Iar l̦otak ilo Ciudad Mante, juon jikin eaiboojoj ilo Tamaulipas, Mexico. Armej ro ilo jikin in el̦ap aer jel̦ã lale doon im jouj. Bõtab, ekabũrom̦õjm̦õj bwe kõn an lõñ kumi in rinana ro, jikin in ear juon jikin elukkuun kauwõtata.

Ear wõr 4 nejin jinõ im jema l̦addik, im kar ña eo kein karuo. Jinõ im jema rar peptaiji ña ilo kabuñ in Katlik, im tokãlik iar pãd ilo kumi in al eo ilo kabuñ in. Iar kõn̦aan kabuñbũruon Anij kõnke el̦ap aõ kar mijak ñe enaaj ekajete eõ im jilkinl̦o̦k ña bwe in bwil ilo hell ñan indeeo.

Ke ear 5 aõ iiõ, jema ear ilo̦k jãn kõm. Men in ear kõm̦m̦an bwe in lukkuun bũrom̦õj. Kõmar lukkuun yokwe Baba, ak iar jab mel̦el̦e etke ear ilo̦k jãn kõm. Ãlikin an ilo̦k, jinõ ear aikuj buul̦ jerbal bwe en maroñ kabwe aikuj ko ammim.

Kõn an kar men in wal̦o̦k, iar jino ko̦kkure aõ jikuul̦ bwe in kobal̦o̦k ippãn ro rerũttol̦o̦k jãn ña. Rein rar katakin ña kanijnij, kõbaatat, ko̦o̦t, im ire. Kõnke iar kõn̦aan bwe ro jet ren mijake ña, iar katak kilen bait, oktaak, kõratte, im kõjerbal bu im kein ire ko jet. Iar oktak im juon jo̦dikdik eo elãj. Ekkã aõ kõjerbal bu ñe ij ire im kõpata. Elõñ iien ij lukkuun jorrããn im bõtõktõk aolepen ãnbwinnũ im rekõn likũt wõt ña itõrerein ial̦ ko kõnke rej l̦õmn̦ak bwe inaaj mej. El̦ap an kar m̦am̦a inepata im bũrom̦õj ñe ej loe ña im bõk ña ñan aujpitõl̦.

Ke ear 16 aõ iiõ, Jorge, juon kar m̦õtta ke iar dik, ear itok ñan m̦weo. Ear ba ñan kõm bwe ej juon iaan Ri Kõnnaan ro an Jeova im ear kõn̦aan kwal̦o̦k ñan kõm kõn juon ennaan eaorõk. Ear jino kõmel̦el̦eik kõm kõn tõmak ko an ilo an kõjerbal Baibõl̦. Ijjañin kar riit Baibõl̦, im el̦ap aõ kar m̦õn̦õn̦õ bwe ij kab jel̦ã etan Anij im karõk ko an. Ke Jorge ear kajjitõk el̦aññe kõm kõn̦aan katak Baibõl̦, kõmar ba em̦m̦an.

Ke iar katak Baibõl̦, el̦ap an kar kaenõm̦m̦an eõ ñan jel̦ã bwe katak eo kõn hell ejjab pedped ilo Baibõl̦. (Sam 146:4, UBS; Ekklisiastis 9:5) Ke iar jel̦ã men in, ear jako aõ mijake Anij kõn aõ l̦õmn̦ak bwe elãj. Iar  jino watõke bwe ej juon Jemãn eo el̦ap an yokwe im ekõn̦aan men ko rem̦m̦antata ñan ro nejin.

Ke iar wõnm̦aanl̦o̦k wõt im katak Baibõl̦, iar kile ippa make bwe ij aikuj kõm̦m̦an oktak. Iar aikuj kõttãik bũruõ im bõjrak jãn aõ lãj. Naanin kakapilõk eo ilo 1 Korint 15:33 ear jipañ eõ. Ej ba: “Kõm̦m̦ao ko renana rej kakõt m̦anit ko rem̦m̦an.” Iar kile bwe el̦aññe ikõn̦aan ukot kõm̦m̦an ko aõ, ij aikuj bõjrak jãn aõ kobal̦o̦k ippãn ro enana m̦wilier im rej tõl eõ ñan kõm̦m̦ani men ko renana. Kõn men in, iar jino kobal̦o̦k ippãn ro ilo eklejia eo an Ri Kõnnaan ro an Jeova, ro im rej kõm̦adm̦õdi apañ ko ikõtaer ilo aer l̦oore naanin kakapilõk ko ilo Baibõl̦ im jab ilo aer ire ak kõm̦m̦ani wãween ko jet rellãj ñan doon.

Eoon ko ilo bokin Rom 12:17-19 rar bar l̦ap aer jipañ eõ. Eoon kein rej ba: “Kom̦win jab bar lel̦o̦k ñan jabdewõt armej nana kõn nana. . . . El̦aññe emaroñe, ãinwõt ej pãd ippemi, kom̦win aenõm̦m̦an ippãn armej otemjej.  . . Kom̦win jab idenon̦e kõn kom̦, . . . bwe em̦õj je, ‘“Kun̦aõ idenon̦e, Inaaj n̦aon̦eam̦,” Irooj ej ba.’” Iar jino kile ippa make bwe Jeova enaaj kõm̦adm̦õdi men ko rejjab jim̦we ilo iien eo im wãween eo ej lo bwe ekkar. Jidik kõn jidik, ear jakol̦o̦k aõ lãj.

Iban mel̦o̦kl̦o̦k men eo ear wal̦o̦k ñan ña juon boñ ke ij ro̦o̦l ñan m̦weo. Jet jo̦dikdik jãn juon kumi in rinana me rar dike kumi in rinana eo iar pãd ie rar wõnm̦ae eõ im m̦an eõ. Eo ej tõl er ear noe likũ im ba, “Etke kwõjjab ire!” Ilo iien in iar jar ilo tukadu ñan Jeova im kajjitõk bwe en jipañ eõ ñan dãpij aõ illu. Meñe iar lukkuun illu im kõn̦aan ire, ak iar ko im jab kõm̦m̦an jabdewõt ñan er. Raan eo juon, iar iioon eo ear tõl kumi in. Ilukkuun kar kõn̦aan ukotl̦o̦k men eo enana ear kõm̦m̦ane ñan ña, bõtab iar bar jar ilo bũruõ im kajjitõk ippãn Jeova bwe en jipañ eõ bwe in jel̦ã dãpij aõ illu. Iar bwilõñ ke l̦ein ear itok ñan ippa im ba: “Jol̦o̦k bõd kõn men eo ear wal̦o̦k boñ. Ilo m̦ool, ikõn̦aan ãinwõt kwe. Ikõn̦aan katak Baibõl̦.” El̦ap aõ kar m̦õn̦õn̦õ bwe iar maroñ dãpij aõ illu! Tokjãn men in, kõm̦ro kar jim̦or katak Baibõl̦.

Ekabũrom̦õjm̦õj bwe ro uwaan baam̦le eo aõ rar jab wõnm̦aanl̦o̦k wõt im katak Baibõl̦ ilo tõre in. Bõtab, iar jek ilo bũruõ bwe inaaj wõnm̦aanl̦o̦k wõt im katak Baibõl̦ im jab kõtl̦o̦k bwe jabdewõt armej ak men en kabõjrak eõ. Iar jel̦ã bwe ñe inaaj keini aõ kobal̦o̦k ippãn armej ro an Anij, enaaj dikl̦o̦k aõ inepata im bũrom̦õj kõn men ko rar wal̦o̦k ke iar dik, im enaaj jipañ eõ bwe in lukkuun epaake er ãinwõt ñe rej aõ baam̦le. Iar kõm̦m̦an wõnm̦aanl̦o̦k ko, im ilo iiõ eo 1991, iar peptaij im erom juon iaan Ri Kõnnaan ro an Jeova.

Iar juon eo ekõbbo̦o̦jo̦j, elãj, im juon eo ekõn dãpij wõt an illu ilo bũruon. Bõtab, Naanin Anij ear maroñ ukot mour eo aõ. Kiiõ ij kwal̦o̦k kõn ennaan eo jãn Baibõl̦ me ej jipañ jabdewõt ro rej eo̦roñe ñan lo aenõm̦m̦an. Ium̦win iiõ ko 23 rej kab jem̦l̦o̦k, iar maroñ kal̦apl̦o̦k kun̦aõ ilo jerbalin kwal̦o̦k naan.

M̦okta ikõn kar jipañ ilo ra eo an Ri Kõnnaan ro an Jeova ilo Mexico. Ke iar pãd ijin, iar iioone Claudia, juon jiroñ elukkuun kijejeto, im ilo 1999 eo, kõm̦ro kar m̦are. El̦ap aõ kam̦m̦oolol Jeova kõn an kajeraam̦m̦an eõ kõn kõrã in ippa me el̦ap an tiljek ñan ña!

Kõm̦ro kar jipañ ilo juon eklejia an ro rejarroñroñ ilo Mexico ñan jipañ ro rejarroñroñ bwe ren jel̦ã kõn Jeova. Tokãlik, kar kajjitõk bwe kõm̦ro en em̦m̦akũt ñan Belize ñan kwal̦o̦k naan ie im katakin armej ro kõn Baibõl̦. Meñe epenl̦o̦k wãween mour ijin, ak el̦ap am̦ro m̦õn̦õn̦õ. Ejjel̦o̦k juon men emaroñ kõm̦m̦an am̦ro m̦õn̦õn̦õ jãn jerbal in kõm̦ro ej kõm̦m̦ane.

Ejjabto, jinõ ear bar jino katak Baibõl̦ im ear peptaij. Bareinwõt, l̦adik eo jeiũ, lio ippãn, im ajri ro nejin rej kiiõ Ri Kõnnaan ro an Jeova. Im jet iaan ro kar m̦õtta me iar kwal̦o̦k naan ñan er rej kiiõ karejar ñan Jeova.

Ekabũrom̦õjm̦õj bwe jet iaan ro ilo baam̦le eo aõ rar mej kõnke rar jab oktak jãn aer lãj. Ñe in kar jab oktak, bõlen imaroñ kar bar mej. El̦ap aõ kam̦m̦oolol bwe Jeova ear jipañ eõ bwe in maroñ epaake e im armej ro an. Rein rar kwal̦o̦k wõt kijenmej im jouj ilo aer katakin ña ñan l̦oore naanin kakapilõk ko ilo Baibõl̦ ilo mour e aõ.