Ro Ettã Burueir Renaj Jolet Lal

“Ij lemnak bwe wãwen mour otemjej renaj oktak im jeblak einwõt kar mokta. . . . Ejjab kiõ wõt, ak ilo juõn ien eo etto wõt jen kiõ, ñe enaj wõr juõn lañ ekãl im juõn lal ekãl.”​—Jean-Marie Pelt, juõn Ri France ekabel ilo joñwe emõnin mejatoto, lojet im lal.

KIN air inebata kin jorrãn ko ilo mejatoto, lojet, lal, im makitkit ko an armij ion lal, elõñ rekõnan lo an lal in ad oktak im erom juõn paradise. Ak, kejatdikdik in ejjab juõn ettõnak bajjek ilo ebeben in kein ka 21 wõt. Ilo ien ko etto, Bible eo ear kallimur bwe Paradise eo ion lal enaj jeblak. Jet ian nan in keañ ko an Jesus me elõñ rej jelã kaki rej “ro etã burueir; . . . re naj jolit lõl” im “ren kõmõnmõn ankil Am einwõt i lõñ, bareinwõt ion lõl.” (Matu 5:5; 6:10) Bõtab, rainin, ejjab kanuij lõñ armij rej tõmak ilo juõn paradise ion lal im armij ro ettã burueir renaj jokwe ion. Elõñ ian ro rej ba rej Christian, rar jolok air tõmak ilo juõn Paradise.

Juõn magazine ilo kajin France etan La Vie ear kamelele kin unin an kabuñ eo an Catholic kar jolok tõmak eo kin juõn paradise​—ijin ion lal ak ilañ: “Elikin an bed einwõt juõn ian katak ko relap ilo kabuñ in Catholic iumin elõñlok jen 1,900 yiõ ko, [lemnak eo kin juõn] paradise enañin kar jako jen ien an priest ro kamakelok iair ñan air jar im kalmenlokjen, katak ko rej kwalok kaki ilo Sunday, men ko rej katak kaki ilo school in kabuñ, im katak in kabuñ ko ñan erom juõn uan kabuñ in Catholic.” “Paradise” ej juõn nan ej bed ilo “juõn kõdo jiliñliñ” in “ittino im bwok.” Ilo jelã kake, jet ian ri kaki ro rejjab kõnan konono kake kinke ej “bõkmantak elõñ melele ko kin mõnõnõ ion lal.”

Ñan Frédéric Lenoir, juõn ri kabel ej etale dolul in kabuñ ko, lemnak ko kin juõn paradise ear erom juõn men “rejelã im jab itoklimo kake.” Eindein, Jean Delumeau, juõn ri jeje bwebwenato im eo ear je elõñ book ko kin katak in, ej tõmak bwe jejjet in kitien kallimur ko ilo Bible ej juõn men in kõkkar. Ej je: “Ñan kajitõk eo, ‘Ta eo kin kejatdikdik eo kin Paradise eo?’ Tõmak eo an Christian ej uak: Kamolol kin jerkakbiji eo an Ri Lomor eo, juõn ran kij aolep jenaj jibwe pein don im mour ilo burukuk im mejed renaj lo mõnõnõ.”

Ennan in kin juõn paradise ion lal ewõr ke tokjen ñan ran kein? Ta kejatdikdik eo ebellok ñan lal in ad ilo ran ko tokelik? Etab ke vision eo am kin ran in ilju im jeklaj, ak kwomaroñ ke kalaplok am lolokjen kake? Katak eo tok ilal enaj uake kajitõk kein.

 [Credit Line eo ilo peij 2]

COVER: Emma Lee/Life File/Getty Images