En Bolemen Wãwen Am Kajerbal “Jãji an Jitõb”

“Bõk . . . jãji an Jitõb, eo nan in Anij.”​—EP. 6:​17.

1, 2. En ewi wãwen ar emakõt ñõn aikwij eo ñõn an lõñlok dri kwalok ro kin Ailiñ eo?

 KE JISÕS ear lo jar ko im kile aikwij eo air ñõn katak kin Anij, ear jiroñ dri kalor ro an: “Elap jonikõn, a eiet dri jerbal; inem komin jar ñõn Iroij in marmir, bwe En jilkinlok ro dri jerbal ilo jonikõn eo An.” Jisõs ear jab baj ba wõt men in ak ear emakõt ilo an kar “kirtok joñoul im ruo dri kaloran” im jilkinlok ir ñõn kõmõne jerbal in kwalok nan, ak “marmir.” (Matu 9:​35-38; 10:​1, 5) Tokelik, Jisõs ear kãlet bar ‘jiljilimjuõnñoul, im jilkinlok ir karuolok’ ñõn kõmõne ejja jerbal eo wõt.​—Luk 10:​1, 2.

² Aikwij eo kin dri kwalok ro kin Ailiñ eo ej bareinwõt lap ilo ran kein. Ilo yiõ eo 2009, oran armij ro rar kobatok ilo Kwojkwoj in Kememej eo me ear walok ibelakin lõl kar 18,168,323. Men in ej melelen bwe ear or 10 million armij ro me rejjab Dri Kennan ro an Jeova rar kobatok ilo ien in. Alikar, jikin jonikõn ko rebojak ñõn marmir. (Jon 4:​34, 35) Kin men in, jej aikwij jar im kajitõk bwe en lõñlok dri jerbal ro. Ak ewi wãwen jemaroñ emakõt ekkar ñõn kajitõk kein? Jemaroñ kõmõne men in ilo ar kalaplok an keie wãwen ar jerbal ilo kijejeto ke jej kwalok nan kin Ailiñ eo im kõmõn dri kalor ro.​—Matu 28:19, 20; Mark 13:10.

3. Ta jerbal eo eaurõk jitõb kwojarjar eo ear kõmõne ñõn jibõñ kij erom dri kwalok ro rekeie?

³ Katak eo lok iman ear kwalok bwe ñe jej bõk tel jen jitõb eo an Anij, men in ej jibõñ kij ñõn “kwalok nan ko an Anij ilo beran.” (Jerb. 4:​31, UBS) Jitõb kwojarjar in ej bareinwõt jibõñ kij ñõn erom dri kwalok ro rebolemen. Juõn wãwen jemaroñ kalaplok ar keie ilo jerbal in kwalok nan ej ilo ar kõmõn bwe en bolemen wãwen ar kajerbal kein jerbal eo emõntata Jeova ear letok ñõn kij, Nan eo an, Baibel eo, me kar kajerbal jitõb kwojarjar eo ñõn kõmõne. (2 Tim. 3:​16) Ennan eo ie ej kakõrmol in Anij. Kin men in, ñe ebolemen wãwen ar kajerbal Baibel eo ñõn kemelele kin katak ko, ealikar bwe jej bõk tel jen jitõb kwojarjar eo. Mokta jen ar etale ewi wãwen jemaroñ kõmõne men in, jen lale ewi joñõn kajurin Baibel eo.

‘Nan in Anij Ej Jerbal Wõt’

4. Ennan eo an Anij ilo Baibel eo emaroñ jelet juõn armij ilo wãwen it?

⁴ Elukkun lap an kajur Nan in Anij! (Hib. 4:​12) Einwõt juõn wanjoñok, ennan eo me ej itok jen Baibel ej ekõñ jen jabrewõt jãji kõmõn in armij, kinke ilo kõkkar emaroñ wie im bukwe mokwõj im nononmej ko. Mol eo ilo Baibel emaroñ tõbar buruen juõn armij im jelet lemnok im iñjake ko an ilo juõn wãwen me ej kwalok kin kain armij rõt e im kamakõt e ñõn kakõmõnmõnlok mour eo an. (Riit Dri Kolosse 3:​10.) Aet, Nan eo an Anij emaroñ ukot mour ko an armij!

5. Ilo wãwen it ko Baibel eo emaroñ tel kij, im kin ta tokjen ko?

⁵ Bareinwõt, eor ilo Baibel meletlet eo ejejuan me jejjab maroñ loe ilo buk ko jet ak iben jabrewõt armij. Melele ko ie remaroñ jibõñ kij lo tõbrõk ñe jej jelmae wãwen ko rebin. Nan in Anij ej maram ñõn neer im bareinwõt ñõn ar ial. (Sam 119:105) Elap an Baibel eo jibõñ kij ñe jej iion abañ ko ak ñe jej kõmõn jokãlet  ko kin ro mõtar, menin kamõnõnõ ko, jikin jerbal, wãwen baotokir, im men ko eierlok wõt. (Sam 37:25; Ken. 13:20; Jon 15:14; 1 Tim. 2:9) Ñe jej jerbali nan in kaiñi ko me rej ber ilo Nan eo an Anij, men in ej kõmõn bwe kõtan eo ar iben ro jet en emõn. (Matu 7:​12; Pil. 2:​3, 4) Ñe jej kõtlok bwe Nan in Anij en kameramlok ial eo ej ber imar, jemaroñ lo wãwen an naj bebe ko ar jelet kij ilo ran ko rej berotok. (1 Tim. 6:9) Baibel eo ej bareinwõt kanan kin karõk eo an Jeova kin ilju im jeklaj, im men in ej jibõñ kij ñõn jibarek juõn wãwen mour me ej errã iben karõk in an Anij. (Matu 6:​33; 1 Jon 2:​17, 18) Elañe juõn ej kõtlok bwe nan in kaiñi ko an Anij en tel mour eo an, enaj lõñliñ kin juõn mour elap an or tokjen!

6. Ilo tõrinae eo ar nae Setan, ewi joñõn kajurin kein tõrinae eo ar, Baibel eo?

⁶ Bareinwõt, lemnok kin joñõn kajurin Baibel eo, kein tõrinae eo jej kajerbale ilo tõrinae eo ar nae Setan. Paul ear naetan Nan eo an Anij, “jãji an Jitõb.” (Riit Dri Epesõs 6:​12, 17.) Ñe ekeie wãwen ar kwalok kake, ennan eo ilo Baibel emaroñ kanemkwoj armij ro jen air kamakoko iomin kajur eo an Setan. Jen an kokkure mour ko, jãji in ej lomoren armij ro. Inem jej aikwij kate kij ñõn kajerbal jãji in ilo bolemen.

Kajerbal Nan in Anij ilo Jime

7. Etke eaurõk ñõn ar katak kilen kajerbale “jãji an Jitõb” ilo jime?

⁷ Juõn dri tõrinae emaroñ kajerbale kein tõrinae ko an ilo keie elañe ear bõk ien ñõn kamelmel im katak kilen kajerbali ilo juõn wãwen ejime. Men in ej bareinwõt eindrein ñe jej kajerbale “jãji an Jitõb” ilo tõrinae eo ar nae Setan. Paul ear je, “Kwon kate yuk bwe Anij en lo kwo mõn, dri jerbal e jamin jok im ejimewõt an katakin kin nan in mol.”​—2 Tim. 2:​15.

8, 9. Ta eo enaj jibõñ kij ñõn melele kin ta eo Baibel ej ba? Kwalok juõn wanjoñok.

⁸ Ta eo enaj jibõñ kij ñõn kajerbal ilo ‘jime nan in mol’ eo ñe jej kwalok nan? Mokta jen ar maroñ kwalok ilo alikar ñõn ro jet kin ta eo Baibel ej ba, jej aikwij lukkun melele kake. Men in ej melelen bwe jej aikwij lukkun etali eon ko jet me rej ber ibelakin eon eo, kinke enaj kõmõn bwe melele eo en lukkun alikar.

⁹ Einwõt juõn wanjoñok kin aikwij eo ñõn etale eon ko ibelakin, jen lale nan ko an Paul ilo Dri Galetia 5:​13. Ear je: “Bwe komeo, ro jãtiõ, ar kir kom ñõn anemkwojami; men in wõt, komin jab kõmõn bwe anemkwojami en ien jarõk ñõn kõniek, a kin yokwe komin korijer ñõn dron.” Anemkwoj jen ta eo Paul ear konono kake ijin? Ear ke konono kin anemkwoj eo jen jerawiwi im mij, jen ar kamakoko ñõn katak ko rewan, ak jen bar juõn men? Eon ko ibelakin eon in rej kalikar bwe Paul ear konono kin anemkwoj eo ej walok kinke kar binmour kin kij jen “binikol in kien.” (Gal. 3:​13, 19-​24; 4:​1-5) Ear konono kin bar juõn kain anemkwoj me ear itok jen air kar  lor Jisõs Kraist. Ro ear or air kamolol kin anemkwoj in rar korijer ñõn dron ilo yokwe. Ro me ejelok yokwe ibeir rar ruruwe im bõk kwonair ilo akwail ko.​—Gal. 5:​15.

10. Melele rõt ko jej aikwij etali ñõn ar maroñ bõk melele eo ejime kin eon ko ilo Baibel, im ia eo jemaroñ bõk melele kein ie?

¹⁰ Ñõn ar bõk melele eo ejime kin juõn eon, jej aikwij etale men ko einwõt, wõn eo ear je buk eo, ñãt eo kar je, im ta wãwen ko rar walok ilo ien eo kar je buk eo ilo Baibel. Enaj bareinwõt lap an jibõñ ñe jejela kin unin kar je buk eo, im bareinwõt kin mõnit ko an armij ro, mwiliir, im wãwen kabuñ eo air ilo ien eo. *

11. Ta eo jej aikwij kejbãrok kij jen ar kõmõne ñe jej kemeleleik eon ko ilo Baibel?

¹¹ Kajerbal nan in mol eo ‘ilo jime’ ej kitibuj elaplok jen ar baj kemelele ilo jime mol ko jen Baibel. Jej aikwij kejbãrok bwe jen jab kajerbal Baibel eo ñõn kamijõk armij ro. Meñe jemaroñ kajerbal Baibel eo ñõn jojomare mol eo, einwõt an kar Jisõs kõmõne ke Devil eo ear kajeoñ in kabo e, Baibel eo ejjab juõn alal in dreñdreñ me jej kajerbale ñõn kamijõk ak kajok dri roñjake ro ar. (Dut. 6:​16; 8:3; 10:20; Matu 4:​4, 7, 10) Jej aikwij bokake nan in kakabilek eo an dri jilik Piter: “A komin kokwojarjar Kraist einwõt Iroij ilo buruemi: im komin pojõk ien otemjej bwe komin uak ñõn jabrewõt armij ej kajitõk ibemi kin unin kejatrikrik eo ej iloami, a kin inimõn im mijõk.”​—1 Pit. 3:​15.

12, 13. Ta ‘men ko re kajur’ me Nan in Anij emaroñ kajimeiki? Kwalok juõn wanjoñok.

¹² Ñe ejime wãwen ar kajerbal Baibel eo, ta eo mol eo ilo Nan in Anij emaroñ kõtõbrõke? (Riit 2 Dri Korint 10:​4, 5.) Mol eo ilo Baibel emaroñ ‘jolok jikin [men, NW] ko re kajur,’ melelen katoojlok katak ko reriõp, mõnit ko renana, im lemnok ko me rej kwalok meletlet eo an armij ro rejjab wãppen. Jemaroñ kajerbal Baibel eo ñõn jolok jabrewõt kain lemnok ko me rej “koutiej e nae jelã an Anij.” Jemaroñ kajerbal katak ko ilo Baibel ñõn jibõñ ro jet kajime lemnok ko air bwe ren errã iben mol eo ilo Baibel.

¹³ Lemnok kin wanjoñok eo kin juõn lilap, eo ej 93 yiõ ridtõn im ej jokwe ilo India. Jen ke ear drik, kar katakin e ñõn tõmak bwe eor juõn mõtõn ilo enbwinir me ej mour manlok elikin mij im ej bar lotak ilo bar juõn enbwin (reincarnation). Ke ear jino katak Baibel eo iben leo nejin, eo ej jokwe ilo bar juõn ailiñ, ikijen airro jeje ñõn dron, ear mõnõnõ in tõmak katak ko ear katak kaki kin Jeova im kalimur ko an. Bõtab, kin an katak eo kin bar lotak lukkun bin ilo buruen, ke leo nejin ear jeje ñõn e kin wãwen ber eo an ro remij, ear kwalok an jab errã ilo men in. Ear ba: “Ijjab maroñ melele kin katak in ilo Baibel eo ami. Aolep kabuñ ko jet rej katakin bwe eor iben armij ro juõn men me eban mij. Jen ke iar drik, iar tõmak bwe ñe enbwin eo ej mij, eor  juõn mõtõn iloan im jejjab maroñ loe me ej bar lotak ilo enbwin ko jet enañin 8,400,000 alen. Ewi wãwen an jab mol katak in, melelen ke bwe enañin aolep kabuñ ko rebwir?” “Jãji an jitõb” emaroñ ke kajime tõmak in ebin? Elikin an kar leo nejin kemeleleik lok e kin katak in, jet wik ko tokelik ear je: “Ij kap jino lukkun melele mol eo kin wãwen ro remij. Elap aõ lõñliñ ñõn jela bwe ñe enaj itok ien jerkakbiji eo, jenaj maroñ ion ro rejitenburu iber me rar mij. Ij kejatrikrik bwe Ailiñ eo an Anij en mõkõj an itok.”

Kajerbale ilo Juõn Wãwen Me Emaroñ Karel Ir

14. Ta melelen ñõn karel dri roñjake ro ar?

¹⁴ Bwe en keie wãwen ar kajerbal Baibel eo ilo jerbal in kwalok nan, men in ej kitibuj elaplok jen ar baj eliji nan ko ilo eon ko. Paul ear “kemeleleik im karel” armij ro, inem jej aikwij kõmõn eindrein bareinwõt. (Riit Jerbal 19:​8, 9; 28:23.) Armij eo kar karel buruen, “joñõn an tõmak juõn men, ej kamakõt e ñõn an liki.” Ñe jej karel juõn armij ñõn an tõmak juõn katak ilo Baibel eo, jej kamakõt e ñõn an liki katak eo. Ñõn kõtõbrõk men in, jej aikwij karel dri roñjake ro ar ñõn tõmak bwe emol men ko jej ba. Jemaroñ kõmõne men in ilo ar lor wãwen ko kar kõlajrõki ilõl.

15. Ewi wãwen kwomaroñ kareilok armij ro ñõn Baibel eo ilo juõn wãwen ej kõmõn bwe ren koutieje?

¹⁵ Kareilok armij ro ñõn Baibel eo ilo juõn wãwen ej koutiej e. Ñe kwoj kwalok kin juõn eon ilo Baibel eo, kwon kalikar aurõkin ar aikwij in jela lemnok eo an Anij kin katak eo. Elikin am kwalok juõn kajitõk im roñjake lemnok eo an dri mweo, kwomaroñ ba, ‘Jen lale ewi wãwen jemaroñ bõk lemnok eo an Anij kin men in.’ Ak kwomaroñ kajitõk, ‘Ta eo Anij ej ba kin men in?’ Ilo am kwalok kin eon eo ilo wãwen in, kwoj kalikar bwe Baibel eo ej jen Anij im men in enaj jibõñ e ñõn koutiej ennan eo ie. Eaurõk ñõn ar kõmõne men in, elaptata ñe jej kwalok nan ñõn juõn eo me ej tõmak ilo Anij ak ejjab lukkun jela kin ta eo Baibel eo ej katakin kake.​—Sam 19:​7-​10.

16. Ta eo enaj jibõñ yuk ñõn kemeleleik eon ko ilo jime?

¹⁶ Kwon kemeleleik eon ko im jab baj riiti wõt. Ear juõn mõnit iben dri jilik Paul ñõn an ‘kemelele im kamol’ men ko ear katakin kaki. (Jerb. 17:3) Ilo Baibel eo, ekkã an lõñlok jen juõn point ilo juõn eon, inem kwomaroñ aikwij kalikar nan ko me rejejit ñõn men eo kwoj katakin kake. Kwomaroñ kõmõne men in ilo am eliji nan ko me rej kalikar point eo eaurõk ak ilo am kwalok kajitõk ko me remaroñ jibõñ dri mweo ñõn kile point eo. Inem, kemeleleik mõtõn eo ilo eon eo. Elikin am kõmõne men in, jibõñ dri roñjake eo am ñõn lo ewi wãwen eon eo ej jerbal ilo mour eo an.

17. Ewi wãwen kwomaroñ kajerbal eon ko ilo Baibel ilo juõn wãwen ej karel buruen armij eo?

¹⁷ Kajerbal eon ko ilo Baibel eo ilo juõn wãwen ej karel buruen armij ro. Ilo an Paul konono jen buruen im kwalok un ko rekeie, ear ‘kemelele ñõn ro jet jen Jeje ko’ ilo juõn wãwen me ear karel burueir. (Jerb. 17:​2, 4) Einwõt Paul, kwon kate yuk ñõn tõbar buruen dri roñjake eo am. Kwon “ture” buruen armij eo ilo am kajerbal kajitõk ko me rej kwalok bwe eor am itoklimo kake e. (Ken. 20:5) Kajeoñ in konono iben ilo joij. Im ñe kwoj kwalok point ko ñõn rejetake katak eo kwoj kwalok kake, en ilo juõn wãwen ealikar im kon, im kein kamol ko kwoj kajerbali rej aikwij  berber ion Nan ko an Anij. Emõnlok bwe en bolemen am kajerbal juõn wõt eon ilo am kemeleleik im kajerbal wanjoñok ko ñõn kalikar point eo jen am baj riit ruo ak jilu eon ko. Inem ilo am jerbali aolep men kein, emaroñ kõmõn bwe ‘nan ko am ren karel elõñ armij ro.’ (Ken. 16:23, UBS) Jet ien, emaroñ juõn menin aikwij ñõn kõmõn etale ko im kwalok melele ko jet. Lilap eo me 93 yiõ ridtõn, eo kar konono kake moktalok, ear aikwij in jela kin etke elõñ rej tõmak ilo katak eo bwe an (ak jitõb) eo, eban mij. Ke ear melele kin tu ia eo katak in ear itok jene im ewi wãwen ear oktõk im mõtõn tõmak ko an enañin aolep kabuñ ko ion lõl, men in ear lap an jibõñ e ñõn tõmak kin ta eo Baibel eo ej katakin kin men in. *

Wõnmanlok im Kajerbale ilo Juõn Wãwen Ebolemen

18, 19. Etke jej aikwij wõnmanlok im kajerbal “jãji an jitõb” ilo juõn wãwen ebolemen?

¹⁸ Baibel eo ej ba: “Wãwen lõl in ejokolok [eoktõklok, NW].” Armij ro renana rej nanalok wõt. (1 Kor. 7:​31; 2 Tim. 3:​13) Inem elukkun aurõk ñõn ar wõnmanlok im kajime ‘men ko re kajur,’ ilo ar kajerbal ‘jãji an Jitõb, eo ej nan in Anij.’

¹⁹ Elap ar mõnõnõ bwe eor iber Nan in Anij, Baibel eo, im ñõn kajerbal ennan eo ie ñõn jolok katak ko reriõp im tõbar buruen armij ro remõn! Ejelok juõn men ekajurlok jen ennan eo ilo Baibel. Kin men in, jen kate kij ñõn kajerbal “jãji an jitõb” eo ilo juõn wãwen ebolemen ilo jerbal eo Anij ear letok ñõn kij, jerbal in kwalok nan kin Ailiñ eo.

[Kamelele eo itulals]

Ta eo Kwar Katak Kake?

• Ewi joñõn an kajur Nan in Anij?

• Ewi wãwen jemaroñ kajerbal ilo ‘jime nan in mol’ eo?

• Ta eo ennan eo ilo Baibel emaroñ kõmõne ñõn ‘men ko re kajur’?

• Ewi wãwen kwomaroñ kakõmõnmõnlok wãwen am karel armij ro ilo jerbal in kwalok nan?

[Kajitõk ko ñan katak]

[Kamelele in juõn pija ilo peij 12]

Wãwen eo ñõn Kajerbal Nan in Anij ilo Juõn Wãwen Me Emaroñ Karel Armij Ro

▪ Kõmõn bwe armij ro ren koutiej Baibel eo

▪ Kemelele Jeje ko

▪ Kajerbal eon ko ilo Baibel eo ilo juõn wãwen ej karel buruen armij ro

[Kamelele in juõn pija ilo peij 11]

Kwoj aikwij katak ñõn kajerbal “jãji an jitõb” ilo juõn wãwen ekeie