1. Etke Jeova ear kõm̦anm̦an ak letok mour?

EWÕR juon iien Jeova ear make iaan. Ak ear jab bũrom̦õj kõn men in. Jeova ear jab aikuji an juon pãd iturin bwe en m̦õn̦õn̦õ. Bõtab, Anij ear kõn̦aan bwe ro jet ren bareinwõt mour im m̦õn̦õn̦õ. Kõn an yokwe, Jeova ear jino kõm̦anm̦an ak letok mour.​—Sam 36:9; 1 Jon 4:19.

2. Ta kar eñjake eo an Jesus im enjel̦ ro kõn menin kõm̦anm̦an ko an Jeova?

² M̦oktata, Jeova ear kõm̦anm̦ane Nejin, Jesus. Im kobal̦o̦k ippãn Nejin, Jeova ear “kõm̦anm̦an men otemjej,” ekoba aolep milien enjel̦ ro. (Kol. 1:16) Jesus ear m̦õn̦õn̦õ in jerbal ippãn Jemãn. (JK. 8:30) Im enjel̦ ro rar bar m̦õn̦õn̦õ. Rar loe an Jeova im rũkkal eo an ekapeel Jesus, kõm̦anm̦an lañ ko im lal̦. Ta eo enjel̦ ro rar kõm̦m̦ane? Rar “lam̦õj kõn lañlõñ” ke lal̦ ear wal̦o̦k im ejaak, im ejjel̦o̦k pere bwe rar wõnm̦aanl̦o̦k wõt im lam̦õj im m̦õn̦õn̦õ kõn kajjojo iaan aolep menin kõm̦anm̦an ko an, el̦aptata menin kõm̦anm̦an eo an ãliktata, ej armej ro. (Job 38:7; JK. 8:31) Kajjojo iaan menin kõm̦anm̦an kein rar kaalikkar yokwe im mãlõtlõt eo an Jeova.​—Sam 104:24; Rom 1:20.

3. Ãinwõt an 1 Korint 15:21, 22 kwal̦o̦k, ta eo katok in mour eo an Jesus ear kõmaroñe im lel̦o̦k ñan armej?

³ Jeova ear kõn̦aan bwe armej ren mour ñan indeeo ilo lal̦ in eaiboojoj ear kõm̦anm̦ane. Bõtab ke Adam im Iv rar jum̦aik Jemãer eo el̦ap yokwe ippãn, jerawiwi im mej rar jelõt aolep armej. (Rom 5:12) Ta eo Jeova ear kõm̦m̦ane? Ilo m̦õkaj, ear kwal̦o̦k ewi wãween an naaj lo̦mo̦o̦ren armej. (Jen. 3:15) Jeova ear karõk bwe en letok Nejin, Jesus, ãinwõt juon menin katok bwe ajri ro nejin Adam im Iv ren maroñ anemkwõj jãn jerawiwi im mej. Ilo an ãindein, kiiõ emaroñ naaj kõtl̦o̦k bwe kajjojo armej ren kããlõt ñan karejar ñan E im ñan aer maroñ bõk mour indeeo. —Jon 3:16; Rom 6:23; riit 1 Korint 15:21, 22.

4. Ta kajjitõk ko jenaaj etali ilo katak in?

 ⁴ Kallim̦ur eo an Anij ñan kõjerkakpejeik ro remej ej bõklõñtak elõñ kajjitõk. Ñan waanjoñak, ta ko remaroñ naaj wal̦o̦k ilo iien jerkakpeje eo? Jemaroñ ke naaj kile ro rejitõnbõro ippãd ñe renaaj jepl̦aak im bar mour? Ilo wãween et ko jerkakpeje eo enaaj kõm̦m̦an bwe jen m̦õn̦õn̦õ? Im ilo ad kõl̦mãnl̦o̦kjen̦ kõn jerkakpeje eo, ewi wãween an men in maroñ kal̦apl̦o̦k ad kam̦m̦oolol kõn yokwe, mãlõtlõt, im kijenmej eo an Jeova? Jen kiiõ etali kajjitõk kein.

5. Etke jemaroñ tõmak bwe armej reban jerkakpeje ilo juon wõt iien?

⁵ Ñe Jeova enaaj kõjerkakpejeik elõñ milien ro remej ikijjeen Nejin, jemaroñ tõmak bwe ejjab aolepen rein renaaj jepl̦aak im bar mour ilo juon wõt iien. Etke? Kõnke el̦aññe enaaj lukkuun m̦õkaj an lõñl̦o̦k oran armej ro ioon lal̦ in, men in emaroñ kõm̦m̦an bwe en wõr pok. Im Jeova ejjab kõm̦m̦ani jerbal ko an ilo juon wãween me ejjab laajrak. Ejel̦ã bwe ej aikuj wõr laajrak bwe en maroñ wõr wõt aenõm̦m̦an. (1 Kor. 14:33) Jeova Anij ear kwal̦o̦k an mãlõtlõt im kijenmej ke ear jerbal ippãn Jesus ñan kõpooj lal̦ in. Ear jab ekkaiuriur ak ear bõk an iien m̦okta jãn an kar kõm̦anm̦an armej. Kõn men in, Jesus enaaj bar kwal̦o̦k ejja kadkad kein wõt ñan ro renaaj jerbal ippãn ium̦win naaj Juon To̦ujin Iiõ me renaaj el̦l̦ã jãn Armagedon im kõpooje lal̦ in ñan ro renaaj jerkakpeje.

6. Ekkar ñan Jerbal 24:15, wõn ro me Jeova enaaj bar kõjerkakpejeik er?

⁶ Men eo el̦aptata an aorõk in, ej bwe ro me renaaj el̦l̦ã jãn Armagedon renaaj aikuj katakin ro renaaj jerkakpeje kõn Aelõñ eo an Anij im kõn men ko Jeova ekõn̦aan bwe ren kõm̦m̦ani. Etke? Kõnke elõñ iaan ro me renaaj bar mour rej “ro rejjab wãnõk.” (Riit Jerbal 24:15.)  Rein renaaj aikuj kõm̦m̦an elõñ oktak ko ilo mour ko aer ñan aer maroñ bõk tokjãn jãn katok in mour eo an Christ. Baj l̦õmn̦ak m̦õk kõn ewi joñan an naaj l̦ap jerbal ñan katakin elõñ milien armej ro me ejjel̦o̦k aer jel̦ã kõn Jeova. Enaaj ke wõr juon ej katak ippãer, ãinwõt ad bar katak ippãn rũkkatak ro ad ilo raan kein? Rein rekããl renaaj ke pãd ilo kajjojo eklejia ko ñan bõk katak im kamminene ko bwe ren maroñ katakin ro renaaj jerkakpeje tokãlik? Eokwe, jenaaj aikuj kõttar im lale. Men eo in jejel̦ã bwe ilo naaj jem̦l̦o̦kinl̦o̦k Juon To̦ujin Iiõ ko in an Christ Irooj, “lal̦ enaaj obrak kõn jel̦ã Jeova.” (Ais. 11:9) Enaaj lukkuun lõñ jerbal ko rekam̦õn̦õn̦õ jenaaj kõm̦m̦ani ilo naaj juon to̦ujin iiõ en!

7. Etke armej ro an Anij renaaj aikuj kwal̦o̦k tũriam̦o ilo iien aer naaj katakin ro rar jerkakpeje?

⁷ Ilo Juon To̦ujin Iiõ ko in an Christ Irooj, aolep ro nejin Jeova ilo lal̦ in rej aikuj kõm̦m̦an oktak ilo mour ko aer bwe ren maroñ kabuñbũruon Jeova. Kõn men in, rein aolep enaaj wõr aer tũriam̦o ilo aer naaj jipañ ro me rar jerkakpeje ñan anjo̦ ioon kõn̦aan ko aer renana im mour ekkar ñan kien ko an Jeova. (1 Pit. 3:8) Ejjel̦o̦k pere bwe ro renaaj jepl̦aak im bar mour renaaj kõn̦aan epaake armej ro an Jeova me ettã bũrueer, ro me renaaj bar ‘kate er bwe ren maroñ bõk lo̦mo̦o̦r.’​—Pil. 2:12.

8. Etke jemaroñ ba bwe ro renaaj karwaineneiktok ro rar jerkakpeje renaaj maroñ kile ro rejitõnbõro ippãer?

⁸ Elõñ un ko unin ad maroñ tõmak bwe ro me renaaj karwaineneiktok armej ro rar jerkakpeje renaaj maroñ kile ro rejitõnbõro ippãer. Ñan waanjoñak, el̦aññe jej lale wãween an kar Jeova kõjerkakpejeik armej ro ilo iien ko m̦okta, innem jemaroñ kõtmãne bwe Jeova enaaj bar kõm̦anm̦an im kõjepl̦aak armej ro bwe paotokier, wãween aer kõnono, im aer l̦õmn̦ak ren ejja ilo kar wãween ko wõt m̦okta jãn aer kar mej. Keememej bwe Jesus ear kõkkar kake mej ãinwõt ñe juon ej kiki im jerkakpeje eo ej ãinwõt ñe juon ej ruj jãn an kar kiki. (Matu 9:18, 24; Jon 11:11-13) Ñe armej rej rujtok jãn aer kar kiki, paotokier im ainikieer rejja ilo wãween eo wõt kar m̦okta jãn aer kar kiki im aer ememl̦o̦kjen̦ ej pãdwõt. L̦õmn̦ak kõn waanjoñak eo kõn Lazerõs. Em̦õj de an kar mej ium̦win emãn raan, kõn men in ãnbwinnin em̦õj an jino kõt. Bõtab, ke Jesus ear kõjerkakpejeik e, kõrã ro jein im jatin rar m̦õkaj im kile e, im ealikkar bwe Lazerõs ear keememej wõt er.​—Jon 11:38-44; 12:1, 2.

9. Etke ro renaaj jerkakpeje reban kajju weeppãn ilo ãnbwin im ilo l̦õmn̦ak?

⁹ Jeova ej kallim̦ur bwe ejjel̦o̦k juon iaan ro enaaj pãd ium̦win tõl eo an Christ enaaj ba: “Inañinmej.” (Ais. 33:24; Rom 6:7) Kõn men in, ro im renaaj jerkak jãn mej, renaaj lukkuun ãjmour. Bõtab, ãnbwinnier eban m̦õkaj im weeppãn. El̦aññe en kar ãindein, ro rejitõnbõro ippãer remaroñ jab kile er. Ealikkar bwe aolep armej remaroñ jidik kõn jidik oktakl̦o̦k im weeppãn ilo naaj Juon To̦ujin Iiõ ko in an Christ Irooj. Ilo naaj jem̦l̦o̦kinl̦o̦k juon to̦ujin iiõ ko, Jesus enaaj kõjepl̦aakl̦o̦k Aelõñ eo ñan Jemãn. Innem kiiõ Aelõñ eo enaaj kadedeikl̦o̦k an kõm̦m̦ani aolep men ko Jeova ear kõn̦aan bwe en kõm̦m̦ani, ekoba kõm̦m̦an bwe armej ren weeppãn.​—1 Kor. 15:24-28; Rev. 20:1-3.

10. Ewi wãween an naaj jerkakpeje eo jelõt eok?

¹⁰ L̦õmn̦akel̦o̦k m̦õk ñe kwõnaaj bar iioon ro rejitõnbõro ippam̦. Joñan an naaj l̦ap am̦ m̦õn̦õn̦õ enaaj ke kõm̦m̦an menin am̦ ettoñ ak jañ? Im joñan an naaj l̦ap am̦ m̦õn̦õn̦õ kwõnaaj ke al kõn al in nõbar ñan Jeova? Juon men  kwõmaroñ kõtmãne ej bwe, kõn wõt menin letok eo ikijjeen jerkakpeje, kwõnaaj lukkuun yokwe eo Jem̦am̦ me el̦ap an kea im eo Nejin me ejjab l̦õmn̦ak wõt kõn e make.

11. Ekkar ñan naan ko an Jesus ilo Jon 5:28, 29, ta eo enaaj wal̦o̦k ñan ro rej pokake Anij?

¹¹ Pijaikl̦o̦k m̦õk an ro renaaj jerkakpeje lañlõñ ke rej utũk mour ko aer m̦okta im mour ekkar ñan kien ko an Anij me rewãnõk. Ro me renaaj kõm̦m̦ani oktak kein ilo mour ko aer renaaj jerkakpeje ñan mour. Bõtab, Jeova eban kõtl̦o̦k bwe ro rejjab kõn̦aan kõm̦m̦an oktak ilo mour ko aer ren jokwe ilo Pedetaij im ko̦kkure aenõm̦m̦an eo ie.​—Ais. 65:20; riit Jon 5:28, 29.

12. Ilo wãween et aolep ro ilo lal̦ in renaaj bõk jeraam̦m̦an jãn Jeova?

¹² Ium̦win tõl eo an Aelõñ eo an Anij, aolep armej ro an Anij renaaj kile an m̦ool Jabõn Kõnnaan 10:22 ke ej ba: “Kõjeraam̦m̦an jãn Jeova, ej n̦a m̦weien armej, im E jab kobaik bũrom̦õj n̦a ippãn.” Kõn jipañ eo jãn jetõb eo an Jeova, armej ro an Anij renaaj m̦weiie ilo kõkkar, mel̦el̦ein bwe enaaj l̦apl̦o̦k aer ãinwõt Christ im jidik kõn jidik renaaj etal ñan aer weeppãn. (Jon 13:15-17; Eps. 4:23, 24) Kajjojo raan ãnbwinnier enaaj kajoorl̦o̦k, im renaaj armej ro me rem̦m̦anl̦o̦k. El̦ap wõt an naaj kam̦õn̦õn̦õ mour ko ad ilo iien en̦! (Job 33:25) Ilo am̦ kõl̦mãnl̦o̦kjen̦ kõn jerkakpeje eo, ewi wãween an naaj men in jipañ eok kiiõ?

13. Ekkar ñan Sam 139:1-4, ewi wãween an jerkakpeje eo kwal̦o̦k joñan an Jeova lukkuun jel̦ã kajjied?

¹³ Ãinwõt ad kar kwal̦o̦k m̦oktal̦o̦k, ñe Jeova enaaj kõjerkakpeje armej, enaaj bar kõjepl̦aak ememl̦o̦kjen̦ ko aer im kadkad ko me kar kadkadier. L̦õmn̦ak m̦õk kõn ta mel̦el̦ein men in. Joñan an l̦ap an Jeova yokwe eok, ejel̦ã im ej keememej aolep men ko kwõj l̦õmn̦aki, eñjaki, im men ko kwõj ba im kõm̦m̦ani. Kõn men in el̦aññe enaaj aikuj in kõjerkakpejeik eok, enaaj pidodo an kõjepl̦aak ememl̦o̦kjen̦ ko am̦, wãween am̦ l̦õmn̦ak, im kadkad ko kadkadim̦. Kiiñ Devid ear kile ewi joñan an Jeova itoklimo kõn kõj kajjojo. (Riit Sam 139:1-4.) Ilo ad mel̦el̦e kõn joñan an Jeova lukkuun jel̦ã kajjied, ewi wãween an men in jelõt kõj kiiõ?

14. En kar ewi wãween ad eñjake ñe jej l̦õmn̦ak kõn joñan an Jeova lukkuun jel̦ã kajjied?

¹⁴ Ñe jej kõl̦mãnl̦o̦kjen̦ kõn joñan an Jeova jel̦ã kajjied, innem jejjab aikuj inepata. Etke? Kõnke jen keememej bwe Jeova ej lukkuun kaorõk kõj. Ej m̦õn̦õn̦õ kõn kadkad ko kadkadid kajjojo me rej kõm̦m̦an ad oktak jãn doon. Ej keememej aolep men ko rej wal̦o̦k ilo mour ko ad. Men in el̦ap an kaenõm̦m̦an kõj! Jejjab aikuj bõk eñjake eo bwe jej make iaad. Aolep iien Jeova ej pãd ippãd im ekõn̦aan jipañ kõj.​—2 Kro. 16:9.

15. Ewi wãween an jerkakpeje eo kam̦ool an Jeova mãlõtlõt?

¹⁵ Ñe armej rej mijak bwe renaaj mej, innem ri-kõjdat ro aer rej iuun er ñan kõm̦m̦ani men ko me ekkã aer jab kõm̦m̦ani ilo aer kamijak er bwe renaaj m̦an er. Armej ro Setan ej tõl er rej kõjerbal mijak ñan iuun armej bwe ren kinaak ro m̦õttaer ak kõm̦m̦ane juon men eo rejel̦ã bwe ejjab jim̦we. Bõtab rejjab maroñ iuun kõj bwe jen kõm̦m̦ane men in. Jejel̦ã bwe ñe ri-kõjdat ro ad renaaj m̦an kõj, Jeova enaaj bar kõmour kõj. (Rev. 2:10) Jej tõmak bwe ejjel̦o̦k jabdewõt men remaroñ kõm̦m̦ane ñan kõjepel jem̦jerã eo ad ippãn Jeova. (Rom 8:35-39) Jeova ear kwal̦o̦k an lukkuun mãlõtlõt ilo an kar kwal̦o̦k ñan kõj kõjatdikdik eo kõn jerkakpeje! Kõn wõt jerkakpeje eo, jejjab mijak ñe ro rej rejetake Setan rej kamijak kõj  el̦aññe jejjab kõm̦m̦ane men eo rej ba. Bareinwõt, jerkakpeje eo ej letok ñan kõj el̦ap peran bwe jen tiljek wõt ñan Jeova.

16. Ta kajjitõk ko kwõj aikuj kajitũkin eok make kaki, im ewi wãween an uwaak ko am̦ maroñ jipañ eok ñan jel̦ã ewi joñan am̦ lõke Jeova?

¹⁶ El̦aññe ro rej dike Jeova rej ba bwe renaaj m̦an eok, kwõnaaj ke lõke bwe Jeova enaaj kõjerkakpejeik eok? Ewi wãween am̦ jel̦ã el̦aññe kwõnaaj lõke Jeova ilo iien en̦? Juon wãween ej ilo am̦ kajjitõk ippam̦ make, ‘Pepe ko reddik me ij kõm̦m̦ani kajjojo raan rej ke kam̦ool bwe ij lõke Jeova?’ (Luk 16:10) Bar juon kajjitõk kwõmaroñ kajitũkin eok make, ‘Wãween aõ mour ej ke kam̦ool bwe ij lõke kallim̦ur eo an Jeova bwe enaaj kabwe aikuj ko aõ el̦aññe ij pukot m̦okta Aelõñ eo an?’ (Matu 6:31-33) El̦aññe uwaak eo am̦ ñan kajjitõk kein ej aet, innem kwõj kam̦ool bwe kwõj lõke Jeova, im kwõnaaj pojak ñan jabdewõt apañ ko me renaaj wal̦o̦k ñan eok.​—JK. 3:5, 6.

17. (1) Ewi wãween an jerkakpeje eo kwal̦o̦k bwe Jeova ej kijenmej? (2) Ewi wãween ad maroñ kwal̦o̦k ad kam̦m̦oolol kõn an Jeova kijenmej?

¹⁷ Ededel̦o̦k an Jeova peek raan eo im awa eo me enaaj bõktok jem̦l̦o̦kin jukjukun pãd in. (Matu 24:36) Jeova enaaj jel̦ã kijenmej im eban kõm̦m̦an jabdewõt m̦okta jãn iien en̦. Ej lukkuun kijooror in kõjerkakpejeik ro remej, bõtab ej kijenmej. (Job 14:14, 15) Ej kõttar ñan iien eo ejejjet bwe en kõjerkak er bwe ren bar mour. (Jon 5:28) Ewõr un ko unin ad kam̦m̦oolol kõn an Jeova kijenmej. Baj l̦õmn̦ak m̦õk: Kõnke Jeova ej kijenmej, elõñ armej ro, bareinwõt kõj, ear wõr ad iien ‘ñan ad ukel̦o̦k.’ (2 Pit. 3:9) Jeova ekõn̦aan bwe en lukkuun lõñ armej ren maroñ mour indeeo. Kõn men in jen kaalikkar ad kam̦m̦oolole kõn an kijenmej. Ewi wãween? Ikijjeen ad lukkuun kate kõj im pukot ro “em̦m̦an bũrueer ñan bõk mour indeeo” im jipañ er ñan yokwe Jeova im karejar ñane. (Jrb. 13:48) Innem renaaj bõk tokjãn jãn an Jeova kijenmej, ãinwõt bar kõj.

18. Etke jej aikuj kijenmej ippãn ro jet?

¹⁸ Jeova enaaj kijenmej im kõttar m̦ae jem̦l̦o̦kin juon to̦ujin iiõ eo, innem ej kab naaj kõtmãne bwe jen weeppãn. Im ilo naaj iien en̦, Jeova enaaj m̦õn̦õn̦õ in jol̦o̦k ad jerawiwi. Kõn men in, ewõr unin bwe jen kalimjek wõt men ko rem̦m̦an ippãn ro jet im kwal̦o̦k ad kijenmej ippãer. Jen etale juon waanjoñak an juon jeid im jatid kõrã me l̦eo pãleen ear eñtaan kõn an l̦ap an inepata im ear bõjrak an kweilo̦k. Ear  ba: “Men in ear lukkuun kõmetak eõ. Ilo jidimkij mour eo am̦ro ear oktak, im kom̦ro ar jab maroñ kõm̦m̦ani men ko kõm̦ro kar kõn̦aan kõm̦m̦ani.” Meñe men kein aolep rar wal̦o̦k, ak kõrã in me el̦ap yokwe ippãn ear kijenmej ippãn l̦eo pãleen. Ear lõke Jeova, im ear jab ebbweer. Ãinwõt Jeova, ear jab l̦õmn̦ak kõn apañ eo im ear kalimjek wõt men ko rem̦m̦an kõn l̦eo pãleen. Ear ba, “Elukkuun em̦m̦an kadkad ko kadkadin l̦eo pãleõ, im ej kate joñan wõt an maroñ bwe en jako an inepata.” El̦ap an aorõk bwe jen kijenmej ippãn baam̦le eo ad ak ro ilo eklejia eo ad me rej kate er ñan anjo̦ jãn apañ ko reppen!

19. Ta eo jen kate kõj ñan kõm̦m̦ane?

¹⁹ Jesus im enjel̦ ro rar m̦õn̦õn̦õ ilo iien eo kar jinoin kõm̦anm̦an lal̦ in. Ak baj pijaikl̦o̦k m̦õk joñan aer naaj lukkuun m̦õn̦õn̦õ ñan loe an obrak lal̦in kõn armej ro reweeppãn, me rej yokwe im karejar ñan Jeova. Bar pijaikl̦o̦k m̦õk joñan an naaj m̦õn̦õn̦õ ro renaaj etal ñan lañ ñe renaaj loe an armej ro bõk tokjãn jãn jerbal eo aer. (Rev. 4:4, 9-11; 5:9, 10) Im bar pijaikl̦o̦k m̦õk am̦ mour ñe dãnnin kõmjaal̦al̦ ko rej wal̦o̦k jãn am̦ m̦õn̦õn̦õ im ejjab jãn am̦ eñtaan, ñe nañinmej, bũrom̦õj, im mej renaaj jako ñan indeeo. (Rev. 21:4) M̦ae naaj iien en̦, kwõn kate eok ñan am̦ anõke yokwe, mãlõtlõt, im kijenmej eo an Jemãd. El̦aññe kwõnaaj kõm̦m̦ane men in, kwõnaaj kõm̦m̦an bwe kwõn m̦õn̦õn̦õ wõt, jekdo̦o̦n ta apañ ko kwõj jelm̦aiki. (Jem. 1:2-4) El̦ap ad kam̦m̦oolol kõn kallim̦ur eo an Jeova bwe “enaaj wõr juon iien jerkakpeje”!​—Jrb. 24:15.