Ro Rewãnik Renaj Nebar Anij ñõn In Drio

“Ro dru wãnik re naj kememej ir ñõn in drio . . . An wãnik e naj ber ñõn indrio.”​—SAM 112:​6, 9.

1. (a) Ta ilju im jeklaj eo ekamõnõnõ ej ber iman ro me Anij ej watõk ir ro rewãnik? (b) Ta kajitõk eo ej walok?

 JUÕN ilju im jeklaj emõn ej ber iman armij otemjej me Anij ej watõk ir ro rewãnik! Renaj kalaplok air jela kin karkar ko karkarin Jeova ñõn in drio. Enaj laplok air nebar Anij ñe rej kalaplok air katak kin menin kõmõnmõn ko an. Juõn ian menin aikwij ko ñõn bõk juõn ilju im jeklaj emõn ej karkarin “wãnik,” ekkar ñõn Sam 112. Ewi wãwen Jeova Anij eo ekwojarjar im wãnik ej watõk armij ro rejjab wãppen einwõt ro rewãnik? Jekron ewi joñõn ar kate wõt kij ñõn kõmõni men ko rejime, ak jej kõmõn wõt bwir, jet ien bwir ko relap.​—Rom. 3:​23; Jem. 3:2.

2. Kin yokwe eo an Jeova, ta menin kabwilõñlõñ ko ruo ear kõmõni?

² Ilo yokwe, Jeova ear letok juõn wãwen  emõn ñõn watõk armij ro rejjab wãppen einwõt ro rewãnik. Ekijkan an kar kõmõne men in? Mokta, ikijen an kar ukot mour eo an Jisõs jen lõñ ñõn lojen juõn virjin bwe en lotak einwõt juõn armij ewãppen. (Luk 1:​30-​35) Inem, elikin an ro dri kijirãte mõn e, Jeova ear bar kõmõne juõn men ekabwilõñlõñ, ear kajerkakbiji Jisõs ñõn juõn jitõb.​—1 Piter 3:​18.

3. Etke Anij ear kejerammõn Nejin kin juõn mour ilõñ?

³ Jeova ear kejerammõn Jisõs kin juõn men me ear ejelok iben mokta jen an kar itok ñõn ion lõl, ej juõn mour ilõñ im ejelok emaroñ kokkure. (Hib. 7:​15-​17, 28) Jeova ear mõnõnõ in kõmõne men in kinke Jisõs ear tiljek wõt meñe ear jelmae melejoñ ko relap. Ilo wãwen in, Jisõs ear lelok ñõn Jemen juõn uak eyu nae nan in kinaak eo an Setan bwe armij ro rej korijer ñõn Anij ilo kibbon im jab kin air yokwe e.​—Ken. 27:11.

4. (a) Ke ear jeblak ñõn lõñ, ta eo Jisõs ear kõmõne kin kij, im ta eo Jeova ear kõmõne? (b) Ewi am lemnok kin ta eo Jeova im Jisõs rar kõmõne ñõn yuk?

⁴ Jisõs ear kõmõn elõñlok men ko ilo lõñ. Ear ‘walok iman mejen Anij kin kij’ kin aurõkin “bõtõktõkin mõke.” Ilo joij, Jemer ilõñ ear bõk menin katok eo an Jisõs einwõt kein “mirik kin jerawiwi ko ar.” Kin men in, kin ‘bõklikõt erreo,’ jemaroñ ‘jerbal ñõn Anij eo mour.’ Men in ej letok juõn un emõn ñõn ar errã iben nan ko jinoin ilo Sam 112, “Komin nebar Jeova”!​—Hib. 9:​12-​14, 24; 1 Jon 2:2.

5. (a) Ta eo jej aikwij kõmõne ñõn drebij ar wãnik iben Anij? (b) Ilo wãwen it kobõn Sam kein ruo rej kalikar bwe rej errã iben dron? (Lale footnote.)

⁵ Ñõn drebij ar wãnik iben Anij, jej aikwij jerbale tõmak ilo bõtõktõkin Jisõs. Jej aikwij kamolol Jeova ran otemjej kin an lukkun yokwe kij. (Jon 3:​16) Kij bareinwõt jej aikwij wõnmanlok im katak kin Nan in Anij im kate wõt kij ñõn mour ekkar ñõn nan ko an. Sam 112 eor nan in kakabilek ko remõn ñõn aolep ro me rekõnan drebij juõn bõklikõt emõn iman Anij. Sam in ej errã iben Sam 111. Rej jimor kebellok kin nan kein “Komin nebar Jeova.” *

Unin Jej Mõnõnõ

6. Ewi wãwen “armij” eo ej mijõk Anij ilo Sam 112 me ej kemelele kake ej bõk jerammõn?

⁶ “Emõnõnõ armij eo ej mijõk Jeova, ej lõñliñ kake kien ko An. Inen e naj kajurpotata ion lõl; ebeben ro dru wãnik re naj mõnõnõ.” (Sam 112:​1, 2) Ilo jinoin, dri jeje sam eo ej ba juõn “armij” inem jemlokõnlok eon 2 ej ukote ñõn elõñlok “dru wãnik.” Men in ej kalikar bwe Sam 112 emaroñ jitõñlok ñõn juõn kumi. Dri jilik Paul ear rejetake melele in, ilo an kar kajerbale Sam 112:9 ñõn dri Kristian ro ilo ran ko an. (Riit 2 Dri Korint 9:​8, 9.) Ewi wãwen sam in ej kemelele kin wãwen an dri kalor ro an Kraist maroñ mõnõnõ ranin!

7. Etke dri korijer ro an Anij rej aikwij mijõk e, im en kar ewi wãwen eñjake eo am kin kien ko an Anij?

 ⁷ Einwõt an kalikar ilo Sam 112:1, dri Kristian rein remol im rej “mijõk Jeova,” rej lo elap mõnõnõ. Kin an or air mijõk Anij, men in ej jibõñ ir ñõn air bõprae kilan lõl in an Setan. Rej “lõñliñ” ilo air katak Nan in Anij im bokake kien ko an. Men in ej kitibuji nan in kaiñi eo ñõn kwalok kin nuuj eo emõn kin Ailiñ eo ibelakin lõl. Rej kate wõt ir ñõn kõmõn dri kalor ro jen ailiñ otemjej im ilo ejja ien in wõt rej kakkõl dri nana ro kin ran in ekajet eo an Anij me enaj itok.​—Ezek. 3:​17, 18; Mat. 28:19, 20.

8. (a) Ewi wãwen armij ro retiljek an Anij ranin rej bõk jerammõn kin air kijejeto? (b) Ta jerammõn ko rej ber iman ro eor air kejatrikrik ñõn mour ion lõl?

⁸ Jen wõt an dri korijer ro an Anij bokake nan in kaiñi kein, kiõ emwij an lõñlok orair ranin ñõn jiljilimjuõn million. Wõn emaroñ jab errã bwe armij ro an emwij air erom ro ‘rekajurpotata ion lõl’? (Jon 10:16; Rev. 7:​9, 14) Enaj lukkun lap air “mõnõnõ” ñe Anij enaj kajejit karõk eo an. Ro eor air kejatrikrik ñõn mour ion lõl, einwõt juõn kumi, renaj ellã jen “iñtan eo elap” me ej itok wõt im renaj ejaake juõn “lõl ekal” eo me ro ‘rekwojarjar renaj jokwe iloan.’ Tokelik, ro me renaj ellã jen Armagedõn, renaj laplok air “mõnõnõ,” kinke renaj pojõk ñõn karuwaineneiktok million ro renaj jerkakbiji. Ej juõn kejatrikrik ekalõñliñ! Ilo jemlokõn, ro rej ‘lõñliñ kin kien’ Anij renaj tõbar mour eo ewãppen im lõñliñ ñõn in drio kin ‘anemkwojair in aibujuij an ro nejin Anij.’​—2 Pit. 3:​13; Rom. 8:​21.

Kajerbal Mweiuk ko Ilo Meletlet

9, 10. Ewi wãwen dri Kristian ro remol rar kajerbal jelalokjen eo air kin Anij, im ewi wãwen jerbal ko air rewãnik renaj ber ñõn in drio?

⁹ “Mweiuk ko im elõñ mõnni ilo mweo  imõn; im an wãnik ej ber ñõn in drio. Ñõn ro re jimwe maram ej walok ilo marok, e joij wõt, im eobrõk kin tiriamo im wãnik.” (Sam 112:​3, 4) Ilo kar ran ko mokta, jet ian dri korijer ro an Anij rar buñbuñ kin air mweie kin mweiuk ko. Ak ilo bar juõn wãwen, ro me Anij ear buñburuen kake ir rar erom ro remweie, meñe ejjab ilo kõniek. Mol eo in bwe enañin aolep ro me rej kãlet ñõn kõtãik ir mõke ñõn Anij, rejeramel im armij rej drike ir, einwõt ear walok ilo ran ko an Jisõs. (Luk 4:​18; 7:​22; Jon 7:​49) Ak meñe ejjab lap mweiuk, remweie kin jelalokjen an Anij​—Mat. 6:​20; 1 Tim. 6:​18, 19; riit Jemes 2:5.

¹⁰ Dri Kristian dri kabit ro ekoba s̃ip ro jet mõtair rejjab noje jelalokjen eo an Anij jen ro jet. Jen an eindrein, rej romak ñõn ro remõn ilo lõl in emarok an Setan. Rej kõmõne men in ilo air jibõñ ro jet bwe ren bõk tokjen jen men ko reaurõk einwõt jelalokjen eo kin Anij. Dri jumae ro rar kajeoñ in kabwijrõk jerbal in kwalok nan kin Ailiñ eo, bõtab rar jab lo tõbrõk. Ak tokjen jerbal in ewãnik enaj “ber ñõn in drio.” Kin air tiljek wõt iomin melejoñ, eor an dri korijer ro an Anij liki bwe renaj “ber ñõn in drio.”

11, 12. Ta jet ian wãwen ko me ro dron Anij rej kajerbali mweiuk ko eor ibeir?

¹¹ Armij ro an Anij, ekoba dri Kristian dri kabit ro im ro rej mõtõn ‘jar eo elap,’ rar kamol air joij im lelok men ko ilo kõniek. Sam 112:9 ej ba: “E ar kejibliklok, e ar lelok ñõn ro dri aikwij.” Dri Kristian ro remol ilo ran kein ekkã air lelok ñõn dri Kristian ro mõtair im ro dri turiir men ko rej aikwiji ilo kõniek. Bareinwõt ilo ran ko ñe ej walok jorran, rej kajerbal mweiuk im mõnni ko air ñõn jibõñ ro jet. Einwõt an kar Jisõs kar kalikar kake bwe wãwen in bareinwõt enaj bõktok mõnõnõ.​—Riit Jerbal 20:35; 2 Dri Korint 9:7.

¹² Bareinwõt, lemnok kin jããn ko rej kajerbali ñõn kõmõne buk in ilo 172 kajin ko, im elõñ ian kajin kein ro rejeramel rej konono kaki. Im rej bar kõmõne buk in ñõn ro rejaroñroñ im ro rebilo.

Joij im Ekajet Jime

13. Wõn ro rej joñok ko remõntata kin lelok ilo joij, im ewi wãwen jemaroñ anõk ir?

¹³ ‘Emõn armij eo ej kõmõn ilo joij im ej lelok.’ (Sam 112:5) Bwelen emwij am kile bwe jet armij rejjab joij aolep ien ñe rej jibõñ ro jet. Rej lelok ilo kelmarok. Ejjab juõn menin mõnõnõ ñõn ar bõk jibõñ jen rein. Ilo okõtõn, ej juõn men ekamõnõnõ ñõn bõk jibõñ jen juõn eo ejoij. Joñok eo emõntata kin kwalok joij, ej eo an Jeova bwe ej mõnõnõ in lelok. (1 Tim. 1:​11; Jem. 1:​5, 17) Jisõs Kraist ear kajeoñwe joñok eo an Jemen kin kwalok joij. (Mark 1:​40-​42) Inem bwe Anij en watõk kij dri wãnik, jej aikwij lelok ilo mõnõnõ im joij, elaptata ilo jerbal in kwalok nan ñe jej jibõñ ro dri turid bwe ren jela Jeova.

14. Ta jet ian wãwen ko jemaroñ kõmõni ñõn ‘kejbãrok bebe ko ar ilo ekajet jime’?

¹⁴ “E naj kejbãrok bebe eo an ilo ekajet.” (Sam 112:5) Einwõt kar kanan kake, dri kõmñe eo etiljek ej kejbãrok men ko an Iroij eo an ekkar ñõn ekajet jime eo an Jeova. (Riit Luk 12:42-​44.) Kien in ej alikar ilo nan in kakabilek ko ilo Baibel ñõn elder ro me rej aikwij ekajete ro rej kõmõn bwir ilo congregation eo. Ej alikar bareinwõt ñe dri korijer eo ej lelok nan in tel ko kin wãwen congregation ko, mõn missionary, im jikin jokwe ko ilo Bethel, rej jerbal. Ejjab elder ro wõt ak dri Kristian ro bareinwõt rej aikwij kwalok ekajet jime ñõn dron im ñõn ro rejjab ber ilo tõmak, ekoba ilo business ko.​—Riit Micah 6:​8, 11.

 Jerammõn ko ñõn Ro Rewãnik

15, 16. (a) Ewi wãwen nuuj ko renana kin lõl in rej jelet dri korijer ro rewãnik an Anij? (b) Ta ko ro dron Anij rej bebe wõt in kõmõne?

¹⁵ “Bwe jamin kamõkit e: ro dru wãnik re naj kememej ir ñõn in drio. E jamin mijõk kin nan in kennan ko renana; erim buruen; ej liki Jeova. Ebin buruen, e jamin lelñoñ, mae ien an lo an kõnan ion ro dri kijirãt e.” (Sam 112:​6-8) Elõñlok nuuj ko renana kiõ jen mokta, ekoba tõrinae, jerbal ko relej im kamijõk, nañinmij ko rekãl im ko me rar joko mokta ak rebar walok, jeramel im an etton lõl in. Men kein rej jelet dri korijer ro an Anij, bõtab rejjab ebwer. Ijellokin men in, rej ‘kabin burueir’ im ‘jab lelñoñ’ bwe rej reimanlok wõt ñõn juõn ilju emõn im liki bwe lõl eo ekãl an Anij ej ebaktok. Elañe ewalok jorran, rej kijenmij wõt kinke rej atartar ion Jeova ñõn an jibõñ ir. Ejamin kõtlok bwe dri korijer ro an ren joko kinke enaj jibõñ im kakajur wõt ir bwe ren kijenmij.​—Pil. 4:​13.

¹⁶ Dri korijer ro rewãnik an Anij rej aikwij kijenmij iomin matõrtõr im riõp ko nae ir jen dri jumae ro. Meñe rej kajeoñ kõmõne men kein ñõn ir ak rejamin kabwijrõk ir jen jerbal in kwalok nan. Rein rej wõnmanlok wõt im jutõk bin ilo jerbal eo Anij ear lelok ñõn ir bwe ren kwalok kin nuuj eo emõn im kõmõn dri kalor ro. Ejelok berre bwe ilo an ebaktok jemlokõn, dri korijer ro an Anij renaj jelmae elaplok abañ. Kijirãt kein renaj jemlok ñe Setan Devil eo me ej Gog im Magog enaj jumae aolep ro dron Anij ibelakin lõl. Inem, ilo ien in, jenaj ‘lo an ro rej kijdrate kij buñ.’ Enaj juõn ien ekamõnõnõ ñe jej lo an Anij kokwojarjar ãt eo etan.​—Ezek. 38:18, 22, 23.

“Utiej Kin Nebar”

17. Ewi wãwen dri korijer ro an ‘renaj utiej kin nebar’?

¹⁷ Enaj menin lõñliñ ñõn nebar Jeova ilo burukuk, im ejelok jumae jen Devil eo im lõl eo an. Aolep ro rej jutõk bin wõt iben Anij, renaj lo mõnõnõ ilo air nebar Jeova ñõn in drio. Rejamin buñ kinke Jeova ej kalimur bareinwõt bwe “drun” eo an ro dri korijeran “e naj utiej kin nebar.” (Sam 112:9) Dri korijer ro an Anij renaj lõñliñ ñe rej lo an dri kijirãt ro buñ.

18. Ewi wãwen nan ko ilo tujemlokõnlok Sam 112 enaj jejit kitieir?

¹⁸ “Ro dri nana re naj loe, im buromõj: e naj kalõllõl ñi ko ñiin, im unlok; an dri nana kõnan e naj joko.” (Sam 112:10) Aolep ro rej wõnmanlok im kabwijrõk jerbal eo ar im jumae ak kijirãte ro dron Anij, mõtõn jidrik renaj “unlok” ak joko ilo iñtan elap.​—Mat. 24:21.

19. Ta eo jej aikwij liki kake?

¹⁹ Kwonaj ke ro uan ro rej ellã jen ien eo ñe Anij enaj anjo ion dri kijirãt ro an? Ak elañe kwonaj joko mokta jen jemlokõn jukjuk im ber in an Setan kin am nañinmij ak bwijwõlã, kwonaj ke ro uan “ro remõn” im renaj jerkakbiji? (Jerb. 24:15) Uak eo emaroñ aet, elañe kwoj wõnmanlok wõt im tõmak ilo katok in binmour eo an Jisõs im kajeoñwe Jeova, einwõt “armij” eo ewãnik me Sam 112 ej kwalok kake. (Riit Dri Epesõs 5:​1, 2.) Jeova enaj ‘kememej wõt ir’ im jerbal ko air ñõn in drio.​—Sam 112:​3, 6, 9.

[Kamelele ko itulal]

Kajitõk ko ñõn Kalomõnlokjen Kaki

• Ta jet ian un ko unin jej aikwij “nebar” Jeova?

• Ta wõnmanlok ko rej walok ranin rej kamõnõnõik dri Kristian ro remol?

• Ewi wãwen jej kabuñburuen Jeova ñe jej lelok mweiuk ko ñõn jibõñ ro jet?

[Kajitõk ko ñan katak]

[Pija eo ilo peij 25]

Ñõn jutõk bin wõt iben Anij, jej aikwij tõmak ilo tokjen bõtõktõkin Jisõs

[Pija ko ilo peij 26]

Jabawõt ko ar jej lilok ilo mõnõnõ, remaroñ jibõñ ikijen buk ko jej kõmõni im jerbal ko jet an Kristian