Juõn Katak Kin Utiej Buru im Ettã Buru

JUÕN ien ilo mour eo an King David juõn men ear walok im kalikar oktak eo ikõtan ettã buru eo emol im utiej buru. Menin ear walok elikin an David anjo ion Jerusalem im kõmman bwe en jikin kwelok eo an elap. David ear watõk bwe Jehovah einwõt Kiñ eo emol an Israel, kin menin ear karõk bwe ren bõktok Tebteb eo, me ej kakõllan bed eo an Anij, ñan jikin kwelok eo. Joñan an aorõk ien in ñan David bwe ear kwalok an lañliñ iman mejen armij otemjej ke ear lor priest ro ilo ien eo rar ineke Tebteb eo. Armij ro ilo Jerusalem rar lo bwe king eo air ej “kelok” im “eep . . . kin aolepen an maroñ.”—1 Kronikel 15:15, 16, 29; 2 Samuel 6:11-16.

Bõtab, lio belen David, Michal, ear jab kobalok ibbeir ilo ran in elemõnõnõ. Ear reilallok jen window eo an, im jen an nebar David kin wãwen an kwalok aibujuij im nebar ñan Jehovah, ear “kejekron e ilo buruen.” (2 Samuel 6:16) Etke Michal ear kwalok eñjake rot in? Alikar, ear utiej buruen kinke ear nejin king eo mokta an Israel, Saul, im kiõ ej belen king eo kein karuo an Israel. Emaroñ kar eñjake bwe kiñ eo ibben en kar jab kõttãik e ñan armij ro rettã im kobalok ibbeir ilo kwojkwoj ko air. Kain eñjake rot in kin utiej buru ear kwalok ilo wãwen an kar yokyokwe David ke ear roltok ñan mweo imõn. Ilo kajirere ear ba: “E nañin aibujuij kiñ in Israel ranin, eo e ar mõke elõklok e iman mejen ro dri korijeran kõra ro an einwõt juõn ian armij re wan ej elõkloke!”—2 Samuel 6:20.

Ewi wãwen an David kar emmakit kin kajirere in? David ear kauweik Michal ilo an ba bwe Jehovah ear karmijeteik jemen, Saul, ak ear buñburuen kin e. David ear bareinwõt ba: “Im e naj laplok aõ irjikine iõ, im I naj etã iman meja: a kin ro dri korijera kwar konono kake, re naj nebar iõ.”—2 Samuel 6:21, 22.

Aet, David ear beek ilo buruen bwe en wõnmanlok im karejar ñan Jehovah ilo ettã buru. Lemnak in ej jibañ kij ñan melele kin etke Jehovah ear naetan David “armij buruen einwõt buruõ.” (Jerbal 13:22; 1 Samuel 13:14) Ilo mol, David ear lor wanjoñok eo emõntata kin ettã buru—kar eo an Jehovah Anij. Ekaitoktoklimo, nan ko David ear kajerbali ke ear ba ñan Michal, “I naj etã” ej itok jen nan in Hebrew eo me rej bareinwõt kajerbale ñan kamelele kin lemnak eo an Anij kin armij. Meñe Jehovah ej Eo Eutiejtata ijoko otemjej ilañ im ion lal, Sam Ko 113:6, 7 ej kamelele bwe ej ‘kõtaik E bwe en lo men ko i lõñ kab ilo lõl. Ej kejerkak dri jeramel jen iloan bõñõlñõl, im kwotõke dri aikwij jen be in brij.’

Kinke Jehovah ettã buruen, eñin unin an dike “mejen dri añte” ro eutiej burueir. (Jabõn Kennan Ko 6:16, 17) Kin an kwalok kadkad in enana im jab kautiej kiñ eo me Anij ear kãlete, Michal ear jab maroñ keotak ñan David juõn nejin ladik. Ear ejelok nejin mae ien ear mij. Elap an aorõk katak in ñan kij aolep! Ro rekõnan bõk buñburu eo an Anij rej aikwij bokake nan kein: “Kom otemjej komin etã buruemi, im korijer ñõn dron: bwe Anij ej jumae ro dri jua, a Ej lelok joij ñõn ro dri etã burueir.”—1 Piter 5:5.