Nan eo an Jeova Ej Mour Wõt

Katak ko Relap Jen Buk in Reveles̃õn​—II

TA EO ej ber iman ro rej kabuñ ñõn Jeova im ñõn ro rejjab? Ta ilju eo an Setan im dimon ro an? Ta jerammõn ko ro rej bokake Anij renaj bõki iomin Juõn Tausan Yiõ in an Kraist Iroij? Uak ko ñõn kajitõk kein im ko jet raurõk rej walok ilo Reveles̃õn 13:1–22:21. * Japter kein rej kwalok kin vis̃õn ko 9 eliktata ian vis̃õn ko 16 me dri jilik Jon ear loi enañin 1,900 yiõ ko remotlok.

Jon ear je “Emõnõnõ eo ej konono ilo buk in im ro rej roñjake nan ko an kũr in, im kejbãrok men ko emwij jeji ilo e.” (Rev. 1:3; 22:7) Ilo ar riit im jerbale ta eo jej katak jen buk in Reveles̃õn, men in emaroñ jelet buruer, kakajur tõmak eo ar ilo Anij im Nejin, Jisõs Kraist, im ej letok ñõn kij kejatrikrik eo kin juõn ilju emõn.​—Hib. 4:12.

KAR LUTÕK JÃBI KO JILJILIMJUÕN IN ILLU AN ANIJ

(Rev. 13:1–16:21)

Reveles̃õn 11:18 ej ba: “Dri ailiñ ko r’ar illu, im e ar itok [an Anij] illu, im ien . . . kokkure ro rej kokkure lõl.” Ñõn kwalok kin etke Anij ear illu, vis̃õn eo kein kadrualitõk ej kwalok kin makõtkit ko an “kiru awia . . . im iben joñoul drun im jiljilimjuõn bõran.”​—Rev. 13:1.

Ilo vis̃õn eo kein kadruatimjuõn, Jon ej lo “Lam ej jutõk ion tol Zaiõn, im iben jibuki eñoul im emen tausan.” Im rein kar “wiaik ir jen ian armij ro.” (Rev. 14:1, 4) Im ilo ejja vis̃õn in wõt, ej walok jiljino nan in keañ ko an enjel ro. Ilo vis̃õn eo tok juõn, Jon ear lo “jiljilimjuõn enjel, im ibeir jiljilimjuõn men in kaiñtan ko.” Alikar, Jeova mõke ear kakien enjel rein ñõn air lutõk “jãbi kõn jiljilimjuõn in illu an Anij” ion jet mõtõn ko ilo lõl eo an Setan. Ilo jãbi kein, eor nan in keañ im kakkõl ko kin ekajet ko an Anij. (Rev. 15:1; 16:1) Ilo vis̃õn kein ruo, rej letok melele ko jet kin ekajet eo an Ailiñ eo me ej ekkejellok iben wo eo ken ka jilu im jilil eo kein ka jiljilimjuõn.​—Rev. 11:14, 15.

Emwij Uaki Kajitõk ko Rej Berber ion Baibel:

13:8​—Ta in “buk in mour an Lam eo”? Men in ej juõn buk in kõkkar me ej ber etan ro im renaj iroij iben Jisõs Kraist ilo Ailiñ eo an ilõñ. Ej bareinwõt kitibuj etan dri kabit ro me rej ber wõt ion lõl, im eor ibeir kejatrikrik eo ñõn mour ilõñ.

13:11-13​—Ewi wãwen kiru eo im eor ruo drun ion bõran ej emmakit einwõt juõn drakon im ej kõmõn bwe kijeek en wõnlõltak jen lõñ? Kiru eo im eor ruo drun ion bõran ej pijaik ailiñ ko relap an Amerika im England. An konono einwõt juõn drakon ej kalikar bwe ej kajerbal nan in kamijõk ko, ijjibed ko, im kõmõn ko relej ñõn iun armij ñõn air kõtãik ir iomin iroij eo an. Ej kõmõn bwe kijeek eo en wõnlõltak jen lõñ ikijen an kõmõn e mõke einwõt juõn dri kanan emol ilo an ba bwe ear anjo ion kajur ko renana ilo bata ko ruo an lõl in im an kar anjo ion kien Communism.

16:17​—Kar lutõk jãbi eo kein kajiljilimjuõn ion “mejatoto” it eo? “Mejatoto” eo  ej pijaik lemnok eo an Setan, “jitõb [ak lemnok] eo ej jerbal ilo ro dri kiblia.” Aolep armij ro rej mõtõn lõl eo enana an Setan rej menonoiki mejatoto in kõkkar eo e baijin.​—Ep. 2:2.

Tokjen Katak ko ñõn Kij:

13:1-4, 18. “Kiru awia” eo ej kõkkar kin kien ko an armij me rej “walokliñlok jen lometo,” melelen jen jarlepju in armij ro rebwok. (Ais. 17:12, 13; Dan. 7:2-8, 17) Kiru in, me Setan ear kõmõne im lelok kajur ñõn e, eor iben bwinbwin in 666, me ej kalikar kin joñõn an jab wãppen. Ar melele kin wõn kiru in, enaj jibõñ kij bwe jen jab lore ak kabuñ ñõn e einwõt an armij ro jet kõmõne.​—Jon 12:31; 15:19.

13:16, 17. Meñe jej iion abañ ko ilo kain makõtkit rot kein einwõt ar “wiaik ak wiakake,” jen jab kõtlok bwe men kein ren jibed kij im kõmõn bwe kiru awia eo en kajur ion mour ko ar. Elañe jej bõk ‘kakõlen kiru eo ion peir ak dremar’ ej melelen bwe jej kõtlok bwe kiru awia eo en beek makõtkit ko ar im jelet lemnok ko ar.

14:6, 7. Nan in keañ eo an enjel eo ej katakin kij bwe jej aikwij kijejeto ilo ar kwalok kin nuuj eo emõn kin Ailiñ in Anij. Jej aikwij jibõñ dri katak ro ar ñõn koutiej im nebar Jeova Anij.

14:14-20. Ñe “jonikõn lõl” ererelok, melelen ñe emwij aini ro renaj bõk lomor, enaj ien ñõn an enjel eo aini “vain in lõl” im joloke “na iloan kein joniak wine in illu eo elab an Anij.” Vain eo ej jitõñlok ñõn jukjuk im ber in kien ko renana an Setan im “worwor” in leen ko an renana, me naj kokkuri ñõn in drio. Jen beek ñõn jab kõtlok bwe vain in lõl en jelet kij.

16:13-16. Nan ko an “jitõb r’õtton” rej kõkkar kin nan in kareelel ko an dimon ro. Kin air jab kõnan bwe en oktõk buruen kiñ ro an lõl kin lutõk in jãbi in illu ko jiljilimjuõn an Anij, dimõn ro rej kajerbal nan kein ñõn kamõkit kiñ ro bwe ren jumae Jeova.​—Mat. 24:42, 44.

16:21. Ke ej ebaktok jemlokõn jukjuk im ber in enana an Setan, keañ kin nan in ekajet ko an Jeova nae jukjuk im ber in emaroñ kitibuj nan in ekajet ko rekajur, me kar pijaiki einwõt wut ebin ak ice. Meñe eindrein, armij rej wõnmanlok wõt im blaspim nae Anij.

KIÑ EO EAR ANJO EJ IROIJ

(Rev. 17:1–22:21)

“Babilõn Elap,” eo ej rolul in kabuñ ko rewan ibelakin lõl, ej mõtõn eo ekajõjõ ilo lõl in enana an Setan. Vis̃õn eo kein ka 11 ej pijaik e einwõt juõn “kõra ekijoñ” im ej “jijõt ion kiru ejurjur.” Kiru in im eor “joñoul drun” ilo bõran me lio ej jijõt ion enaj oktõk im kokkure e bwe en lukkun joko. (Rev. 17:1, 3, 5, 16) Ilo an keiri kõra ekijoñ in ñõn juõn “jikin kwelok eo elap,” vis̃õn eo tok juõn ej kejela kin buñ eo an im ej kwalok juõn nan ekairujruj ñõn armij ro an Anij bwe ren “drioijtok jen e.” Elõñ rej kwalok air buromõj kin an buñ. Bõtab, ilo lõñ rej lõñliñ, kin “belele eo an Lamb eo.” (Rev. 18:4, 9, 10, 15-19; 19:7, UBS) Ilo vis̃õn eo kein ka 13, eo ej uwe ion “ors emouj” ej etal im tõrinaek dri ailiñ ko im kokkure jukjuk im ber eo enana an Setan bwe en joko.​—Rev. 19:11-16.

Ak ta kin “serpent eridto, eo ej devil im Setan”? Ñãt eo naj “jolok e na ilo lomalo in kijeek”? Eñin ej juõn ian men ko vis̃õn eo kein ka 14 ej kwalok kake. (Rev. 20:2, 10) Vis̃õn ko ruo eliktata rej kalikar jidrik in naj wãwen mour ilo ien eo Jisõs enaj iroij iomin 1,000 yiõ. Ilo jemlokõnlok “reveles̃õn” eo kar lelok ñõn Jon, ej lo juõn ‘river in dren in mour ej torlok iolapin ial eo,’ im juõn nan in kir ebellok ñõn aolep ro rej “maro.”​—Rev. 1:1; 22:1 ,2, 17.

 Emwij Uaki Kajitõk ko Rej Berber ion Baibel:

17:16; 18:9, 10​—Etke “kiñ ro an lõl” rej buromõj kin rolul eo rar mõke kokkure? Unin ej kin air kibbon. Elikin kokkure eo an Babilõn Elap, kiñ ro an lõl rej kab naj kile kin joñõn an kar jibõñ ir. Ear kowãnik jerbal ko air relej im ear bareinwõt jibõñ ir ñõn rejañ jodrikdrik ro bwe ren bõk kwonair ilo tõrinae. Im ear lap kwonan ñõn kõmõn bwe armij ro ren bokake kien ko.

19:12​—Etke Jisõs wõt ejela kin ãt eo juõn etan me kar jab kalikare? Alikar ãt in ej jutõk kin ber im jerbal ko an Jisõs ejejuair me enaj lõñliñ kaki ilo ran eo ran in Iroij, einwõt jerbal ko rej walok ilo Aiseia 9:6. Ejelok bar juõn ejela kin ãt in kinke jerbal ko an reinjuõn im e wõt emaroñ melele kin ta melelen an ber ilo juõn jerbal elap an utiej. Bõtab, Jisõs ej lelok jet ian jerammõn kein ñõn ro uan dri kabit ro, im ilo wãwen in ej einwõt ñe ej ‘je ãt eo ekãl etan’ ibeir.​—Rev. 3:12.

19:14​—Wõn ro renaj ber iturin Jisõs ilo Armagedõn? Ibwiljin ‘jar in tõrinae eo ilõñ’ me rej kobalok iben Jisõs ilo tõrinae eo an Anij, rej enjel ro im bareinwõt dri kabit ro me ererelok air bõk jinekjij eo air ilõñ.​—Mat. 25:31, 32; Rev. 2:26, 27.

20:11-15​—Wõn ro emwij je etair ilo “buk in mour” eo? Ilo buk in ej kitibuj etan aolep ro im renaj bõk mour in drio. Rein rej kitibuj Kristian dri kabit ro, ro uan jar eo elap, im dri korijer ro retiljek an Anij me renaj ian ‘ro remõn me renaj jerkakbiji.’ (Jerbal 24:15; Rev. 2:10; 7:9) Ro rej ian ‘ro renana im renaj jerkakbiji’ naj je etair ilo “buk in mour” elañe renaj jerbali nan in jiroñ ko “emwij jeje ilo buk ko” me renaj bellok ilo ien iroij eo an Jisõs iomin 1,000 yiõ. Bõtab, ejjab melelen bwe eban ejeor etair jen buk eo. Elañe dri kabit ro rej kamol air tiljek ñõn mij, inem etair enaj berwõt ñõn in drio. (Rev. 3:5) Ro renaj mour ion lõl enaj berwõt etair ñõn in drio elañe rej le jen melejoñ eo eliktata ilo jemlokõn juõn tausan yiõ.​—Rev. 20:7, 8.

Tokjen Katak ko ñõn Kij:

17:3, 5, 7, 16. “Meletlet jen lõñ” ej jibõñ kij ñõn melele “men eo etino an kõra eo, im kiru eo ej jijõt ion.” (Jem. 3:17) Ilo jinoin, kiru awia eo ilo kõkkar kar naetan League of Nations im tokelik ear erom United Nations. Ar melele kin men eo etino en kar kamakit kij ñõn ar kijejeto in kwalok kin nuuj eo emõn kin Ailiñ in Anij im keañ kin ran in ekajet eo an Jeova.

21:1-6. Jemaroñ lukkun liki bwe jerammõn ko kar kanan kaki me renaj walok iomin iroij eo an Ailiñ eo renaj jejit kitieir. Etke? Kinke kar ba kaki: “Rejejit!”

22:1, 17. “River in dren in mour” eo ej pijaik menin letok ko an Jeova ñõn jolok jerawiwi im mij jen armij ro rekiblie. Jidrik in dren in ej bellok ñõn armij ro kiõ. Ilo kamolol, jen mõnõnõ in bõk nan in kir in ñõn itok im “bõk dren in mour ejij wõnan” im jen bareinwõt mõnõnõ in lelok ñõn ro jet!

[Kamelele ko Itulal]

[Pija eo ilo peij 5]

Armij ro rekiblie renaj lo jerammõn ko elap air aibujuij iomin iroij eo an Ailiñ eo!