Kwon Reimanlok Wõt ñõn Mejenkajik Eo

“Innem ij ettõr jimwelok wõt ñõn mejenkajjik eo.”​—PIL. 3:​14, UBS.

1. Ta jinekjij eo kar likit iman dri jilik Paul?

 DRI JILIK Paul, me ãt eo juõn etan ej Saul eo ear lotak ilo Tarsõs, ear itok jen juõn baamle ekanuij in buñbuñ. Juõn dri kaki ebuñbuñ, etan Gameliel, ear katakin Paul kin Kien ko an kabuñ eo an ro jimair. (Jerb. 22:3) Paul emaroñ kar bõk juõn jerbal elukkun emõn im utiej; ak ear ilok jen kabuñ eo an im erom juõn dri Kristian. Inem ear reimanlok ñõn mejenkajik ak jinekjij eo kin mour in drio me kar likit iman, bwe en juõn kiñ im pris ilo Ailiñ eo an Anij ilõñ. Ailiñ in enaj iroij ion lõl in me enaj oktõk im juõn paredais.​—Mat. 6:​10; Rev. 7:4; 20:6.

2, 3. Ewi joñõn an kar Paul kaurõk jinekjij eo an ñõn mour ilõñ?

² Ñõn kwalok kin joñõn an kar Paul lukkun kaurõk jinekjij in, ear ba: “Men ko men in jibarek iba, men kein I ar watõki jerata kin Kraist. Aet, emol, im ij watõki men otemjej jerata wõt, kin an kanuij emõn aõ jela Kraist Jisõs aõ Iroij: kin Eo men ko otemjej aõ re joko, im ij watõki kwobij.” (Pil. 3:​7, 8) Men ko armij ro elap air kaurõki, einwõt utiej, mweie, juõn jerbal emõn, im buñbuñ, Paul ear watõki einwõt kobij elikin wõt an kar katak kin karõk ko remol an Jeova ñõn armij ro.

³ Jen ien eo manlok, men eo Paul ear lukkun kaurõke kar jelalokjen eo kin Jeova im Kraist, eo me Jisõs ear ba ilo jar eo an ñõn Anij: “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Kõnan eo ekajur an Paul ñõn bõk mour in drio ej alikar ilo nan ko an ilo Dri Pilippai 3:​14, UBS: “Innem ij ettõr jimwelok wõt ñõn mejenkajjik eo bwe in maroñ wini; bwe eñin mejenkajjik eo: kir eo an Anij ilo Christ Jesus ñõn mour eo ilõñ.” Aet, ear reimanlok wõt ñõn jinekjij in ej ber iman ñõn mour in drio im jerbal ilo Ailiñ eo an Anij ilõñ.

Mour ñõn In Drio ion Lõl

4, 5. Ta jinekjij eo eber iman million armij ro rej kõmõnmõn ankil an Anij ranin?

⁴ Ñõn jarlepju in armij ro rej kãlet ñõn kõmõnmõn ankil an Anij, jinekjij eo rej aikwij kate ir ñõn bõke ej ñõn mour in drio ilo jukjuk im ber eo ekãl an Anij. (Sam 37:11, 29) Jisõs ear kamol bwe kejatrikrik in enaj jejit kitien. Ear ba: “Emõnõnõ ro etã burueir; bwe re naj jolit lõl.” (Mat. 5:5) Jisõs ej e eo kar kajolite lõl in ñõn e, einwõt an Sam 2:8 ba, im enaj or 144,000 ro mõtõn me renaj iroij iben ilõñ. (Dan. 7:​13, 14, 22, 27) S̃ip ro jet me renaj mour ion lõl renaj “jolit” jikin in me Ailiñ eo ‘e ar keboje ñõn ir jen jinoin lõl.’ (Mat. 25:34, 46) Im jej lukkun tõmak bwe men in enaj jejit kitien kinke Anij, eo ear kalimur kin men in, “E ban riõp.” (Tait. 1:2) Einwõt Joshua, jemaroñ liki bwe kalimur ko an Anij renaj jejit kitieir. Joshua ear ba ñõn dri Israel ro: “E ar jab likjõp juõn men ian men ko remõn Jeova ami Anij e ar ba kin kom; men otemjej re jejit ñõn kom, ejelok juõn iair e ir.”​—Josh. 23:14.

⁵ Wãwen naj mour ilo jukjuk im ber eo ekãl an Anij ejamin kaburomõjmõj einwõt ranin. Enaj kanuij oktõk kinke enaj ejelok tõrinae, kowaroñ, jeramel, jab ekajet jime, nañinmij, im mij. Inem armij ro renaj ejmour im naj  mour ion lõl in me enaj oktõk im juõn paredais. Wãwen mour ilo ien eo enaj laplok an kajuburuõd jen joñõn eo jar kõtmene kake. Emol, ran otemjej enaj bõktok lõñliñ elap ñõn armij ro. Ej juõn jerammõn elap an emõn!

6, 7. (a) Ewi wãwen Jisõs ear kwalok kin men ko jemaroñ kõtmene kaki me renaj walok ilo jukjuk im ber eo ekãl? (b) Ewi wãwen ro remij renaj bareinwõt bõk juõn ijjino ekãl?

⁶ Ke Jisõs ear ber ion lõl, jitõb kwojarjar an Anij ear kamaroñ e ñõn kwalok kin men ko remõn me renaj walok ibelakin lõl ilo jukjuk im ber eo ekãl. Ñõn wanjoñok, Jisõs ear jiroñ leo me ear mij enbwinin iomin 38 yiõ ko bwe en etetal. Baibel ej ba bwe kar eindrein an leo kõmõne. (Riit Jon 5:​5-9.) Ilo bar juõn ien, Jisõs ear iion “juõn armij e bilo jen ien lotak” im ear kemour e. Tokelik, armij ro rar kajitõk iben leo me ear bilo kin Eo ear kemour e, im ear uak: “Jen jinoin lõl ejelok en e ar roñ bwe jabrewõt armij e ar kebellok mejen eo ej bilo ke e ar lotak. Elañe armij in e jab jen Anij, e jab maroñ in kõmõnmõn jabrewõt.” (Jon 9:​1, 6, 7, 32, 33) Jisõs ear maroñ kõmõni aolep men kein kinke Anij ear lelok kajur eo ñõn e. Jabrewõt jikin ko Jisõs ear etal ñõni, ear “kemour ro rar kõnan mour.”​—Luk 9:​11, UBS.

⁷ Jisõs ear maroñ kemour ro dri nañinmij, ro rej utame ilo enbwin, im bareinwõt kajerkakbiji ro remij. Einwõt juõn wanjoñok, juõn ledrik 12 an yiõ ear mij, im men in ear lap an kaburomõj jemen im jinen. Ak Jisõs ear ba: “Ledrik, Ij ba ñõn yuk, kwon jerkak!” Im ledrik eo ear jerkak! Kwomaroñ ke pijaikilok kin joñõn an kar jemen im jinen im ro jet iñjake kin men in ear walok? (Riit Mark 5:38-​42.) Ilo jukjuk im ber eo ekãl an Anij, renaj kanuij “bwilõñ” ñe elõñ billion armij ro renaj jerkakbiji, kinke Baibel ej ba “bwe ro remõn im ro renana re naj jerkakbiji.” (Jerbal 24:15; Jon 5:​28, 29) Naj lelok ñõn rein juõn ijjino ekãl ilo mour im kejatrikrik eo ñõn mour manlok wõt ñõn in drio.

8, 9. (a) Ñe Kraist enaj Iroij iomin Juõn Tausan Yiõ, ta eo enaj walok ñõn jerawiwi eo jar jolite jen Adam? (b) Ta berberin air naj ekajete ro rar mij?

⁸ Enaj bellok juõn ien emõn ñõn an ro renaj jerkakbiji bõk mour. Rejamin ekajete rein ekkar ñõn jerawiwi ko rar kõmõni mokta jen air kar mij. (Rom. 6:7) Ñe naj jerbale tokjen ko kin katok in binmour eo iomin Juõn Tausan Yiõ in an Kraist Iroij, ro dri kiblie iomin Ailiñ eo renaj wãppenlok mae ien eo renaj anemkwoj jen aolep tokjen ko renana rar walok jen jerawiwi eo an Adam. (Rom. 8:​21) Jeova enaj “warõñlok mij ñõn in drio; im Iroij Jeova e naj kõmraik dren in kemjalal jen mejeir otemjej.” (Ais. 25:8) Nan eo an Anij ej bareinwõt ba bwe naj: “kebellok buk ko,” melelen bwe ro rej mour ilo ien eo renaj bõk melele ko rekãl. (Rev. 20:12) Ñe lõl in enaj jidrik kin jidrik oktõk im juõn paredais, “ro dri lõl re naj katak men in wãnik.”​—Ais. 26:9.

⁹ Naj ekajete ro renaj jerkakbiji, jab kin jerawiwi eo rar jolite jen Adam, ak ikijen men ko rej kãleti ñõn kõmõni. Reveles̃õn 20:12 ej ba: “Im ar ekajet ro remij jen men ko emwij jeje ilo buk ko, ekar ñõn jerbal ko air,” melelen, jerbal ko air elikin air naj jerkakbiji. Men in ej juõn joñok elap an emõn kin ekajet jime, tiriamokake, im yokwe eo an Jeova! Bareinwõt men ko rekaburomõjmõj rar iioni ilo mour ko air ilo jukjuk im ber in enana, rejamin naj ‘kememeji.’ (Ais. 65:17) Kin an or ibeir melele ko rekãl im juõn mour eobrõk kin men ko remõn, men ko renana me rar iioni ilo ien ko remotlok, rejamin naj kaburomõj ir ak renaj melokloki. (Rev. 21:4) Enaj ejja eindrein wõt iben ‘jar eo elap,’ me renaj ellã im mour jen Armagedõn.​—Rev. 7:9, 10, 14.

10. (a) Enaj ewi wãwen mour ilo jukjuk im ber eo ekãl an Anij? (b) Ta eo kwomaroñ kõmõne ñõn jibõñ yuk reimanlok wõt ñõn jinekjij eo?

¹⁰ Ilo jukjuk im ber eo ekãl an Anij, armij ro renaj mour ilo air jab bar nañinmij ak mij. “Dri jokwe ie e jamin ba, I nañinmij.” (Ais. 33:24) Eliktata, kin air lukkun ejmour, kajuju  ran renaj ruj im mõnõnõ in reimanlok ñõn bar juõn ran elukkun emõn. Enaj bareinwõt or ibeir jerbal ko rekajuburu, im renaj maroñ kobalok iben ro rej kwalok air kea kake dron. Wãwen mour rot in ej juõn jerammõn ekanuij emõn! Einwõt juõn nan in rejañ, joij im kebellok Baibel eo am im riiti kanan ko ilo Aiseia 33:24 im 35:​5-7 im kalomõnlokjen kaki. Ñe kwoj riit, kajeoñ in pijaik an men in walok ñõn yuk. Men in enaj jibõñ yuk ñõn reimanlok wõt ñõn jinekjij eo.

Ro Rar Bwijrõk Jen Air Reimanlok ñõn Jinekjij Eo

11. Kemelele kin wãwen an kar emõn jinoin iroij eo an Solomon.

¹¹ Elikin ar katak kin jinekjij eo, jej aikwij kate kij ñõn reimanlok wõt ñõne, kinke elañe jejjab, enaj joko ar lemnok kake. Ñõn wanjoñok, ke Solomon ear erom kiñ ilo ailiñ in Israel, ilo etã buru ear jar ñõn Anij kin meletlet im lolokjen bwe en maroñ jime an ekajet armij ro an Anij. (Riit 1 Kiñ Ro 3:​6-​12.) Tokjen men in, Baibel eo ej ba, “Anij e ar lelok ñõn Solomon meletlet im jelalokjen e kanuij lap.” Emol, “meletlet an Solomon elap jen meletlet an aolepen ro nejin dri rear otemjej, im jen aolepen meletlet an Ijipt.”​—1 Kiñ. 4:​29-​32.

12. Ta nan in kakkõl eo Jeova ear lelok ñõn ro renaj erom kiñ ilo Israel?

¹² Bõtab, ilo ien ko mokta Jeova ear kakkõl jabrewõt eo ear erom kiñ bwe “en jab korlok ors ñõn e mõke” im “en jab korlok belen ñõn e, bwe buruen en jab jeõrlok.” (Dut. 17:14-17) Ñe juõn kiñ ej koorlok ors ko an, men in enaj kar kalikar bwe elaplok an liki jar in tõrinae eo an ñõn kejbãrok ailiñ eo jen an atartar ion Jeova, dri Kejbãrok eo. Im ear kauwatata ñõn an koorlok belen kinke jet iair remaroñ kar itok jen ailiñ ko ibelakin Israel me rar kabuñ ñõn anij ko rewan, im  limarein remaroñ kar ukot buruen jen an kabuñ ñõn Jeova.

13. Etke ear joko an Solomon lemnok kin jerammõn eo kar lelok ñõn e?

¹³ Solomon ear jab bokake nan in kakkõl kein. Jen an eindrein, ear kõmõne men eo Jeova ear jiroñ kiñ ro bwe ren jab kõmõne. Ear ain elõñ tausan ors ko im dri uwe ion ors ko. (1 Kiñ. 4:​26) Ear bareinwõt or 700 belen im 300 konkubain, im elõñ iair rar itok jen ailiñ ko an dri pegan ro me rar ebake Israel. Limarein “rar karel buruen ñõn anij ro jet; inem buruen e jab wãppen iben Jeova an Anij.” Solomon ear bõk kwonan ilo wãwen kabuñ ko rekajõjõ an dri pegan ro me limaro belen rar tellok e ñõni. Tokjen men in, Jeova ear ba bwe enaj ‘kekel ailiñ eo’ jen Solomon.​—1 Kiñ. 11:​1-6, 11.

14. Ta eo ear walok kin an Solomon im ailiñ in Israel jab bokake?

¹⁴ Solomon ear meloklok bwe ear juõn jerammõn elap ñõn an jutõk kin Anij eo emol. Ear lap an bõk kwonan ilo makõtkit ko an kabuñ wan. Tokelik, aolepen ailiñ eo ear buñ jen tõmak, im men in ear tellok ñõn an jebeblok ilo yiõ eo 607, mokta jen an Kraist lotok. Meñe dri Ju ro rar bar jeblak ñõn kabuñ eo emol, elõñ buki yiõ ko tokelik Jisõs ear emmakit im ba: “Naj bõk ailiñ in Anij jen kom, im lelok ñõn dri ailiñ rej kõmõn leen kaki.” Eñin men eo ear walok. Jisõs ear keañ: “Lo mweo imwemi likit e ñõn kom im jeebeplok.” (Mat. 21:43; 23:37, 38) Tokjen an kar jab tiljek, ailiñ eo ear luji jerammõn eo ñõn jutõk kin Anij eo emol. Ilo yiõ eo 70, elikin an kar Jisõs itok ñõn lõl, jar in tõrinae eo an ailiñ in Rom ear kejebeblok Jerusalem im tempel eo, im rar bõk elõñ ian dri Ju ro einwõt air dri kamakoko.

15. Kwalok jet ian wanjoñok ko kin lõmaro me ear joko air lemnok kin men eo elukkun aurõk.

¹⁵ Judas Iskariõt ear juõn ian dri jilik ro 12 an Jisõs. Ear roñ an Jisõs kwalok kin katak ko an rekabwilõñlõñ im ear lo menin bwilõñ ko ear kõmõni jen jibõñ eo jen jitõb kwojarjar eo an Anij. Ak, Judas ear jab kejbãrok buruen. Kar lelok ñõn e erro eo ñõn lali box in jããn ko an Jisõs im dri jilik ro 12. Ak “e dri kwot, im bõjo iben, im ej bõk men ko iloan.” (Jon 12:6) Ear alikar an arõk ke ear kõmõn bebe iben pris ro relap ñõn ketak Jisõs kin jilñoul mõtõn silver. (Mat. 26:14-​16) Bar juõn me ear bwijrõk an reimanlok ñõn jinekjij eo kar Dimas, eo kar mõtõn dri jilik Paul. Dimas bareinwõt ear jab kejbãrok buruen. Paul ear ba: “Dimas e ar illok jen iõ kin an yokwe lõl in.”​—2 Tim. 4:​10; riit Jabõn Kennan Ko 4:​23.

Juõn Men Kij Kajuju Jej Aikwij Katak Kake

16, 17. (a) Ewi joñõn an kajur eo ej jumae kij? (b) Ta eo emaroñ jibõñ kij ñõn kijenmij wõt jen jabrewõt men me Setan ej kajerbali nae kij?

¹⁶ Aolep dri korijer ro an Anij rej aikwij lukkun lemnok kin joñok ko ilo Baibel, bwe kar jiroñ kij: “A men kein r’ar walok ibeir ñõn joñok; in emwij je ir nan in kowe kij, kijeo ien ko eliktata r’ar itok ioer.” (1 Kor. 10:11) Ranin, jej mour ilo ran ko eliktata an jukjuk im ber in enana.​—2 Tim. 3:​1, 13.

¹⁷ Setan Devil, eo ej “anij in lõl in,” ejela bwe “jirik wõt ien iben.” (2 Kor. 4:4; Rev. 12:12) Enaj kate joñõn wõt an maroñ ñõn kabo ro dri korijeran Jeova ñõn kokkure tiljek eo air. Setan eor an maroñ ion jukjuk im ber in, ekoba aolep ial ko ñõn kajededlok melele im nuuj ko. Bõtab, eor juõn men elaplok an kajur ej ber iben armij ro an Jeova, im men in ej ‘kajur eo eutiejtata an Anij.’ (2 Kor. 4:7, UBS) Jemaroñ atartar ion kajur in jen Anij  ñõn jibõñ kij ñõn kijenmij jen jabrewõt men me Setan ej kajerbale nae kij. Kin men in, kar rejañ kij bwe en jab jokwõr ar jar, kin ar liki bwe Jeova enaj ‘letok Jitõb Kwojarjar ñõn ro otemjej rej kajitõk iben.’​—Luk 11:13.

18. En ewi lemnok eo ar kin jukjuk im ber in kiõ?

¹⁸ Jej bareinwõt bõk kakajur ilo ar jela bwe mõtõn jidrik naj bõktok jemlokõn jukjuk im ber in an Setan ak dri Kristian ro remol renaj ellã im mour. “Im lõl e jokolok im mõm ko an: a eo ej kõmõnmõn ankil an Anij ej berwõt in drio.” (1 Jon 2:​17) Ilo ar lemnok kin men in, ejamin juõn menin meletlet ñõn an juõn dri korijeran Anij lemnok bwe eor jabrewõt men ilo lõl in me emaroñ aurõklok jen kõtan eo an iben Jeova! Lõl in me ej ber iomin kajur eo an Setan ej einwõt juõn tima ej tuññũlõllok. Jeova ear letok congregation in Kristian einwõt juõn “waan lomor” ñõn dri korijer ro an retiljek. Ke rej ebakelok jukjuk im ber eo ekãl, emaroñ or ibeir liki kin kalimur in: “Bwe ro rej kõmõn nana re naj joko; a ro re kõtar Jeova re naj jolit ene eo.” (Sam 37:9) Kin men in, kwon reimanlok wõt ñõn mejenkajik in elukkun emõn!

Kwoj Kememej Ke?

• Ewi wãwen an kar Paul lemnok kin jinekjij eo eber iman?

• Ta berberin air naj ekajete ro renaj mour in drio ion lõl?

• Ta ial eo emeletlet kwon bõke kiõ?

[Kajitõk ko ñan katak]

[Pija eo ilo peij 12, 13]

Kwoj ke pijaiki am bõk jinekjij eo ñe kwoj riiti bwebwenato ko ilo Baibel eo?