DOREEN ear lukkuun bwilõñ ke rar ba ñane bwe ewõr juon tumor ilo kõmãlij eo an l̦eo pãleen etan Wesley, eo im 54 an iiõ. * (Lale kõmel̦el̦e eo itulal̦.) Taktõ ro rar ba bwe jejjo wõt allõñ im l̦ein pãleen enaaj jako. Doreen ej ba: “Iar lukkuun bwilõñ ke rar jiroñtok eõ men in. Joñan, elõñ wiik in aõ kar jab maroñ l̦õmn̦ak ak kõm̦m̦an jabdewõt. Ikar jab tõmak bwe men in ewal̦o̦k ñan l̦eo ippa. Ejjel̦o̦k aõ kar l̦õmn̦ak bwe inaaj kar iioone men in.”

Elõñ ro jet em̦õj aer kar bõk ejja eñjake kein wõt an Doreen. Nañinmej ko rel̦l̦ap im rekauwõtata rej wal̦o̦k ñan jabdewõt armej ilo jabdewõt iien. Ak ej juon menin nõbar bwe elõñ rej m̦õn̦õn̦õ in kauuk ro rejitõnbõro ippãer me relukkuun do̦o̦lol. Ilo m̦ool, jerbal in ñan kauuk juon rinañinmej ej juon jerbal elukkuun pen. Kõn men in, ñe juon ilo baam̦le eo ad edo̦o̦lol, ta ko jemaroñ kõm̦m̦ani ñan kauuki im kaenõm̦m̦an e? Ta ko remaroñ jipañ kõj ñan kijenmej ñe jerbal in kauuk juon rinañinmej el̦ap an jelõt kõj? Bareinwõt, ñe epaak an juon eo ejitõnbõro ippãd jako, ta ko jemaroñ kõtmãne bwe renaaj wal̦o̦k? Eokwe m̦okta, jen lale etke jerbal eo ñan kauuk juon eo edo̦o̦lol ej juon jerbal elukkuun pen ilo raan kein.

Kilen kõm̦adm̦õd ko an taktõ im jaintiij ro rej jipañ kaetokl̦o̦k an armej ro mour. Ilo jibukwi iiõ ko remootl̦o̦k, joñan aetokin an kar armej ro mour ear kadul̦o̦k jãn kõj ilo raan kein. Ear bar ãindein armej ro ilo aelõñ ko rel̦l̦ap. Elõñ rar kajju mej jãn nañinmej ko rekapopo im jãn jorrããn ko rar iiooni. Jet wõt rar maroñ bõk jipañ ilo aujpitõl̦, im enañin aolep ro renañinmej rar pãdwõt ilo m̦õko im̦weer im baam̦le ko aer rar kauuk er m̦ae iien eo rar mej.

Ilo raan kein, elõñ kilen kõm̦adm̦õd ko taktõ ro rej kõjerbali ñan kaetokl̦o̦k an armej ro mour. Ilo kar tõre ko m̦okta, armej ro remaroñ kar kajju jako ñe rar bõk juon iaan nañinmej ko rekauwõtata. Bõtab ilo raan  kein, ñe armej ro rej bõk ejja nañinmej kein, taktõ ro remaroñ jipañ er bwe en tol̦o̦k wõt aer mour. Meñe ãindein, ak armej rein rej nañinmej wõt, im ejjel̦o̦k aer maroñ ñan lale er make. Kõn men in, jerbal eo ñan kauuk rinañinmej el̦apl̦o̦k an pen kiiõ jãn kar tõre ko m̦okta.

Eñin unin elõñl̦o̦k ro renañinmej rej del̦o̦ñ ilo aujpitõl̦, im kõn men in ekkã an armej mej ilo aujpitõl̦ ijello̦kun m̦õko im̦weer. Ilo raan kein, enañin aolep armej rejjab lukkuun jel̦ã ta eo ej wal̦o̦k ñe juon edo̦o̦lol, im jejjo wõt em̦õj aer kar pãd ilo iien eo juon ej mej. Innem kõnke rejaje ta ko rej wal̦o̦k ñe juon edo̦o̦lol, remaroñ mijak ak ãliklik in kauuki rinañinmej eo ilo baam̦le eo aer. Ta eo emaroñ jipañ rein?

Ãinwõt an alikkar ilo waanjoñak eo kõn Doreen, elõñ rej bwilõñ im wiwijet ñe ro rejitõnbõro ippãer relukkuun do̦o̦lol. Ta eo emaroñ jipañ eok bwe kwõn m̦aanjãppopo ñe kwõbaj iioon wãween in elukkuun pen im kabũrom̦õjm̦õj? Juon rũkarejar etiljek an Anij ear jar im ba: “Kwõn katakin kõm bwe kõmin jel̦ã joñan an kadu am mour, bwe kõmin mãlõtlõt.” (Sam 90:12, UBS) Kõn men in, jar im kajjitõk ippãn Jeova Anij bwe en kwal̦o̦k ñan eok wãween eo ñan kõjerbal mour eo am̦ ilo “mãlõtlõt.” Ilo wãween in, kwõnaaj maroñ lukkuun kortokjãn iien ko am̦ ippãn eo ejitõnbõro ippam̦ ke ejja mour wõt.

Bwe kwõn maroñ kõm̦m̦ane men in, eaorõk bwe kwõn m̦aanjãppopo. Ñe rinañinmej eo emaroñ kõnono im em̦õn̦õn̦õ in etale pepe ko an, bõlen em̦m̦an ñe kwõkajjitõk ippãn kõn wõn eo ekõn̦aan bwe en kõm̦m̦ani pepe ko ñane ñe ebaj lukkuun do̦o̦lol im eban maroñ kõm̦m̦an jabdewõt. Em̦m̦an ñe baam̦le ko rej bõk an rinañinmej eo l̦õmn̦ak kõn kilen kõm̦adm̦õd rot ko rem̦m̦an ippãn, im ñe enaaj kõn̦aan del̦o̦ñ ilo aujpitõl̦ ak kõtl̦o̦k aer kõm̦m̦an bwe en bar menono (resuscitate). Ilo ami kõnono kaki men kein ippãn doon, enaaj dikl̦o̦k ami inepata ippãn doon im kom̦ ban ajl̦o̦k kõn pepe ko kom̦ij kõm̦m̦ani ñan rinañinmej eo ñe elukkuun do̦o̦lol. Ilo m̦ool, ñe baam̦le ko rej m̦aanjãppopo im bwebwenato kõn men kein ippãn doon m̦oktal̦o̦k, enaaj kiiõ pidodol̦o̦k ñan aer jipañ im kauuk rinañinmej eo. Baibõl̦ ej ba: “Ijo elõñ ripepe, em̦õj kapen l̦õmn̦ak ko.”—Jabõn Kõnnaan 15:22.    

El̦aptata an aorõk bwe juon rikauuk en kaenõm̦m̦ane rinañinmej eo. Etke? Kõnke eaorõk bwe juon eo epaak an mej en kile bwe jej kaorõke im bwe jekõn̦aan jipañe ilo iien in epen ñane. Ewi wãween ad maroñ kõm̦m̦ane men in? Jemaroñ riit ñane bok ko rem̦m̦an ippãn im renaaj kõkajoore ak al ñane al ko rekam̦õn̦õn̦õ. Bareinwõt, elõñ armej rej aenõm̦m̦an ñe ro ilo baam̦le ko aer rej jibwe peier im kõnono ñan er ilo juon ainikien emera.

El̦ap an bar aorõk ñan kwal̦o̦k ñan rinañinmej eo etan aolep ro im rej lol̦o̦ke. Juon ripoot ej kõmel̦el̦e im ba:  “Maroñ eo ñan roñjake ekkã an tol̦o̦k an pãd jãn maroñ ko jet ewõr ippãd. Meñe rinañinmej eo elukkuun do̦o̦lol im ej ãinwõt ñe ej kiki wõt, ak emaroñ wõr wõt an maroñ ñan roñjake. Kõn men in, meñe jej l̦õmn̦ak bwe rinañinmej eo ej kiki wõt, ak jen kõjparok im jab ba jabdewõt men jeban kar ba ñane ñe enaaj kar ruj.”

Ñe em̦m̦an im ekkar, jemaroñ bar jar ippãn doon. Baibõl̦ ej kwal̦o̦k bwe juon iien, rijjilõk Paul im ro m̦õttan rar iioon juon mãlejjoñ ekanooj in l̦ap im rar l̦õmn̦ak bwe renaaj kar mej. Ta eo rar kajjitõk ippãn ro jet ñan kõm̦m̦ane ñan jipañ er? Paul ear akwel̦ap im kajjitõk ippãer im ba: “[Kom̦ maroñ] jipañ kõn ami jar kõn kõm.” (2 Korint 1:8-11, UBS) Ealikkar bwe elukkuun aorõk ñan ad jar ippãn juon eo el̦ap an inepata ak juon eo edo̦o̦lol kõnke men in enaaj jipañ er.

Ñe jej l̦õmn̦ak kõn an juon eo ejitõnbõro ippãd mej, men in el̦ap an kainepataik kõj. Ilo m̦ool, ejjab kar piktokid bwe jen mej. Ke Anij ear kõm̦anm̦an armej, mej ekar jab m̦õttan karõk eo an ñan kõj. (Rom 5:12) Eñin unin Naanin Anij ej n̦aetan mej, “rũkõjdat.” (1 Korint 15:26) Kõn men in, ñe jejjab kõn̦aan l̦õmn̦ak kõn an eo ejitõnbõro ippãd mej, jen jab bwilõñ kõn kõj make ak jen kile bwe ãindein kõj armej.

Bõtab ñe baam̦le ko rej an̦to̦o̦nel̦o̦k ta ko remaroñ wal̦o̦k ilo wiik ko ãliktata in an rinañinmej eo mour, men in emaroñ kadikl̦o̦k aer inepata im jipañ er ñan jel̦ã ta ko remaroñ kõm̦m̦ani ñan kauuk rinañinmej eo. Em̦õj kar kõllaajraki jet iaan men ko remaroñ wal̦o̦k ñan rinañinmej ro ilo bo̦o̦k eo etan “ Wiik ko Ãliktata in Aer Mour.” Bõtab ejjab aolep men ko bo̦o̦k in ej kõllaajraki rej wal̦o̦k ippãn aolep rinañinmej, im ejjab mel̦el̦ein bwe aolep men kein rej wal̦o̦k ekkar ñan wãween eo kar kõllaajraki. Meñe ãindein, ak jet iaan men kein rej wal̦o̦k ñan elõñ iaan rinañinmej ro.

Ãlikin an eo ejitõnbõro ippãd mej, em̦m̦an ñe jej kõjjel̦ãik juon eo jepaake me em̦õj an kar ba bwe enaaj m̦õn̦õn̦õ in jipañ kõj ilo iien in epen. Baam̦le ko an rimej eo kab ro rar kauuki remaroñ aikuji an juon jipañ er ñan kile bwe ejem̦l̦o̦k kiiõ an eo ejitõnbõro ippãer eñtaan. Rũkõm̦anm̦an eo ad ej make kaenõm̦m̦an kõj ilo an ba bwe “ro remej ejjel̦o̦k aer jel̦ã.”​—Ekklisiastis 9:5.

Eaorõk ñan atartar ioon Anij ilo iien eo ñe eo ejitõnbõro ippãd edo̦o̦lol. Bareinwõt ãlikin an eo ejitõnbõro ippãd mej, ebar aorõk ñan atartar ioon Anij ilo iien ko jej bũrom̦õj. Anij emaroñ jipañ im kaenõm̦m̦an kõj ikijjeen naan ko im kõm̦m̦an ko rem̦m̦an an ro jet. Doreen ej ba, “Iar aikuj katak im kile bwe ijjab aikuj kõjekdo̦o̦n jabdewõt eo ekõn̦aan jipañ kõm̦ro l̦eo pãleõ. Kom̦ro jim̦or kar bwilõñ kõn joñan an kar lõñ ro rar kõn̦aan jipañ. Kõm̦ro kar kile bwe aolep men kein rar itok jãn Jeova im ej ãinwõt ñe ej ba ñan kõm̦ro, ‘Jab inepata, ña ij pãd wõt ippemiro ñan jipañ komiro ilo iien in epen.’ Iban mel̦o̦kl̦o̦k men in.”

Ealikkar bwe eo em̦m̦antata an lale kõj ej Jeova Anij. Kõnke ej Rũkõm̦anm̦an eo ad, emel̦el̦e kõn eñjake ko ad ñe jelukkuun bũrom̦õj im inepata. Ewõr an maroñ im ekõn̦aan jipañ kõj im kaenõm̦m̦an kõj bwe jen maroñ kijenmej. Ejjab men in wõt, ak em̦õj an kar kallim̦ur bwe m̦õttan jidik enaaj jol̦o̦k mej bwe en jako ñan indeeo im bwe enaaj kõmour elõñ pilien armej ro remej me rej pãd wõt ilo ememej eo an. (Jon 5:28, 29; Revelesõn 21:3, 4) Ñe ejejjet kallim̦ur kein an, aolep renaaj maroñ kwal̦o̦k naan kein rijjilõk Paul ear kwal̦o̦ki ke ear ba: “O Mej, ejjel̦o̦k am̦ anjo̦! O Mej, ta am̦ kein ire?”​—1 Korint 15:55, UBS.