Kajitõk ko Jen Ro Rej Riit

Baibel eo ej konono kin “buk in Jashar” im “buk in tõrinae ko an Jeova.” (Josh. 10:13; Bwin. 21:14) Buk kein ruo rejjab mõtõn Baibel eo. Anij ear ke kakõrmoli buk kein me armij rar luji?

Ejelok unin ar maroñ ba bwe Anij ear kakõrmoli buk kein ruo me armij rar luji tokelik. Dri jeje Baibel ro rar kwalok kemelele ko jen elõñ buk ko jet. Jet ian title ko an buk kein rar kobaiki ilo Baibel eo, bõtab, ilo ran kein armij ro rejjab jela kin buk kein. Ñõn wanjoñok, 1 Kronikel 29:29 ej kwalok kin “buk in bwebwenato an Samuel, dri lolo eo,” “buk in bwebwenato an Netan, dri kanan eo,” im “buk in bwebwenato an Gad, dri lolo eo.” Buk kein jilu remaroñ jitõñlok ñõn buk in 1 Samuel im 2 Samuel ak buk in Dri Ekajet.

Ilo bar juõn wãwen, remaroñ jitõñlok ñõn buk ko me rejjab mõtõn Baibel ak rej kajerbal ãt ko etan armij rej ber ilo Baibel. Jemaroñ wanjoñok kin buk ko emen ilo ien ko etto: “buk in bwebwenato ko an kiñ ro in Juda,” “buk eo an kiñ ro kiñ in Juda im Israel,” “buk in kiñ ro kiñ in Israel,” im “buk in kiñ ro an Israel im Juda.” Meñe etan buk kein remaroñ einlok wõt buk ko ilo Baibel einwõt 1 Kiñ im 2 Kiñ, ak Anij ear jab kakõrmol buk kein emen im rejjab mõtõn buk ko ilo Baibel eo. (1 Kiñ 14:29; 2 Kron. 16:11; 20:34; 27:7) Rar baj bwebwenato ko rar jeje ilo ien ko ke dri kanan Jeremaia im Ezra rar je buk ko air me rej ber ilo Baibel.

Ilo mol jet dri jeje Baibel rar jitõñlok ak etale buk in bwebwenato ko an lõl me rar ber ilo ien ko air meñe Anij ear jab kakõrmoli. Buk in Ester 10:2 ej kwalok kin “buk in bwebwenato an kiñ ro in Midia im Põrsia.” Ilo ejja wãwen in lok wõt, ke Luk ear jino kapojõk ñõn je Gospel ear “kanuij jela men otemjej jen jinoin,” bwe en jejit an je buk in Gospel eo an. Bwelen, kar melelen bwe ear etale buk ko jet ke ear kõmõne lajrõk eo kin menmenbwij eo an Jisõs eo me jej loe ilo Gospel eo an. (Luk 1:3; 3:​23-​38) Anij ear jab kakõrmole buk ko me Luk ear kõmõn etale ko an jene, ak Anij ear kakõrmole Gospel eo an. Im Gospel in ear or wõt tokjen ñõn kij.

Ak ikijen buk kein ruo etan “buk in Jashar” im “buk in tõrinae ko an Jeova” rar jei ak Anij ear jab kakõrmoli. Eñin unin Anij ear jab kejbãrok buk kein. Kemelele ko ilo buk kein ruo rar kõmõn an dri meletlet ro lemnok bwe buk kein rar buk in al ko rar al kin tõrinae ko rar walok ikõtan dri Israel im dri kijirãt ro air. (2 Sam. 1:​17-​27) Juõn buk me ej kemelele kin bwebwenato ko kin Baibel ej ba bwe “kobõn buk kein kar walok jen al ko me dri al ro ilo ien ko etto ilo Israel rar kine.” Jet dri jeje ro me Anij ear kajerbal ir jet ien, einwõt dri kanan ak dri lolo ro, rar bareinwõt je jet buk ko me Anij ear jab kakõrmoli ak kobaiki ilo jeje ko an ilo Baibel eo me eor “tokjeir kin katakin, kowe, im kajime” kij ilo ran kein.​—2 Tim. 3:​16; 2 Kron. 9:​29; 12:15; 13:22.

Meñe dri jeje ro rar konono kin buk kein ke rar je Baibel eo, ak ejjab melelen bwe Anij ear kakõrmoli buk kein. Bõtab, Jeova Anij ear kejbãrok aolep jeje ko ilo “nan ko an” im renaj “bed ñõn indrio.” (Ais. 40:8, UBS) Aet, nan ko me Jeova ear kõnan je ilo buk in Baibel ko 66, rej ñõn ar “wãppen im emwij kõkõmõnmõn [kij] ñõn jerbal emõn otemjej.”​—2 Tim. 3:​16, 17.