Jãn jinoin bok in ñan kiiõ, jidik kõn jidik jaar etale uwaakin kajjitõk in, Wõn Anij? Jaar katak im loe bwe etan Anij ilo Baibõl̦ ej Jeova im kadkad eo el̦aptata kadkadin ej yokwe. Bareinwõt, jaar etale ta ko Anij ear kõm̦m̦ani im ta ko enaaj kõm̦m̦ani ñan armej ro bwe ren m̦õn̦õn̦õ. Elõñ wõt men ko jemaroñ katak im jel̦ã kõn Anij. Ak bõlen kwõmaroñ l̦õmn̦ak ippam̦ make, ta tokjãn aõ kal̦apl̦o̦k aõ jel̦ã kõn Anij?

Jeova ej kallim̦uri eok im ba bwe “el̦aññe kwõj pukot E, kwõnaaj lo E.” (1 Kronikel 28:9) L̦õmn̦ak m̦õk kõn jeraam̦m̦an eo epãd im̦aan ilo am̦ pukote Anij im kal̦apl̦o̦k am̦ jel̦ã kõn Anij. Aet, kwõnaaj “jeran” Anij! (Sam 25:14, UBS) Am̦ jeran Anij, enaaj ta tokjãn ñan kwe?

M̦õn̦õn̦õ eo em̦ool. Baibõl̦ ej ba bwe Jeova ej ‘Anij in m̦õn̦õn̦õ.’ (1 Timote 1:11) Ilo am̦ naaj epaakel̦o̦k e im anõke wãween im kõm̦m̦an ko an, kwõnaaj lo m̦õn̦õn̦õ eo em̦ool me enaaj jelõt eñjake, l̦õmn̦ak, im ãjmour eo am̦. (Sam 33:12) Bareinwõt kwõnaaj lo m̦õn̦õn̦õ ilo mour eo am̦ ilo an katakin eok kain m̦anit rot ko kwõj aikuj ilo̦k jãni, l̦oor m̦anit ko rem̦m̦an, im bwe en em̦m̦an wõt kõtaan eo am̦ ippãn ro jet. Innem, kwõnaaj errã ippãn ta eo ri-jeje sam ear ba: “Em̦m̦an ippa bwe in kepaakwaj ñan Anij.”​—Sam 73:28.

Enaaj lale eok im kea kake eok. Jeova ej kallim̦uri ro ri-karejeran im ba: “Inaaj katakin eok im kakapilõk eok.” (Sam 32:8, UBS) Mel̦el̦ein men in bwe Jeova ej kea kake kõj kajjojo im ej letok naanin katakin ko rekkar ñan aikuj ko ad make. (Sam 139:1, 2) Ilo am̦ naaj ejaake juon jem̦jerã em̦m̦an ippãn Anij, kwõnaaj lo bwe iien otemjej kwõj aikuji, enaaj jipañ eok.

Juon ilju em̦m̦an. Jeova Anij ejjab baj kwal̦o̦k wõt wãween am̦ lo m̦õn̦õn̦õ im jokwane kiiõ ilo mour eo am̦, ak ej bar kõpel̦l̦o̦k ñan eok jeraam̦m̦an eo kõn juon ilju eo elukkuun em̦m̦an. (Aiseia 48:17, 18) Baibõl̦ eo ej ba: “Im eñin mour indeeo: bwe armej ren jel̦ã kwe, juon wõt Anij em̦ool, im bwe ren jel̦ã Jesus Christ, eo kwaar jilkintok.” (Jon 17:3) Innem ilo raan kein reppen, kõjatdikdik in ad jãn Anij enaaj ãinwõt juon añkõ ñan jipañ kõj bwe jen “tõt [wõt] im pen.”​—Hibru 6:19, UBS.

Erkein ej jet iaan un ko rellõñ unin an aorõk bwe jen kal̦apl̦o̦k ad jel̦ã kõn Anij im ejaake juon jem̦jerã ippãn. El̦ap am̦ ruwainene ñan kepaak juon iaan Ri-Kõnnaan ro an Jeova ak etal ñan weepjait eo jw.org ñan kal̦apl̦o̦k am̦ mel̦el̦e.