Ilo 2 Korint 12:2, 3, Paul ear kõnnaan kõn juon em̦m̦aan me kar ‘kotaklõñl̦o̦k ñan lañ eo kein kajilu.’ Wõn em̦m̦aan in? Eokwe, ke Paul ear jeje ñan eklejia eo ilo Korint, ear lukkuun kaalikkar bwe Anij ear kõjerbal e bwe en juon rijjilõk. (2 Ko. 11:5, 23) Innem ear kwal̦o̦k kõn ‘pijen im revelesõn ko Irooj ear lil̦o̦k ñane.’ Ilo iien in, ear jab kõnnaan kõn em̦m̦aan ro jet ilo eklejia eo. Innem ealikkar bwe ear jitõñl̦o̦k ñan e make bwe ej em̦m̦aan eo Irooj ear kwal̦o̦k pijen im revelesõn ko ñane.​—2 Ko. 12:1, 5, UBS.

Kõn men in, em̦m̦aan eo me kar ‘kotaklõñl̦o̦k ñan lañ eo kein kajilu’ im “ñan lowaan Pedetaij” ej Paul. (2 Ko. 12:2-4) Ear kõjerbal naan kein “revelesõn ko” ak pijen ko, im mel̦el̦ein men in bwe kar kwal̦o̦k ñane kõn juon men me enaaj wal̦o̦k ilju im jekl̦aj.

Ta ‘lañ eo kein kajilu’ Paul ear loe?

Ilo Baibõl̦, “lañ” emaroñ jitõñl̦o̦k ñan lañ eo me kõdo̦ ko im iju ko rej pãd ie. (Jen. 11:4; 27:28; Matu 6:26) Bõtab, Baibõl̦ ej bar kõjerbal “lañ” ñan kõkkar kõn wãween ko jet. Jet iien lañ ej kõkkar kõn kien ak an armej ro tõl. (Dan. 4:20-22, UBS) Ak emaroñ bar kõkkar kõn wãween an Anij tõl ikijjeen Aelõñ eo an.​—Rev. 21:1.

Ilo pijen eo, Paul ear lo ‘lañ eo kein kajilu.’ Ta mel̦el̦ein men in? Jet iien Baibõl̦ ej ãliji juon men 3 alen ñan kaalikkar kõn joñan an aorõk, kajoor, im l̦ap. (Ais. 6:3; Ezk. 21:27; Rev. 4:8, UBS) Ke Paul ear kõnnaan kõn ‘lañ eo kein kajilu,’ ear jitõñl̦o̦k ñan joñan an aorõk im utiej kien eo ak Aelõñ eo an Anij me Jesus Christ im 144,000 renaaj tõle. Rijjilõk Piter ear ba bwe jej kõttar kallim̦ur eo an Anij kõn “lañ ko rekããl.”​—2 Pi. 3:13, UBS.

Ak ta “Pedetaij” eo Paul ear kõnnaan kake?

Naan in “pedetaij” elõñ bar mel̦el̦ein: (1) Emaroñ mel̦el̦ein pedetaij eo enaaj wal̦o̦k ijin ioon lal̦ ãinwõt kar pedetaij eo jinoin ilo jikin kallib Iden. (2) Emaroñ bar jitõñl̦o̦k ñan wãween an armej ro an Anij aenõm̦m̦an im bõrokuk ilo naaj lal̦ eo ekããl. (3) Bareinwõt, emaroñ jitõñl̦o̦k ñan wãween mour eo ekanooj in em̦m̦an ilo lañ, eo im ej “Pedetaij an Anij” me Revelesõn 2:7 ej kõnnaan kake.​—Lale Naan in Keeañ eo an Jul̦ae 15, 2015, peij 8, pãrokõrããp 8.

Ke Paul ear kwal̦o̦k kõn pedetaij eo ear loe ilo 2 Korint 12:4, emaroñ kar jitõñl̦o̦k ñan aolepen men kein jilu.

Ñan kwal̦o̦k ilo tukadu:

‘Lañ eo kein kajilu’ me bokin 2 Korint 12:2 ej kõnnaan kake ej jitõñl̦o̦k ñan “lañ ko rekããl” ak Aelõñ eo an Anij me Jesus im 144,000 renaaj tõle.​—2 Pi. 3:13, UBS.

Eñin ej ‘lañ eo kein kajilu’ kõnke Aelõñ eo an Anij el̦ap an utiej im kajoor jãn jabdewõt kien.

“Pedetaij” eo kar “kotaklõñl̦o̦k” Paul ñane ilo pijen eo, ej jitõñl̦o̦k ñan (1) pedetaij eo enaaj wal̦o̦k ioon lal̦ in, (2) pedetaij eo ilo kõkkar me ej jitõñl̦o̦k ñan wãween an armej ro an Anij aenõm̦m̦an im bõrokuk ilo naaj lal̦ eo ekããl, eo im el̦apl̦o̦k jãn pedetaij eo ilo kõkkar ilo raan kein, im (3) “Pedetaij an Anij” ak wãween mour eo ekanooj em̦m̦an ilañ me enaaj bar wal̦o̦k ilo ejja iien eo wõt ñe lal̦ in enaaj erom juon pedetaij.

Kõn men in, lañ ko rekããl im lal̦ eo ekããl renaaj jim̦or wal̦o̦k ilo naaj Pedetaij. Enaaj juon karõk ekããl, me ej kitibuj kien ak Aelõñ eo an Anij ilañ im aolep armej ro rej kabuñ ñan Jeova ilo pedetaij ijin ioon lal̦.