Lo Mweiuk ko Raurõk

KWONAÑIN ke lo juõn mweiuk eaurõk me rar noje ilo jikin ko me kwar jab kõtõmene bwe enaj kar ber ie? Ilo Maaj 27, 2005, men in ear walok ñõn Ivo Laud, eo ej juõn ian Dri Kennan ro an Jeova ilo Estonia. Ear jibõñ Alma Vardja, juõn lilap me ej bar juõn ian Dri Kennan ro an Jeova, ñõn rupe juõn jikin kakonkon mweiuk emor. Ke rar rupe tulikin kiin mweo, rar lo juõn rã ear kalibubuik rãjetin jur eo. Ke rar jolok rã eo, rar lo juõn roñ ej 4 inij rebakbakin, 50 inij aitokin, im 4 inij mulõlin. (1) Iloan roñ eo rar lo elõñ mweiuk ko raurõk! Kar ta mweiuk kein raurõk? Im wõn eo ear noji?

Rar kadrioij jen roñ eo elõñ pakij ko rar limi ilo juõn peba emijil. (2) Kobõn pakij ko kar buk ko an  Dri Kennan ro an Jeova, enañin aolepeir kar buk in Imõniaroñroñ ko, im jet iair kar buk ko jen yiõ eo 1947. (3) Kar je buk kein ilo kajin Estonia. Jet ian men ko ilo pakij ko rar kalikar wõn eo ear noji. Men kein kar lokbuuk ko me rar kemelele kin ien ko dri tõrinae ro rar ekajete leo belen Alma, Villem Vardja. Bareinwõt ekoba iben men kein, rar lo kemelele ko me rej kwalok kin joñõn yiõ ko ear ber ilo kalbuj. Etke ear ber ilo kalbuj?

Villem Vardja ear bõk erron congregation eo ilo Tartu im tokelik ilo bar juõn congregation etan, Otepää ilo Estonia, juõn ian ailiñ ko an Russia mokta. Ear katak kin mol eo ilo Baibel mokta jen Bata eo an Lõl ken Karuo. Jejjo yiõ ko tokelik, ilo Tijemba 24, 1948, dri tõrinae ro an kien rar kalbuji Jeer im Jãter Vardja kin an bõk kwonan ilo jerbal in kwalok nan. Bolijmãn ro rar kajitõkin e im kõmõn men ko renana ñõn e bwe en kwalok ãt ko etan dri tõmak ro jet mõtõn. Elikin air kabwijrõk e jen an jojomar e mõke ilo imõn ekajet eo, kar ba bwe enaj kalbuj joñoul yiõ ilo Russia.

Villem Vardja ear tiljek ñõn Jeova mae ien ear mij ilo Maaj 6, 1990. Lio belen ear ejelok an jela kin buk kein me rar loi. Bwelen ear jab kwalok ñõn lio belen kinke ear kõnan kejbãrok e ñe renaj kar kajitõkin e. Etke ear aikwij noji buk ko? Kinke bõlijmãn ro ilo Russia me rej naetan KGB, ekkã air kõnan dreloñ ilo moko imõn Dri Kennan ro an Jeova ilo jidimkij ñõn bukot buk ko an Dri Kennan ro an Jeova. Jeer im Jãter Vardja emaroñ kar noji buk kein kinke ear kõnan kejbãroki ñõn ro jeer im jãter elañe buk ko jet renaj kar joko iben bõlijmãn ro. Ilo ien rak ilo yiõ eo 1990, bõlijmãn ro rar bar loe jet buk ilo Tartu, iturõkin Estonia. Villem Vardja ear bareinwõt noji buk kein.

Etke jej ba bwe buk kein rej menin aurõk? Kin an emõn air kar je buk kein kin peir mõke im air lukkun tiljek air kar noji, wãwen kein rej kwalok kin joñõn an Dri Kennan ro an Jeova ilo ien eo kar lukkun kaurõk katak ko an Jeova. (Mat. 24:45) Eor ke am kamolol kin buk ko rej berber ion Baibel? Juõn iair ej buk in Imõniaroñroñ ko rej kõmõni ilo elõñlok jen 170 kajin ko, ekoba kajin Estonia.