãer rej mej. Im ro jet emaroñ jako aer lañlõñ kõn an wal̦o̦k apañ ko jet me rej kõm̦m̦an aer inepata im bũrom̦õj. Meñe ro rej karejar ñan Jeova ak er bareinwõt rej iioon men ko rej kõm̦m̦an aer ebbeer im jidik kõn jidik ej etal im jako aer lañlõñ. El̦aññe men in ej wal̦o̦k ñan eok, ta eo kwõmaroñ kõm̦m̦ane bwe kwõn bar lañlõñ?

Eokwe ñan uwaake kajjitõk in, m̦oktata jej aikuj in jel̦ã kõn lukkuun mel̦el̦ein lañlõñ, im ewi wãween an ro jet kar dãpij wõt aer lañlõñ meñe elõñ men ko reppen rar iiooni. Ãlikin ad etale men in, jenaaj katak kõn ta ko jemaroñ kõm̦m̦ani bwe en jab jako ad lañlõñ im ta ko jemaroñ kõm̦m̦ani ñan kal̦apl̦o̦k ad lañlõñ.

Lañlõñ eoktak jidik jãn em̦m̦õn̦õn̦õ ak ettõñtõñ. Ñan waanjoñak: Juon rũkadek emaroñ lukkuun l̦ap an ettõñ. Ak el̦ak jako an kadek, ejako an ettõñ im ej lo bwe ejjañin jako bũraabl̦õm̦ ko an. An kar ettõñ im em̦m̦õn̦õn̦õ ium̦win jidik wõt iien, ejjab m̦oolin lañlõñ.​—JK. 14:13.

Bõtab, lañlõñ ej juon eñjake ekajoor im ej pãd ilo bũruod. Im ej wal̦o̦k ñe jej bõk juon men em̦m̦an ak kijoorore men eo jej reim̦aanl̦o̦k ñane. Lañlõñ ej mel̦el̦ein m̦õn̦õn̦õ wõt jekdo̦o̦n ñe jej iiooni men ko rem̦m̦an ak men ko renana. (1 Te. 1:6, UBS) Ilo m̦ool, jemaroñ lañlõñ wõt meñe ewõr juon men jej inepata kake. Ñan waanjoñak, kar deñl̦o̦ke rijjilõk ro kõn aer kar kwal̦o̦k kõn Jesus. Meñe rar ãindein ñan er, ak rar “ilo̦k jãn im̦aan mejãn ro ripepe, im lañlõñ bwe em̦õj likũt er im tõllo̦kũn kõn aer eñtaan kõn Ãt eo.” (Jrb. 5:41) Alikkar bwe rar jab m̦õn̦õn̦õ im lañlõñ ke armej ro rar m̦an im kaeñtaan er, ak unin aer kar lañlõñ ej kõnke rar maroñ dãpij wõt aer tiljek ñan Anij.

Lañlõñ ejjab juon men eo jaar l̦otaktok kake im ejjab kajju wõr ippãd. Etke? Kõnke lañlõñ ej m̦õttan leen jetõb eo an Anij. Jetõb kwõjarjar eo an Anij ej jipañ kõj bwe jen oktak ñan juon ‘armej eo ekããl,’ me ekitibuj an m̦õn̦õn̦õ im lañlõñ. (Ep. 4:24; Ga. 5:22, UBS) Im ñe juon armej ej lañlõñ, enaaj pidodo an ineem̦m̦an im kijenmej ilo wãween ko reppen ej iiooni.

Kar kõn̦aan eo an Jeova ej bwe lal̦ in en obrak kõn men ko rem̦m̦an, ejjab men ko renana me jej loi ilo raan kein. Bõtab, men ko renana armej ro rej kõm̦m̦ani rejjab kõm̦m̦an bwe en jako an Jeova lañlõñ. Baibõl̦ ej ba: “Kajoor im m̦õn̦õn̦õ [ak lañlõñ] rej ilo jikin.” (1 Kr. 16:27) Bareinwõt, men ko rem̦m̦an rũkarejar ro an Jeova rej kõm̦m̦ani, rej kam̦õn̦õn̦õik im kalañlõñ bũruon.​—JK. 27:11.

Jemaroñ anõke Jeova ilo ad lañlõñ wõt im jab tarjen joñan ad inepata bwe ejab tõprak kar kõn̦aan  eo ad. Ijello̦kun ad inepata, jen l̦õmn̦ak kõn men ko rem̦m̦an rej wal̦o̦k kiiõ, im jen kijenmej im kõttar ñan iien eo men otemjej renaaj em̦m̦anl̦o̦k. *​—Lale kõmel̦el̦e eo itulal̦.

Elõñ waanjoñak ko ilo Baibõl̦ kõn armej ro me rar dãpij wõt aer lañlõñ meñe elõñ apañ ko rar iiooni. Juon iaaer ej Ebream. Ear jab jako an Ebream lañlõñ, jekdo̦o̦n ke mour eo an ear pãd ilo kauwõtata im ke ro jet rar kõm̦m̦an apañ ñane. (Jen. 12:10-20; 14:8-16; 16:4, 5; 20:1-18; 21:8, 9) Ta eo ear jipañe? Ej ilo an kar l̦õmn̦ak wõt kõn kõjatdikdik eo ñan mour ilo lal̦ eo ekããl ium̦win tõl eo an Messaia eo. (Jen. 22:15-18; Hi. 11:10, UBS) Jesus ear ba: “Jememi Ebream ear lañlõñ bwe enaaj lo Aõ raan.” (Jon 8:56) Jemaroñ anõke Ebream ilo ad l̦õmn̦ak wõt kõn jeraam̦m̦an ko jenaaj lañlõñ kaki ilju im jekl̦aj.​—Rom 8:21, UBS.

Ãinwõt Ebream, ear bar kajoor tõmak eo an Paul im Sailas, im erro ar dãpij wõt aerro lañlõñ meñe elõñ wãween ko reppen rar iiooni. Ñan waanjoñak, ãlikin aer kar m̦an erro im jol̦o̦k er ilowaan kalbuuj, im ear ‘lukwõn boñ, [erro ar] jar im al im wũjtake Anij.’ (Jrb. 16:23-25) Erro ar maroñ kijenmej kõnke rar l̦õmn̦ak kõn kallim̦ur ko an Anij kõn ilju im jekl̦aj. Bareinwõt, ilo aerro kar jel̦ã bwe unin aer kar kaeñtaan erro ej kõnke rej rũkal̦ooran Christ, men in ear kõm̦m̦an bwe ren lañlõñ. Jemaroñ anõke Paul im Sailas ilo ad keememej bwe ewõr tokjãn ko rem̦m̦an rej wal̦o̦k jãn ad tiljek wõt im karejar ñan Anij.​—Pil. 1:12-14, UBS.

Ilo bar raan kein, elõñ waanjoñak ko an ro jeid im jatid me rar dãpij wõt aer lañlõñ meñe rar jelm̦aik apañ ko reppen. Ñan waanjoñak, ilo kar Nobõm̦ba 2013, taibuun eo el̦ap etan Haiyan, ear ko̦kkure elõñl̦o̦k jãn 1,000 m̦õko im̦õn baam̦le ko me rej Ri Kõnnaan ro an Jeova ilo Philippine. George, eo me ear jako m̦weo im̦õn ilo jikin eo etan Tacloban, ear ba ilo tõre eo: “Jekdo̦o̦n ta eo ear wal̦o̦k, ak ro jeid im jatid rej m̦õn̦õn̦õ wõt. Epen aõ maroñ kõmel̦el̦eik joñan ammim lañlõñ.” El̦aññe jej l̦õmn̦ak kõn men ko Jeova ej kõm̦m̦ani ñan kõj im kwal̦o̦k wõt ad kam̦m̦oolol ñane, jenaaj maroñ lañlõñ wõt meñe jej iioon apañ ko rel̦l̦ap. Ta men ko jet Jeova ej litoki me rej kõm̦m̦an menin ad lañlõñ wõt?

Men eo el̦aptata ej kõm̦m̦an menin ad lañlõñ, ej kõtaan eo ad ippãn Jeova. El̦ap ad m̦õn̦õn̦õ bwe jejel̦ã kajjien Eo ej Irooj Bõtata ilañ im ioon lal̦ in. Ej Jemãd, ej ad Anij, im ej Jerad!​—Sam 71:17, 18.

Bareinwõt, jej kam̦m̦oolol Jeova bwe ear letok mour ñan kõj im maroñ eo ñan ad lo lañlõñ im m̦õn̦õn̦õ ilo mour ko ad. (Ekl. 3:12, 13) Kõnke Ear kepaakl̦o̦k kõj ñane, jemel̦el̦e kõn ankilaan im jejel̦ã wãween eo ejim̦we ñan kõjerbal mour ko ad. (Kol. 1:9, 10) Bõtab, enañin aolep armej rejjab jel̦ã im mel̦el̦e kõn unin ad mour im pãd ioon lal̦ in. Ñan kaalikkarl̦o̦k men in, Paul ear je im ba: “‘Men ko mej ear jab loi, im lo̦jilñin ear jab roñjake, im rejjañin del̦o̦ñ ilo bũruon armej, men ko jabdewõt Anij ear kõppojak ñan ro rej yokwe E.’ A Anij ear kwal̦o̦ki ñan kõj kõn Jetõb.” (1 Ko. 2:9, 10) Kõn men in, ad jel̦ã kõn ankilaan Jeova im karõk eo an ej kõm̦m̦an bwe jen lañlõñ.

Ebar lõñ men ko jet Jeova ear kõm̦m̦ani ñan kõj. Ear kõm̦m̦an bwe en wõr ial̦an ad maroñ bõk jeorl̦o̦k bõd jãn jerawiwi ko ad. (1 Jon 2:12) Em̦õj an letok juon kõjatdikdik em̦m̦an ñan mour ilo lal̦ eo ekããl, me m̦õttan jidik enaaj itok. (Rom 12:12) Bareinwõt, em̦õj an Jeova letok rũttõmak ro m̦õttad me jemaroñ kobal̦o̦k ippãer im jim̦or kabuñ ñane. (Sam 133:1) Ej bar kõjparok kõj jãn Setan im jetõb ro an renana. (Sam 91:11) El̦aññe jej kõl̦mãnl̦o̦kjen̦ kõn aolep jeraam̦m̦an kein em̦õj an Jeova litok ñan kõj, enaaj l̦apl̦o̦k wõt ad lañlõñ.​—Pil. 4:4.

Juon Kũrjin eo elañlõñ kadede emaroñ ke l̦apl̦o̦k an lañlõñ? Jesus ear ba: “Men kein Ij kõnono  ñan kom̦ bwe Aõ lañlõñ en pãd ilo kom̦, im bwe ami lañlõñ en obrak.” (Jon 15:11) Men in ej kwal̦o̦k bwe emaroñ l̦apl̦o̦k ad lañlõñ. Kwõmaroñ keidi lañlõñ ippãn juon kijeek eo eurur kadede. Bwe en l̦apl̦o̦k an urur kijeek eo, kwõj aikuj ankaane. Ejjel̦o̦k oktak, bwe en l̦apl̦o̦k am̦ lañlõñ kwõj aikuj ankaane ilo kõkkar. Keememej: Jetõb kwõjarjar ej kõm̦m̦an bwe jen maroñ lañlõñ. Kõn men in, enaaj l̦apl̦o̦k am̦ lañlõñ el̦aññe kwõj keini am̦ jar im kajjitõk jipañ ikijjeen jetõb kwõjarjar im bareinwõt kõl̦mãnl̦o̦kjen̦ kõn Naanin Anij, eo ej letokin jitũbõn Anij.​—Sam 1:1, 2; Luk 11:13.

Bar juon men me enaaj jipañ eok bwe en l̦apl̦o̦k am̦ lañlõñ, ej ilo am̦ poub ilo jerbal ko rej kam̦õn̦õn̦õik Jeova. (Sam 35:27; 112:1) Etke? Kõnke Anij ear kõm̦anm̦an kõj ñan kõm̦m̦an ankilaan. Baibõl̦ ej ba bwe kar kõm̦anm̦an kõj ñan “mijak Anij, im pokake kien ko An; bwe eñin aolepen kõm̦m̦an em̦m̦an an armej ro.” (Ekl. 12:13) Innem ñe jej karejar ñan Jeova, jenaaj lukkuun lo lañlõñ ilo mour ko ad. *​—Lale kõmel̦el̦e eo itulal̦.

Ñe el̦apl̦o̦k ad lañlõñ, elõñ tokjãn ko rem̦m̦an jenaaj loi. Ñan waanjoñak, enaaj l̦apl̦o̦k an Jeova m̦õn̦õn̦õ ippãd el̦aññe jej lañlõñ wõt ilo ad karejar ñane meñe elõñ apañ ko jej iiooni. (Dt. 16:15, UBS; 1 Te. 5:16-18) Bareinwõt, kõn ad lukkuun lañlõñ, jeban l̦õmn̦ak bwe men eo eaorõktata ej bwe en lõñ m̦weied. Bõtab, jenaaj kate kõj ñan kaarmejjeteik kõn̦aan ko ad bwe jen pukot m̦okta Aelõñ eo an Anij. (Matu 13:44, UBS) Im ñe jej lo tokjãn ko rem̦m̦an rej wal̦o̦k jãn ad kaarmejjeteik kõj make ilo wãween kein, enaaj l̦apl̦o̦k ad lañlõñ, enaaj em̦m̦an ad mour, im jenaaj kõm̦m̦an bwe ro jet ren m̦õn̦õn̦õ.​—Jrb. 20:35, UBS; Pil. 1:3-5.

Bareinwõt, ñe el̦apl̦o̦k ad lañlõñ, emaroñ em̦m̦anl̦o̦k ãjmour eo ad. Baibõl̦ ej ba: “Juon bõro em̦õn̦õn̦õ ej ãinwõt uno em̦m̦an.” (JK. 17:22) Ewõr juon armej me ej ekkatak kõn ãjmour ko an armej ilo University of Nebraska ilo Amedka, ear kwal̦o̦k jet naan ko me rej errã ippãn ta eo Baibõl̦ ej ba. L̦ein ear ba: “El̦aññe kwõm̦õn̦õn̦õ im jubũruom̦ ilo mour eo am̦ kiiõ, emaroñ l̦apl̦o̦k am̦ ãjmour ilo raan ko repãd im̦aan.”

Innem meñe jej mour ilo iien ko reppen im l̦ap inepata, ak jemaroñ lañlõñ wõt. Ewi wãween? Ilo ad jar kõn jetõb kwõjarjar, riit im katak Naanin Anij, im kõl̦mãnl̦o̦kjen̦ kake. Enaaj bar l̦apl̦o̦k ad lañlõñ el̦aññe jej l̦õmn̦ak kõn aolep men ko rem̦m̦an em̦õj an Jeova litok ñan kõj kiiõ, el̦aññe jej anõke tõmak eo an ro jet, im el̦aññe jej kate kõj ñan kõm̦anm̦an ankilaan Anij. Tokjãn men in, jenaaj lo an m̦ool naan kein ilo Sam 64:10, me rej ba: “Ro rem̦m̦an renaaj m̦õn̦õn̦õ [ak lañlõñ] ilo Jeova, im naaj lõke E.”