Television​—Ej ke jũon Ri Lale Emõn an Ajiri ro?

ELÕÑ IEN, ad kõmman bwe ajiri ro nejid ren ettõñ im mõnõnõ ikijen ad kõtlok bwe ren aluij television ñe jej kõmman jet jerbal ko emaroñ juõn men jej watõk emõn. Bõtab ewi wãwen an menin maroñ jelet ajiri ro nejim?

“Ennan ko jen television eo me rej jelet eñjake ko ad remaroñ bareinwõt jelet ajiri jidik ro,” The New York Times ej report. Ilo juõn ekkatak rar kõmmane ilo ran kein, rar kwalok ñan ajiri ro me juõn air yiõ kin juõn kareelel ilo television me juõn ri kõmman pija ej emmakitkit einwõt juõn kein ikkure ilo elõñ wãwen ko. “Ke ri kõmman pija eo ej emmakit ilo an mijak kein ikkure eo,” Times eo ej ba, “ajiri ro rar makoko in ikkure kake im rar mejen inebata, kananaik mejeir im jañ. Ke ri kõmman pija eo ear elloetak kin kein ikkure eo, ajiri ro rar mõnõnõ in ikkure kake.”

Alikar bwe, television emaroñ jelet ajiri jidik ro. Ak ta kin aetokin kitien an naj jelet ajiri ro? Dr. Naoki Kataoka, juõn ri katak kin ajiri ro ilo Kawasaki Medical College ilo juõn jikin ilo Kurashiki, Japan, ear lo bwe elõñ ajiri ro me rej baj bed wõt im jab konono im ewõr jidik wãwen ilo turin mejeir. Aolep ajiri rein rar aluij TV ak video ko iumin juõn ien eaetok. Juõn ladik ruo an yiõ ejjab maroñ bwebwenato aetok ibben armij im jet wõt nan ko ejelã. Ear aluij video ko jen jibboñ ñan jota aolep ran jen ke ear juõn an yiõ. Elikin wõt an kar jinen, bõk nan in kakabilek jen doctor eo, ear bõjrak an kõtlok an ladik eo aluij video ko im ear jino an ikkure ibben bareinwõt ear lõñlok nan ko ejelã. Aet, ro jemen im jinen rej aikwij kõmman men ko ibben don ibben ro nejiir.

Jehovah Anij, Ri Jeje eo kin karõk in family, ear kalikar aorõkin konono ibben don. Ilo ien ko remotlok Ear jiroñ armij ro an: “Im kwon kanuij katakin ro nejõm [kin Nan in Anij], im kwon konono kaki ñe kwoj jijõt ilo mweo imõm, im ñe kwoj etetal ilo ial, im ñe kwoj babu, im ñe kwoj jerkak.” (Duteronomi 6:7) Ro jemen im jinen, jab television, remaroñ katakin ajiri ro ilo wãwen eo emõntata kin nan im joñok, ‘ilo ial eo ren etal ie.’​—Jabõn Kennan Ko 22:6.