Elõñ armej rej ba rej tõmak ilo Anij. Ak ñe kwõnaaj kajjitõk wõn in Anij, elõñ enaaj okkõtaktak aer uwaak. Ippãn jet, rej ba bwe Anij ej juon ri-ekajet elãj, im ekõn̦aan wõt kaje armej kõn bõd ko rej kõm̦m̦ani. Im ñan ro jet, rej ba bwe ej juon eo ej kwal̦o̦k yokwe aolep iien im em̦õn̦õn̦õ in jeorl̦o̦k bõd jekdo̦o̦n ta ko rej kõm̦m̦ani. Bõtab ippãn bar ro jet, rej l̦õmn̦ak bwe Anij ettol̦o̦k jãn kõj im ejjab itoklimo kake kõj. Jãn wõt l̦õmn̦ak kein reoktak jãn doon, elõñ remaroñ bõk eñjake eo bwe ilo m̦ool, ejjel̦o̦k juon emaroñ jel̦ã kõn Anij.

Eaorõk ke ñan jel̦ã? Aet, eaorõk ñan ad jel̦ã. El̦aññe jej katak ñan jel̦ã kõn Anij im kain Anij rot e, men in enaaj jipañ kõj ñan lo m̦õn̦õn̦õ ilo mour ko ad im kile bwe ewõr unin ad mour. (Jerbal 17:26-28, UBS) Ñe el̦apl̦o̦k wõt am̦ epaake Anij, enaaj l̦apl̦o̦k an Anij yokwe im jipañ eok. (Jemes 4:8) Innem, ilo am̦ jino katak im lukkuun jel̦ã kajjien Anij, men in enaaj tõll̦o̦k eok ñan juon mour ejjel̦o̦k jem̦l̦o̦kin.​—Jon 17:3, UBS.

Ewi wãween am̦ maroñ jel̦ã kajjien Anij? Eokwe, l̦õmn̦ak kõn juon m̦õttam̦ eo me kwõlukkuun epaake. Ewi wãween amiro kar jino epaake doon? Ejjel̦o̦k pere bwe m̦okta kwaar jel̦ã etan, kain armej rot e, men ko ediki im rem̦m̦an ippãn, men ko ekar kõm̦m̦ani ilo mour eo an, kõttõpar ko an, im men ko jet. Aet, ilo am̦ kar kal̦apl̦o̦k am̦ jel̦ã kõn e, men in ear kõm̦m̦an bwe kwõn jino epaake eo m̦õttam̦.

Ilo ejja wãween in wõt, jemaroñ jino jel̦ã kajjien Anij ilo ad l̦õmn̦ak kõn kajjitõk kein:

• ETAN ANIJ?

• KAIN ANIJ ROT E?

• TA KO EM̦ÕJ AN ANIJ KÕM̦M̦ANI?

• TA KO ENAAJ KÕM̦M̦ANI?

• TA TOKJÃN AM̦ JEL̦Ã KÕN ANIJ?

Kar kõm̦m̦ane bok in ñan jipañ eok lo uwaakin kajjitõk kein ilo Baibõl̦. Katak kein renaaj jipañ eok ñan jel̦ã kajjien Anij, im ejjab men in wõt, ak ilo am̦ kal̦apl̦o̦k am̦ jel̦a kõn e im ejaake juon jem̦jerã ippãn, kwõnaaj lo tokjãn ko rem̦m̦an.